SALAMO, 24 - Samoan Old Version Bible

O LE SALAMO XXIV.O le Atua o le pule aoao ia i le lalolagi. Ua iloga ona tagata.O le salāmo a Tavita.

1O le lalolagi ma mea ua tumu ai o a Ieova ia; o le atu laulau ma e o nonofo ai.

2Auā o ia lava na faavaeina ai i luga o le sami, ma faamau ai i luga o vaitafe.

3O ai ea se alu ae i le mauga o Ieova? O ai se tumau i lona afioaga paia?

4O le ua i ai lima mamā, ma le loto mamā; o le ua le naunau lona loto i le mea faatauvaa, ma ua le tauto faa‘ole‘ole.

5Na te maua le manuia mai ia Ieova, ma le amiotonu mai le Atua o lona faaolataga.

6O le tupulaga lena e sailiili ia te ia, o e saili ia te oe, o Iakopo ia. Selā.

7Ina faaea ia i luga o outou ulu, outou faitotoa e; ia faaeaina i luga o outou puipui o le faavavau e, se‘i ulu atu ai le Tupu mamalu.

8O ai ea lenei Tupu mamalu? O Ieova, le malosi ma le fitafita, o Ieova le fitafita i le taua.

9Ina faaea ia i luga o outou ulu, outou, faitotoa e; ia faaeaina i luga o outou puipui o le faavavau e, se‘i ulu atu ai le Tupu mamalu.

10O ai ea lenei Tupu mamalu? O Ieova o ‘au, o ia lava le tupu mamalu. Selā.