1Ona valaau atu lea o Mose ia Isaraelu uma lava, ua faapea atu ia te i latou, Isaraelu e, ia e faalogo mai i tulafono ma faamasinoga ou te fai atu ai ia te outou i le aso nei, ma ia outou a‘oa‘o ai, ma tausiusi i ai ina ia faia.
2O Ieova lo tatou Atua na ia osia le feagaiga ma i tatou i Horepa.
3E le o tatou tamā na osi ai e Ieova lenei feagaiga ma i latou, a o i tatou lava, o i tatou atoa uma o ola mai iinei i le aso nei.
4Na fetalai mai Ieova ia te outou faafeagai lava i le mauga ai totonu o le afi.
5(Na ou tu i ia ona po i le va o Ieova ma outou, e faaali atu ia te outou le afioga a Ieova; auā ua outou fefefe ona o le afi, e lei o ae foi outou i le mauga;) na ia faapea mai,
6O a‘u o Ieova lou Atua, o le na aumaia oe nai le nuu o Aikupito, o le mea sa nofo pologa ai.
7Aua ne‘i e fai mo oe ni atua ese i o‘u luma.
8Aua e te fai mo oe se tupua ua ta, o se faatusa lava o se mea o i le lagi i luga, po o i le fanua i lalo, po o i le sami o i lalo o le fanua;
9aua e te ifo i ai, aua foi e te auauna i ai; auā o a‘u o Ieova lou Atua, o le Atua fuā, o lē taui atu i fanau o le amioletonu a o latou mātua, e oo i le tupulaga e tolu ma le fa o e ‘ino‘ino mai ia te au;
10a ou te alofa i afe o tupulaga o e alofa mai ia te au, ma tausi mai i a‘u poloaiga.
11Aua e te ta‘u fua le suafa o Ieova lou Atua; auā e le faasaoina e Ieova o le ta‘u fua i lona suafa.
12Ia e tausi le aso sapati ina ia faapaiaina; faapei ona poloai mai ai o Ieova lou Atua ia te oe.
13O aso e ono e te galue ai, ma fai ai au galuega uma lava;
14a o le aso fitu o le sapati lea ia Ieova lou Atua; aua e te fai ai se galuega e tasi, o oe, ma lou atalii, ma lou afafine, o lou auauna tane, ma lau auauna fafine, ma lau povi, ma lau asini, po o se tasi o au manu, ma le tagata ese o loo mau ma oe, ina ia malolo o lau auauna tane, ma lau auauna fafine pei o oe lava.
15Ia e manatua foi, na fai oe ma auauna i le nuu o Aikupito, a ua aumaia oe e Ieova lou Atua ai lea mea i le aao malosi ma le aao faaloaloa; o le mea lea ua poloai mai ai Ieova lou Atua ia te oe e te faia le aso sapati.
16Ia e ava i lou tamā ma lou tinā, pei ona poloai mai ai o Ieova lou Atua ia te oe, ina ia faalevaleva ai ou aso, ina ia manuia ai foi oe i le nuu o le a faoiina mai e Ieova lou Atua ia te oe.
17Aua e te fasioti tagata.
18Aua foi e te mulilua.
19Aua foi e te gaoi.
20Aua foi e te mōlimau pepelo i se tasi.
21Aua foi e te manao i le avā a le lua te tuaoi, aua foi e te manao i le fale o le lua te tuaoi, o lona fanua, po o lana auauna tane, po o lana auauna fafine, o lana povi, po o lana asini, po o se tasi mea a le lua te tuaoi.
22O upu lava ia na fetalai mai ai Ieova i lo outou faapotopotoga uma lava i le mauga, ai totonu o le afi, ma le ao, ma le pogisa, ua leo tele mai na ia le faaopoopo i ai se upu; ua na tusi mai ai foi i papamaa e lua, ona au mai ai lea ia te au.
23Na outou faalogologo i le leo ai totonu o le pouliuli, ua mu foi le mauga i le afi, ona faalatalata mai ai lea ia te au o outou, o matai uma o outou itu aiga, ma o outou toeaina;
24ua outou faapea mai, Faauta, ua faaalia mai ia te i matou e Ieova lo tatou Atua o lona pupula ma lona silisili ese, o lona siufofoga foi ua matou faalogologo i ai ai totonu o le afi; o le aso nei ua matou iloa ai ua fetalai mai le Atua i tagata, a e ola pea i latou.
25O lenei, se a ea le mea a matou oti ai? auā e faaumatia i matou i lena afi tele, afai matou te toe faalogologo i le siufofoga o Ieova lo tatou Atua, ona matou oti ai lea;
26auā po o ai se tasi tagata na ia faalogologo faapei o i matou i le siufofoga o le Atua soifua ua fetalai mai ai totonu o le afi, a e ola pea ia?
27Ina e faalatalata atu ia, ma ia e faalogologo i mea uma e fetalai mai ai Ieova lo tatou Atua, ma ia e ta‘u mai ia te i matou mea uma lava e fetalaia mai e Ieova lo tatou Atua ia te oe, ona matou faalogologo atu lea i ai, ma matou faia.
28Na faafofoga mai foi Ieova i a outou upu sa outou fai mai ai ia te au; ona fetalai mai lea o Ieova ia te au, Ua ou faalogo i upu a lenei nuu sa latou fai atu ai ia te oe, ua lelei upu uma lava na latou fai atu ai.
29E! ana ia i latou lena loto e matatau mai ai ia te au, ma tausiusi i a‘u poloaiga uma i aso uma lava, ina ia manuia ai i latou, atoa ma a latou fanau e faavavau.
30Alu ia, ina fai atu ia te i latou, Ia outou toe foi atu i o outou fale ie.
31A o oe, ia e tu mai iinei ia te au, ou te fai atu foi ia te oe i poloaiga uma, ma tulafono, ma faamasinoga e te a‘oa‘o atu ai ia te i latou, ia latou faia i le nuu ou te avatu ia te i latou e fai mo latou.
32Lenei la, ia outou anaana ia faia, faapei ona poloai mai ai o Ieova lo outou Atua ia te outou, aua tou te afe i le itu taumatau, po o le itu tauagavale.
33Ia outou savavali i le ala uma lava na poloai mai ai Ieova lo outou Atua ia te outou, ina ia outou ola ai, ma ia manuia ai outou, ma ia outou nofo tulu‘i ai i le nuu o le a fai mo outou.
Who We AreWhat We EelieveWhat We Do
2025 by iamachristian.org,Inc All rights reserved.
