1O ona po ia sa leai se tupu ia Isaraelu; o ona po foi ia na saili ai e le itu aiga o Tanu se mea e nonofo ai i latou; auā ua oo i lea aso e lei te‘a atu ia te i latou o latou fanua na tofia i itu aiga o Isaraelu.
2Ua aauina e le fanauga a Tanu ai lo latou aiga tagata e toalima mai lo latou nuu, o tagata totoa, mai Soraa ma Esetaola, e asiasi le nuu ma vaavaai i ai; ua latou fai atu ia te i latou, O ia, ina outou vaavaai i le nuu. Ona latou oo lea i le mauga o Efaraima i le fale o Mika, ua latou momoe ai.
3Sa latalata ane i latou i le fale o Mika, ona latou iloa lea o le leo o le taulealea o sa Levī, ua latou afe ai; ona latou fai atu lea ia te ia, O ai ea na aumaina oe iinei? Se a foi sau mea e fai iinei? O a ea ni mea ua ia te oe i le mea nei?
4Ua ia fai mai ia te i latou, O loo faapea ona fai e Mika ia te au; na te totogi ia te au, a e fai a‘u ma faitaulaga ia te ia.
5Ona latou fai atu lea ia te ia, Ia e fesili i le Atua, ina ia matou iloa, pe manuia la matou malaga matou te o atu ai?
6Ua fai mai le faitaulaga ia te i latou, O ia ma le manuia; o loo ua silafia e Ieova lo outou ala tou te ui ai.
7Ona savavali lea o ia tagata e toalima, ua oo i Laisa, ua latou vaavaai i le nuu sa i ai, ua latou nonofo faatalanoa, e pei o le masani o Saitonu; o loo fifilemu, ua faatalanoa lava; ua leai foi se na te faamā ia te i latou i se mea i le nuu, se na te pule ai; sa mamao foi latou ma Saitonu, sa latou le feaveai mea ma nisi tagata.
8Ona oo lea i o latou uso i Soraa ma Esetaola. Ua fai mai o latou uso ia te i latou, Se a sa outou tala?
9Ua fai atu i latou, Tulai ia, ina tatou o ae ia te i latou, auā ua matou vaavaai i le nuu, faauta, e matuā lelei lava; tou te nofonofo ea? Aua ne‘i mumusu e o atu ia oo e fai mo outou le nuu.
10A outou o atu, ona outou oo lea i le nuu ua nonofo faatalanoa, ma le fanua lautele; auā ua foai mai ai e le Atua ia te outou le nuu e le oge i se mea e tasi i le lalolagi.
11Ona o ai lea ai lea mea nisi o le aiga o sa Tanū mai Soraa ma Esetaola, o tagata e toaono galau, ua saunia ma auupega o le taua.
12Ua o ae i latou, ma to lauapi i Kiriata-iarima i Iuta; o le mea lea na igoa ai lea mea o Maane-tanu, ua oo mai i nei ona aso; faauta, o loo i tua o Kiriata-iarima.
13Ona latou o atu lea ai lea mea i le mauga o Efaraima, ua oo atu i le fale o Mika.
14Ona fai mai lea o tagata e toalima e na o e asiasi i le nuu o Laisa, ua faapea mai i o latou uso, Ua outou iloa ea, o i ai i nei fale le efota, ma tupua, ma le tupua ua ta, ma le tupua ario; o lenei, ia filifili se mea e fai.
15Ona latou afe ai lea, ua oo i le fale o le taulealea o le sa Levī, o le fale o Mika, ua latou fealofani ma ia.
16O tagata e toaono galau ua saunia ma auupega o le taua, o le fanauga a Tanu, sa tutū i latou i le puipui o le faitotoa.
17A ua o ae tagata e toalima, e na o e asiasi i le nuu, ua latou ulu atu ai, ua ave le tupua ua ta, ma le efota, ma tupua, ma le tupua ario; a o le faitaulaga ua tu o ia i le puipui o le faitotoa ma tagata e toaono galau, e ua saunia ma auupega o le taua.
18Ua latou ulu atu i le fale o Mika, ma latou ave le tupua ua ta, ma le efota, ma tupua, ma le tupua ario; ona fai mai lea o le faitaulaga ia i latou, Se a le mea tou te faiana?
19A ua latou fai mai ia te ia, Faalologo ia, tuu lou lima i lou gutu, ma ia tatou o ma i matou, ia fai oe mo matou tamā ma faitaulaga; pe lelei ea ona fai oe ma faitaulaga; pe lelei ea ona fai oe ma faitaulaga i le aiga o le tagata e toatasi, pe fai ma faitaulaga i le itu aiga ma le aiga o Isaraelu?
20Ua fiafia ai le loto o le faitaulaga, ona ave ai lea e ia o le efota, ma tupua, ma le tupua ua ta, ua o atu faatasi ma le nuu.
21Ona toe o ai lea o i latou, ma latou savavali; ua latou tuu atu i o latou luma, o tama iti, ma manu, ma avegāmea.
22Ua mamao i latou ma le fale o Mika, ona faapotopoto lea o tagata sa i fale e tuaoi ma le fale o Mika, ua latou tulituliloa i le fanauga a Tanu.
23Ona latou valaau lea i le fanauga a Tanu, ona latou faasaga mai ai lea, ua latou fai mai ia Mika, Se a ea le mea ua e tiga ai, ina ua e faapotopotoina mai ai na tagata ia te oe?
24Ua fai mai o ia, Ua outou aveesea o‘u atua na ou faia, ma le faitaulaga ua outou o, se a sa‘u toe mea? A o le a lena ua outou fai mai ai, Se a le mea ou te tiga ai?
25Ua fai mai le fanauga a Tanu ia te ia, Aua ne‘i lagona lou leo e i matou, ne‘i oso atu ia te outou tagata lotōa, ona oti ai lea o oe ma lou aiga.
26Ona savavali lea o le fanauga a Tanu i la latou malaga. Ua iloa e Mika ua sili ona malosi i latou ia te ia, ona liliu lea o ia, ua foi atu i lona aiga.
27A o i latou, ua latou ave mea na faia e Mika, ma le faitaulaga sa ia te ia, ua latou oo atu i Laisa i le nuu filemu, ua nonofo faatalanoa lava; ua latou fasia i latou i le pelu, ma susunu le aai i le afi.
28Sa leai se na te laveai, auā e vava mamao lea ma Saitonu, sa latou le feaveai foi mea ma nisi tagata; sa i le vanu lea nuu e lata ane i Petereopo. Ua latou faia le faiaai, ma latou mau ai.
29Ua latou faaigoa le igoa o le aai o Tanu, i le igoa o Tanu lo latou tamā, na fanau ai ia Isaraelu; a e peitai o Laisa le igoa o le aai anamua.
30Ua faatuina mo i latou e le fanauga a Tanu le tupua ua ta, o Ionatana foi le atalii o Keresoma, le atalii lea o Manase, o ia ma ona atalii sa fai ma faitaulaga i latou i le itu aiga o sa Tanū, ua oo i le aso o le tafeaga o le nuu.
31Ua latou faatuina mo i latou le tupua ua ta a Mika, na ia faia, i aso uma sa i ai le malumalu o le Atua i Sailo.
Who We AreWhat We EelieveWhat We Do
2025 by iamachristian.org,Inc All rights reserved.
