1Ua faalogo e Sanepalata ua matou atia le pa, ona ita lea o ia, ua matuā tiga lava, ua ia tauemu foi i sa Iutā,
2ma fai atu i luma o ona uso ma le itu taua a Samaria, ua faapea atu, Se a le mea o faia e ia tagata vaivai o sa Iutā? Pe tuu ai pea ea i latou? Latou te fai taulaga ea? Latou te faauma ea i le aso e tasi? Latou te toe atiina ae ea maa ai faupuega otaota ua susunuina?
3Sa i ai ma ia o Tovia o lo sa Amonī, ua fai mai foi o ia, O le mea lava ua latou atia, a alu ae i ai se alope, na te sŏloia lo latou pa maa.
4Lo matou Atua e, ia e faafofoga mai; auā o loo inosia i matou; ma ia e faafoi atu lo latou faaluma mai i luga o latou ulu, ia tuuina atu i latou ia vetea i le nuu na tāfea i ai;
5aua ne‘i ufiufitia foi lo latou agaleaga, aua foi ne‘i sōloiesea i ou luma la latou agasala; auā ua latou faalili mai i luma o e atia le pa.
6Ua matou atia le pa; ua fesootai foi le pa uma e oo i lona vaeluagalemu; auā sa loto lava le nuu i le galuega.
7Ua faalogo Sanepalata, ma Tovia, ma tagata Arapi, ma sa Amonī, ma tagata Asetota, ua saga ati ae pea pa o Ierusalema, auā ua amata ona malu o mea na sŏloia, ona tupu tele ai lea o lo latou ita,
8ma taupulepule faatasi i latou uma e sii mai le taua i Ierusalema, ma faaoo i ai se malaia.
9A ua matou tatalo atu i lo matou Atua, ma matou tofia nisi e leoleo ia te i latou i le ao atoa ma le po, ona o i latou.
10Ua fai mai foi Iuta, Ua itiiti le malosi o e ave avega, ma ua tele le otaota; tatou te le lavā ai ona ati o le pa.
11Ua faapea ane foi o e na fai i matou mo latou fili, Latou te le iloa, latou te le vaaia, seia matou oo atu i totonu ia te i latou, ma fafasi ia te i latou, ma faagataina le galuega.
12Ua o mai foi sa Iutā o e na nonofo felatai ma i latou, ona latou fai faasefulu mai lea ia te i matou, O mea uma lava tou te foi mai ai ia te i matou, latou te feosofi mai ai ia te outou.
13Ona ou tofia ai lea i mea maulalo i tua o le pa, ma mea maualuga na ou tofia i ai lava le nuu i o latou aiga, ma a latou pelu, ma o latou tao, ma a latou aufana.
14Ua ou vaavaai, ma tulai, ma fai atu i alii, ma faipule, ma le nuu uma, Aua ne‘i fefefe outou ona o i latou; ia outou manatunatu i le Alii silisili ma le matautia, ma ia outou tau mo outou uso, o outou atalii, ma o outou afafine, o a outou avā, ma o outou fale.
15Ua faalogo e na ita ia te i matou, ua iloa e i matou, ma ua faaleaogaina e le Atua la latou filifiliga, ona toe faasaga atu ai lea o i matou uma i le pa, taitoatasi i lana galuega.
16Talu lea aso, na vaeluaina ai a‘u auauna, sa fai galuega le tasi vaega, a o le tasi vaega ua latou ‘u‘u i tao, ma talita, ma aufana, ma ofutau; o alii foi na i tua o le aiga uma o Iuta.
17O i latou na atia le pa, ma i latou na ave avega, ma i latou na tautuu mea, ua taitasi ma galue i lona lima e tasi, a e ‘u‘u le tao i le tasi lima.
18O e na atia foi ua taitoatasi ma fusi lana pelu i lona itu, ma latou atia; na i o‘u tafatafa foi o le na ili le pu.
19Ua ou fai atu foi i alii, ma faipule, ma tagata uma o le nuu, Ua matuā tele lava le galuega, ua taapeape foi i tatou i le pa, ua vava mamao le tasi i le tasi.
20O lenei, o le mea tou te faalogo i ai le leo o le pu, ia outou faapotopoto mai ai ia te i matou; e tau lo tatou Atua mo i tatou.
21Ua galulue foi i matou i le galuega, ua ‘u‘u tao le tasi vaega o i latou e afua i le malama ae o le taeao e oo ina fepulafi mai o fetu.
22Ua ou fai atu foi i na ona po i le nuu, Ia taitoatasi ma lana auauna ma nofo i totonu o Ierusalema, ia latou fai ma leoleo ia te i tatou i le po, a e galulue i le ao.
23O a‘u foi, ma o‘u uso, ma a‘u auauna, ma tagata leoleo o e na mulimuli mai ia te au, ua matou le to ese o matou ofu, ua taitasi ma ave lana auupega i le vai.
Who We AreWhat We EelieveWhat We Do
2025 by iamachristian.org,Inc All rights reserved.
