1Ia outou faapotopoto outou, ina faapotopotoina ia outou, le nuu e le manaomia;
2manū o lei fanau mai le pule; o loo mavae atu le aso pei o aputi o saito; manū o lei oo mai le toasa tele o Ieova ia te outou; manū o lei oo mai ia te outou le aso o le toasa o Ieova.
3Ia outou saili ia Ieova, outou uma ua agamalu i le nuu, o e ua faia lana faamasinoga; ia outou saili le amiotonu, ia outou saili le agamalu, atonu e lilo ai outou i le aso o le toasa o Ieova.
4Auā e tuulafoaiina Kasa, e avea foi Asekelona ma mea gaogao; o Asetota latou te tulia o ia i le tutonu o le la, e liaiina foi Ekerona.
5Oi talofa i e nonofo i nuu tumatafaga, o le nuu o Kereti! o loo faasaga ia te outou le afioga a Ieova; Kanana e, le nuu o Filisitia, ou te faaumatia oe, e iu ina leai se nofo ai.
6E avea foi nuu tu matafaga ma lotoā a manu, ma vaieli o e leoleo manu, ma lotoā mamoe.
7E avea foi le nuu mo e o totoe o le aiga o Iuta, latou te aai ai; o le afiafi latou te taooto ai i fale o Asekelona; auā e asiasi Ieova lo latou Atua ia te i latou ma faafoisia mai la latou tafeaga.
8Ua ou faalogo atu i le faifai mai a Moapi, ma le faaleaga mai a le fanauga a Amoni, ua latou faifai mai ai i lo‘u nuu, ma latou faamaualuluga mai ai i lo latou tuaoi.
9O le mea lea, o loo faapea mai ai Ieova o ‘au le Atua o Isaraelu, Ou te ola a‘u, e avea lava Moapi pei o Sotoma, o le fanauga a Amoni foi pei o Komoro, o le mea e i ai le vao ogoogo, ma lua o masima, o le mea gaogao foi e faavavau; o e o totoe o lo‘u nuu latou te vetea i latou, o e totoe foi o o‘u tagata latou te fai i latou mo i latou lava.
10E oo lea mea ia te i latou ona o lo latou faamaualuluga, auā na latou faifai ma faamaualuga i le nuu o Ieova o ‘au.
11E matautia Ieova e i latou; au? na te faaumatia atua uma o le lalolagi; e ifo tagata ia te ia taitasi i le mea e nofo ai, o nuu tumatafaga uma o nuu ese.
12Outou Aitiope foi e fasiotia outou i la‘u pelu.
13Na te faaloaloa atu foi lona aao i le itu i matu, ma faaumatia Asuria; e fai foi e ia o Nineva ma mea gaogao, o le nuu naumati pei o le vao.
14E taooto foi i ai lafu o manu vaefa uma o nuu ese; o le kati ma le kifota la te momoe i tumutumu o ona pou; e tagi le leo o manu i faamalama, e gaogao faitotoa; auā e aliali mea ua fai i arasi.
15O le aai mitamita lena sa nofo faatalanoa, o le sa faapea ifo i lona loto, O a‘u lava, e leai se tasi, na o a‘u; oi! ua faapea ona fai ma mea gaogao; o le mea e taooto ai manu feai; e taitasi ma uisa o e ui ane ai, e tusi atu ai o latou lima.
Who We AreWhat We EelieveWhat We Do
2025 by iamachristian.org,Inc All rights reserved.
