IOPU, 30 - Samoan Old Version Bible

O LE MATAUPU XXX.O upu a Iopu.

1A o ona po nei ua tapisa mai ai ia te au i latou e itiiti o latou aso i o‘u; ta ‘ino‘ino e tuu faatasi o latou tamā ma ulī o lo‘u lafu mamoe.

2A o le malosi o latou lima se a ea lona aoga ia te au, o e ua mavae lo latou malosi?

3O le mativa ma le oge na tino vavale ai i latou; na sosola atu i le nuu naumati, o le pouliuli, o le taaligoligoa, ma le gaogao.

4O e na fafati i maluka i tafatafa o vao iti, ma aa o ratami e fai mā latou mea e ‘ai.

5Na tuliesea i latou i le mea o i ai tagata, na latou tulialaga ia i latou e pei o se gaoi;

6ia nonofo i vanu matuā fitā, o ana foi o le laueleele, ma papa.

7Na latou fetagisi i totonu o vao iti, e pei o asini o le vao; na faapotopotoina i latou i lalo o le vao ogoogo.

8O le fanau i latou a tagata vālea; o le fanau foi a e ua le igoā; na tulieseina i latou i le nuu.

9A o ona po nei ua avea ai a‘u ma a latou pese, ua fai foi a‘u ma faatauemuga ia te i latou.

10Ua latou ‘ino‘ino mai ia te au, ma ‘alo‘alo mamao ia te au; ua latou le taofia o latou feanuga i o‘u luma.

11Auā ua tālaina e ia la‘u maea, ma na faatigaina a‘u, ua latou tuulafoai ai le faagutu i o‘u luma.

12Ua tulai mai tama leaga i lo‘u itu taumatau, ua latou tavae mai i o‘u vae, ua latou tanu foi o latou ala ia malaia ai a‘u.

13Ua latou lepeti lo‘u ala, ua latou faateleina lo‘u malaia, e leai se fesoasoani ia te i latou.

14Ua latou feosofi mai i le mea ua sofaia ua lautele; ua latou fetuleni mai i le mea ua lepetia.

15Ua faasagasaga mai ia te au mea matautia; ua latou tuliloa mai i lo‘u mamalu e pei o le matagi; ua mavae atu foi lo‘u manuia e pei o le ao.

16O lenei, ua faavaivaia lo‘u loto i totonu ia te au; ua maua a‘u i aso o le puapuaga.

17Ua tiga tele lava o‘u ivi i le po, e le mapu i le gāoi o lo‘u tino.

18O lo‘u ma‘i ina ua matuā tele ua fai mo‘u ofu; ua fusi ia te au e pei o le ua o lo‘u ofu tino.

19Ua ia lafotuina a‘u i le palapala; ua avea foi a‘u e pei o le efuefu ma le lefulefu.

20Ua ou alaga atu ia te oe, a e te le tali mai ia te au; ua ou tu atu, a e te lei silasila mai ia te au.

21Ua liua oe ua e faatiga ia te au; ua e tuliloa mai ia te au i lou aao malosi.

22Ua e siitia a‘u, ua e faatietie ia te au i le matagi; ua e faavaivaia ma faamatautia a‘u.

23Auā ua ou iloa e te avea a‘u i le oti, ma le fale ua tofia mo tagata ola uma lava.

24A e peitai, na te le faaoo atu lona aao i le tuugamau, pe afai e i ai ia te i latou le tatalo i lona faaooina o le malaia.

25Ou te lei tagi ea ona o le na puapuagatia? E lei faanoanoa ea lo‘u loto ona o le ua mativa?

26Na ou faatalitali i le lelei, ona oo mai ai lea o le leaga; na ou faamoemoe foi i le malamalama, ona oo mai ai lea o le pogisa.

27Ua sapotuvale lo‘u manava, ma ua le to‘a filemu; ua oo mai ia te au aso o le puapuaga.

28Ua ou fealuai ua uliuli a e le o le la; ua ou tulai i le faapotopotoga, ma ou alaga.

29Ua avea a‘u ma uso o tanimo, ma uo o iaena.

30Ua uliuli lo‘u lava pa‘u, ua mu foi o‘u ivi i le vevela.

31Ua liua foi la‘u kitara ma faanoanoaga, o la‘u faaili foi ua liua ma leo o e fetagisi.