1O loo fetalai mai Ieova. Oi talofa i le fanau e fouvale, o e faia a latou pule, a e le fua mai ia te au; ua latou sasaa foi le taulaga i mea e inu, a e le fua mai i lo‘u Agaga; ina ia latou faaopopo le agasala i le agasala.
2O e savavali e o ifo i Aikupito, a ua le fesili mai ia te au; ina ia faamalolosia i latou i le malosi o Farao, ma ia latou faatuatua i le paolo o Aikupito.
3A e avea le malosi o Farao ma mea tou te mamā ai, o le faatuatua foi i le paolo o Aikupito, e fai lea mo outou luma.
4Auā sa i Soana ona alii, na oo foi lana sāvali i Sanesa.
5Ua latou mamā uma ona o le nuu e le aoga ia te i latou, e le mafesoasoani, e le aoga lava, a e fai ma faamā ma luma.
6O le avega a manu i le itu i toga; o loo o atu i le nuu e i ai puapuaga, ma le atuatuvale, e tutupu mai ai le leona fafine ma le leona, o le gata ma le gata lele, latou te ave a latou oloa i tua o asini, ma a latou oa i pona o kamela i le nuu e le aoga ia te i latou.
7Auā o le fesoasoani o Aikupito ua le aoga, ua leai lava; o le mea lea na a‘u faaigoaina ai o ia, O Raava, ua nofonofo i latou.
8O lenei, alu ia ma tusi lenei mea i se papa i o latou luma, ia tusi ai foi i se tusi, ina ia tumau i aso amuli e faavavau faavavau lava;
9auā o le nuu fouvale lenei, o le fanau pepelo, o le fanau e le mafafai ona faalogo i le tulafono a Ieova;
10o e fai atu i tagata vaai, Aua tou te vaai; latou te fai atu foi i perofeta, Aua tou te faaali mai ia te i matou mea tonu; ina fai mai ia ia te i matou upu malie, ina faaali mai ia mea pepelo;
11‘alo ese ia outou i le ala; ina o ese ia i le ala; ina faateaeseina ia le Paia o Isaraelu i o matou luma.
12O le mea lea ua faapea ona fetalai mai ai o le Paia o Isaraelu, Ua outou teena lenei upu, ma ua outou faatuatua i le faasaua, ma le faapiopio, ma ua faalagolago i ai.
13O le mea lea e avea ai lenei amio leaga ia te outou e pei o se mea ua sofaia o le a paū, ua oso mai i le pa maualuga, o lona solo e faafuasei mai, ua se emo lava.
14E solo lava ia e pei ona nutililii o le fagu na faia e le fai ipu omea, ua tu‘ininiia; e le faasaoina lava; e le maua foi se ta‘ega fagu i mea ua nutililiia e ati ae se afi ai le avagalafu, pe asu mai ai ni vai ai le vaieli.
15Auā o loo faapea ona fetalai mai o le Alii o Ieova, o le Paia o Isaraelu, O le liliu mai ma le filemu e faaolaina ai outou, o le filemu ma le faatuatua o lo outou malosi lea; a ua outou le mafafai.
16A ua outou fai mai, E leai, a e sosola matou i solofanua; o le mea lea tou te sosola ai lava; ua outou fai mai foi, matou te tietie i mea tele vavave; o le mea lea e tele vavave ai i latou o e tuliloa ia te outou.
17E sosola le toaafe i le aoaiga a le toatasi; o le aoaiga a le toalima tou te sosola ai lava; ina seia faatotoeina outou e pei se fanā i le tumutumu o le mauga, po o se tagavai i le mea maualuga.
18A e ui lava i lea e faatalitali Ieova ina ia alofa fua mai ia te outou; o le mea lea e tulai ai o ia e alofa ia te outou; auā o Ieova, o le Atua e faamasino tonu ia; amuia i latou uma o e faatalitali ia te ia.
19Auā e nonofo le nuu i Siona i Ierusalema; e te le toe tagi lava; e matuā alofa o ia ia te oe pe a e alaga atu; a faafofoga o ia, ona tali atu ai lea o ia ia te oe.
20E avatu e le Alii ia te outou le mea e ‘ai o le maosiosi, ma le vai e maua ma le tiga; e le toe lalafi o outou a‘oa‘o, a e vaai atu o outou mata i o outou a‘oa‘o.
21E faalogo foi o outou taliga i le upu i o outou tua, pe a outou afe ane i le itu taumatau pe afe ane i le itu tauagavale, e faapea mai, O le ala lava lenei, ia outou savavali ai.
22Tou te faaleaga foi le ufiufi ario o outou tupua ua ta, ma le ufiufi auro o outou tupua uamea, e te lafoaiina lava, e pei o le ie o le ma‘i; e te fai atu foi i ai, Alu ia.
23Ona foai lea e ia le timu i āu saito, e te luluina ai i le eleele; i le ma mea e ‘ai e tutupu mai i le eleele, e tupu tele ma le lelei; o le aso lea e tataa ai au manu i le taaga lautele.
24O povi foi ma asini o e galulue i le laueleele e aai i latou i mea e ‘ai ua faamasimaina, o le mea ua saviligia i le asu ma le ili.
25O atu mauga maualuluga uma ma mauga maualuluga uma, e i ai vai ola ma vaitafe i le aso o le fasi tele, pe a solo i lalo ‘olo.
26E avea foi le malamalama o le masina e pei o le malamalama o le la; o le malamalama o le la e sāutuafitu ia e pei o le malamalama o aso e fitu, i le aso e fusi ai e Ieova le gau o lona nuu, ma fofoina ai le manua e manunua ai i latou.
27Faauta, o loo afio mai le suafa o Ieova mai le mea mamao; o loo mu lona toasa, e tele foi le mu; ua tutumu ona laufofoga i le toatamai; o lona laulaufaiva foi, ua peiseai se afi e ‘ai tele.
28O lona mānava foi e pei o se vaitafe ua oso; e oo i le ua, e lulu ai nuu ese i le lulu e fano ai; e i ai foi i le gutu o le nuu le faagutu e faasese ai.
29E ia te outou le pese, e pei ona fai i le po e fai ai le tausamiga paia; e fiafia foi loto e pei o le ua ili fano lana fagufagu e oo atu i le mauga o Ieova, o le Papa o Isaraelu.
30E faafaalogoina e Ieova lona siufofoga silisili, e faaali foi e ia le faapaū ifo o lona aao, ma le tele o lona toasa, ma le mu o le afi ‘ai tele, o le lolo, ma le afā, ma le uato‘a.
31Auā o le siufofoga o Ieova e lafoia ai Asuria, na te taia o ia i le tootoo.
32O mea uma foi e ui ane ai le sasa ua tofia, e faatumauina ai e Ieova i o latou luga, e faia ia ma topa ma kitara; e sii atu e ia le taua ia te i latou, o taua e luluina ai.
33Auā ua saunia Tofeta talu anamua; ua saunia lava lea mea mo le tupu; ua na faamaulaloina, ma faavateleina; o lona faupuega o le afi lea ma fafie e tele; o le mānava o Ieova e pei o se tafe o teio e faamuina ai.
Who We AreWhat We EelieveWhat We Do
2025 by iamachristian.org,Inc All rights reserved.
