1Aua e te sii le tala fatu fua; aua foi le ‘au faatasi ma le tagata amio leaga, ne‘i fai oe ma molimau faasaua.
2Aua e te mulimuli atu i le toatele e fai le amio leaga; aua foi e te tali atu i se finauga, e ‘au ma le toatele e faapiopio ai le faamasinoga.
3Aua e te ava i le tagata mativa i lana finauga.
4Pe afai lua te fetaiai ma le povi a lē lua te masesei, po o lana asini ua sē, ia e toe faafoi mai ai lava ia te ia.
5Pe afai e te iloa le asini a le ua ita mai ia te oe, o loo taoto i lalo o lana avega; ia oe ne‘i e tuua lava o ia, a ia oulua tatalaina lava faatasi ma ia.
6Aua e te faapiopioina le faamasinoga o le tagata mativa lua te fetalai i lana finauga.
7Ia e taumamao ma le upu pepelo, aua foi le fasioti le tagata e le sala ma le ua amiotonu; auā ou te le ta‘uamiotonuina le tagata amio leaga.
8Aua le talia se mea alofa; auā o le mea alofa e faatauaso a‘i o e vaavaai, e faaseseina ai foi upu a e amiotonu.
9Aua foi e te faasaua i se tagata ese, auā ua outou iloa lava le loto o le tagata ese, auā sa fai outou ma tagata ese i le nuu o Aikupito.
10E ono tausaga e te lulu ai saito i lou fanua, ma faaputu mea e tutupu ai;
11a o le tausaga e fitu, e te tuu ia ma ia tuu ai pea lava, ina ia aai ai o e matitiva i lou nuu; o mea foi e totoe ia te i latou e aai ai o manu o le vao; ia faapea foi ona e fai i lau tovine ma lau toolive.
12E ono aso e te fai ai au galuega, a o le aso fitu e te malolo ai, ina ia malolo ai lau povi ma lau asini, ia mapu foi le tama a lau auauna fafine, ma le tagata ese.
13O nei mea uma foi ua ou fai atu ai ia te outou, ia outou tausi i ai; aua foi ne‘i tou ta‘uta‘u le igoa o atua ese, aua lava ne‘i faalogo i ai i lou gutu.
14E tai atu tolu i tausaga ona e fai o tausamiga ia te au.
15Ia e fai le tausamiga o areto e le faafefeteina; e fitu aso e te ‘ai ai areto e le faafefeteina, faapei ona ou poloai atu ai ia te oe, i ona po na atofaina i le masina o Apipa; auā na e sau ai nai le nuu o Aikupito; aua foi ne‘i iloa se isi i o‘u luma ua leai sana mea;
16ma le tausamiga o le seleselegāsaito; ma le uluai fua o lau galuega na e totoina i le fanua; ma le tausamiga o le faaputuga o mea e ‘ai ina a uma le tausaga, pe a uma ona faaputuina o au mea mai le fanua.
17E tai atu tolu i tausaga ona iloa ai o tane uma lava ua ia te oe i luma o le Alii o Ieova.
18Aua le fai taulaga i le toto o la‘u taulaga faatasi ma le areto ua faafefeteina; aua foi ne‘i tu pea seia taeao ga‘o o la‘u taulaga.
19O le faapolopolo o le uluai fua o lou laueleele, ia e au mai lea i le fale o Ieova lou Atua. Aua le tunu se tamai ‘oti i le suāsusu o lona tinā.
20Faauta, ou te auina atu le agelu i ou luma, na te tausia oe i le ala, na te faaoo atu foi ia te oe i le mea ua ou saunia;
21ia e faaeteete oe ia te oe i ona luma, ma ia e faalogo i lona leo, aua le faaonoono ia te ia, auā na te le faamagaloina o outou solitulafono; auā foi o loo ia te ia lo‘u nei igoa.
22A e afai e te matuā faalogo i lona leo, ma fai mea uma lava ou te fai atu ai, ona fai ai lea mo‘u fili o e ua fai oe mo latou fili, ou te faatiga atu foi i e faatiga mai ia te oe.
23Auā e muamua atu la‘u agelu i ou luma, ma faaoo atu ia te oe i le nuu o sa Amori, ma sa Hetī, ma sa Perisē, ma sa Kananā, ma sa Hivī, ma se Iepusē; ou te faaumatia foi i latou.
24Aua e te ifo i o latou atua, aua foi le auauna ia i latou, aua foi le fai e tusa ma mea latou te faia; a ia e matuā lepeti, ma matuā tu‘ininiia o latou tupua.
25A ia outou auauna ia Ieova lo outou Atua, ona faamanuia lea e ia lau mea e ‘ai atoa ma lou vai; ou te faatea ese foi ma‘i ia te oe.
26E leai sē pāpā sana tama, e le pa foi se tasi i lou nuu; ou te faaatoaina lava ou aso.
27O lo‘u matautia ou te auina atu e muamua ia te oe, ou te tulia foi nuu uma e te alu atu i ai; ou te tuuina atu foi i e ita ia te oe uma lava ia latou liliu mai o latou tua ia te oe.
28Ou te auina atu foi e muamua atu ia te oe o lagomumu, e tuli ai sa Hivī, ma sa Kananā, ma sa Hetī ai ou luma.
29Ou te le tulia i latou ai ou luma i le tausaga e tasi, ne‘i gaogao le fanua, ma tupu tele ai o manu feai e tiga ai oe.
30A e taitoaitiiti ma taitoaitiiti ou te tulia ai i latou i ou luma, ina seia e tupu tele ai, ma ia e maua le fanua.
31Ou te tuu foi ou tuaoi e gata mai i le sami Ulaula, e gata mai foi i le sami o Filistia, e gata mai foi i le vao, e gata mai i le vaitafe; auā ou te tuuina atu i o outou lima i latou o e nonofo i le nuu; e te tulia foi i latou ai ou luma.
32Aua e te osi se feagaiga ma i latou, po o latou atua.
33Aua ne‘i latou nonofo pea i lou nuu, ne‘i latou faatupu ai lau agasala ia te au; auā pe a e auauna i o latou atua, e fai lava ia ma mailei ia te oe.
Who We AreWhat We EelieveWhat We Do
2025 by iamachristian.org,Inc All rights reserved.
