1O le afioga na oo mai ia Ieremia mai ia Ieova, ua faapea mai,
2Ina tulai ia, ma alu ifo i le fale o le fai ipu omea, ona ou faailoa atu ai lea ia te oe i lea mea o a‘u upu.
3Ona ou alu ifo ai lea i le fale o le fai ipu omea, faauta foi, o fai e ia lana galuega i luga o mea taavilivili.
4Ua leaga le ipu na ia faia i le omea i le lima o le fai ipu omea; ona toe fai ai lea e ia o le tasi ipu e tusa ma le manatu o le fai ipu omea ona fai.
5Ona oo mai lea o le afioga a Ieova ia te au, ua faapea mai,
6Le aiga o Isaraelu e, ou te le mafaia ea ona fai ia te outou e pei o lena fai ipu omea? o loo fetalai mai ai Ieova. Faauta, le aiga o Isaraelu e, e pei o le omea i le lima o le fai ipu omea, e faapea foi outou i lo‘u lima.
7O le itu aso ou te tautala atu ai i se nuu, po o se malo, ia liaiina, ma lepetia, ma faaumatia;
8pe afai e liliu mai lea nuu na ou tautala i ai, nai la latou amio leaga, ona ou salamo ai lea i le malaia na ou manatu e faaoo i ai.
9O le itu aso foi ou te tautala atu ai i se nuu, po o se malo, e atiina ae ma faatotōina;
10a faia e i latou le amio leaga i o‘u luma, ma latou le faalogo i lo‘u leo, ona ou salamo ai lea i le manuia na a‘u fai atu ai ou te faamanuiaina ai i latou.
11O lenei, ia e fai atu i tagata o Iuta ma e o nonofo i Ierusalema, ia faapea atu, Ua faapea ona fetalai mai o Ieova, Faauta, o a‘u nei, ou te sauni atu le malaia ia te outou, ou te mafaufau foi i se togafiti ia leaga ai outou; o lenei, ia outou toe foi mai, taitasi le tagata ai lona ala leaga, ma ia outou sauni lelei o outou ala ma a outou amioga.
12A ua latou fai mai, E le aoga; auā matou te mulimuli atu i o matou mafaufauga, e taitasi foi ma fai e tusa ma le finau vale o lona loto leaga.
13O le mea lea o loo faapea ona fetalai mai ai o Ieova, Ia outou fesili atu i nuu ese, po o ai ua faalogo i mea faapenei? ua faia e le taupou o Isaraelu le mea e matuā inosia.
14E tuua ea e le kiona o Lepanona le papa i le vao? E pē ea le vai ese, ua mālulu, ua tafe mai?
15A ua faagalogaloina a‘u e lo‘u nuu, ua latou faamu mea manogi i le mea faatauvaa, ma ua faatausuaiina i latou i o latou ala, o ala o le vavau, ina ia savavali i ala ‘alo, o le ala e le tanua;
16ina ia faia lo latou nuu ma faatafunaga, ma mea e uisa ai e faavavau; o i latou uma e ui ane ai e taitasi ma ofo, ma lialiai lona ulu.
17E pei o le matagi mai sasae ou te faataapeapeina ai i latou i luma o e ita mai; ou te u atu ia te i latou lo‘u tua, a e le o o‘u mata i le aso o lo latou malaia.
18Ona latou fai ane lea, O mai ia, ia tatou filifilia ni togafiti e leaga ai Ieremia; auā e le te‘a le tulafono ai le faitaulaga, po o le mafaufau ai le tagata poto, po o le upu ai le perofeta. O mai ia, ia tatou taia o ia i o tatou laulaufaiva; aua foi le liliu atu o tatou taliga i sana upu e tasi.
19Ieova e, ia liliu mai ou fofoga ia te au, ma e faafofoga mai i le leo o e finau mai ia te au.
20E tauia ea le lelei i le leaga? auā ua latou elia le lua ia ou oti ia. Ia e manatua na ou tu i ou luma e tautala mo i latou ia manuia ai, ina ia faaliliu ese lou toasa ia te i latou.
21O le mea lea ia e tuuina atu ai a latou fanau i le oge, ia tuuina atu foi i latou i le malosi o le pelu; ma ia avea a latou avā ma fafine ua aufanaua, ma ia oti a latou tane; ma ia fasiotia a latou tane; ma ia fasia o latou taulelea i le pelu i le taua.
22Ia lagona le alaga i o latou fale, pe a e faaoo faafuasei mai le ‘au ia te i latou; auā ua elia e i latou le lua e maua ai a‘u, ma ua latou nanā mailei mo o‘u vae.
23A o oe, Ieova e, ua e silafia a latou pulega uma ia te au ia o‘u oti; aua le ufitia a latou amioletonu, aua foi e te sōloiesea a latou agasala i ou luma, a ia faatausuaiina i latou i ou luma; ia faapea ona fai ia te i latou i ona po o lou toasa.
Who We AreWhat We EelieveWhat We Do
2025 by iamachristian.org,Inc All rights reserved.
