1Ua mavae aso e tele, ona oo mai ai lea o le afioga a Ieova ia Elia i le tolu o tausaga, ua faapea mai, Ina alu ia oe, ma faaali oe ia Aapo, ou te faatotōina foi le ua i le laueleele.
2Ona alu ai lea o Elia e faaali o ia ia Aapo; sa matuā velavela le oge i Samaria.
3Na valaau foi Aapo ia Opetaia, o lē pule i lona aiga. (Sa matuā mata‘u Opetaia ia Ieova;
4auā na fasiotia e Iesepela o perofeta a Ieova, ona ave lea e Opetaia o perofeta e toaselau, ma nanā ia te i latou e taitoalimagafulu i ana, na ia fafaga foi ia te i latou i areto ma vai.)
5Ua fai atu Aapo ia Opetaia, Ina alu ia oe i le nuu i vaipuna uma, atoa foi ma alia uma; pe tatou te maua ni mutia e faaolaina ai solofanua, ma falata, ina ne‘i maumau manu uma.
6Ona vaeluaina lea e i laua o le nuu, ina ia la feoai ai; ua alu Aapo i le tasi ala na o ia, a ua alu Opetaia i le isi ala na o ia.
7Ua i ai i le ala Opetaia, faauta, ua la fetaiai ma Elia; ua iloa o ia e ia ona faapaūfao ai lea o ia, ua faapea mai, O oe ea le alii o Elia?
8Ona tali atu lea o ia, O a‘u lava lea. Alu ia oe, ma e fai atu i lou alii, Faauta, o Elia.
9Ona fai mai lea o ia, Se a ea se mea ua ou agasala ai, ina a e tuuina atu ai lau auauna i le lima o Aapo, ia fasiotia ai a‘u?
10O loo soifua Ieova lou Atua, e leai se nuu po o se malo e lei oo i ai le feau a lo‘u alii e sailiili ia te oe; a latou tali mai ai, E le i ai, ona ia fai atu lea, e tauto lea malo ma lea nuu, ua latou le maua oe.
11O lenei, ua e fetalai mai, Alu ia oe ma e fai atu i lou alii, Faauta, o Elia.
12A a‘u alu ese ia te oe, ona avea lea o oe e le Agaga o Ieova i se mea ou te le iloa; pe a ou alu, ma ta‘u atu ia Aapo, a e le maua mai oe e ia, ona fasiotia lea o a‘u e ia; a o loo mata‘u lau auauna ia Ieova talu ina ou itiiti.
13Pe na le ta‘uina atu ea i lo‘u alii le mea na ou faia ina ua fasiotia e Iesepela o perofeta a Ieova; na ou natia perofeta a Ieova, o tagata e toaselau, e taitoalimagafulu i ana, na ou fafaga foi ia te i latou i areto ma vai?
14O lenei foi, ua e fetalai mai, Alu ia oe, ma e fai atu i lou alii, Faauta, o Elia; ona fasiotia lea o a‘u e ia.
15Ona fai atu lea o Elia, O loo soifua, Ieova o ‘au, o ia ou te tu ai i ona luma, ou te faaali lava a‘u ia te ia i le aso nei.
16Ona alu ai lea o Opetaia e faafetaiai ia Aapo, ma ta‘u atu ai ia te ia; ona sau ai lea o Aapo e faafetaiai ia Elia.
17Ua iloa atu e Aapo ia Elia, ona fai atu lea o Aapo ia te ia, O oe ea o lē faatiga ia Isaraelu?
18Ona tali mai lea o ia, E le o a‘u lē faatiga ia Isaraelu, a o oe ma le aiga o lou tamā; auā ua outou tuua o poloaiga a Ieova, ma outou mulimuli atu ia Paala.
19O lenei, ina feau atu ia, ma faapotopoto mai ia te au i le mauga o Karamelu o Isaraelu uma, ma perofeta a Paala e fa selau ma le lima o sefulu, ma perofeta a Asaira e fa selau, o e aai i le laulau a Iesepela.
20Ona feauina atu lea e Aapo i le fanauga uma a Isaraelu, ua ia faapotopoto foi le au perofeta i le mauga o Karamelu.
21Ona faalatalata atu lea o Elia i le nuu uma, ua faapea atu, Pe tou te faaletonu i manatu e lua seia afea? Afai o Ieova o le Atua ia, ia outou mulimuli atu ia te ia; a e afai o Paala, ia outou mulimuli atu ia te ia. A e le tali mai le nuu ia te ia i se upu.
22Ona fai atu lea o Elia i le nuu, Ua na o a‘u ua toe i perofeta a Ieova; a o perofeta a Paala, e fa selau ma le toalimagafulu i latou.
23Ia latou au mai ia te i matou o povi e lua; ona filifilia lea e i latou se tasi povi mo i latou, ma latou pena, ma faaee ai i luga o fafie, a e aua le avane ai le afi; ou te saunia foi le tasi povi, ma faaee ai i luga o fafie, a ou te le avane ai le afi.
24Ona valaau atu lea outou i le igoa o outou atua; ou te valaau atu foi i le suafa o Ieova. O le Atua na te tali mai i le afi, o le Atua lea. Ona tali mai lea o le nuu uma, ua faapea mai, Ua lelei lau upu.
25Ona fai atu lea o Elia i perofeta a Paala, Ina filifili ia se povi mo outou, ma ia muamua ona sauni ai e outou, auā e toatele outou; ia outou valaau atu foi i le igoa o outou atua, a e aua le avane ai le afi.
26Ona latou avea lea o le povi na tuuina atu ia te i latou, ua latou saunia foi, ma latou valaau atu i le igoa o Paala, na amata i le taeao ua oo i le tutonu o le la, ua faapea atu, Paala e, ia e faafogafoga mai ia te i matou. A ua leai se leo; e leai se na tali mai. Ona latou feosofi lea i le fata faitaulaga na latou faia.
27Ua oo i le tutonu o le la, ona tauemu atu lea o Elia ia te i latou, ua ia faapea atu, Ina valaau atu ia, ia leo tele; auā o le atua ia; po ua tautala ia, po ua alu ese, po ua alu i se malaga; ai lava ua moe ia, e tatau ona fagufagu atu ia te ia.
28Ona latou valaau atu lea ua leo tele, ma latou selei ia te i latou i polo ma tui, e tusa ma la latou tu, ua oo ina faamaligiina ifo le toto ia te i latou.
29Ua mavae le tutonu o le la, ona latou perofeta ane lea ua oo i le itu la e fai ai le taulaga afiafi, a ua leai se leo, e leai se na tali mai, pe faalogo mai.
30Ona fai atu lea o Elia i le nuu uma, Ina faalatalata mai ia ia te au. Ona faalatalata atu lea o le nuu uma ia te ia, ona toe teu lea e ia o le fata faitaulaga o Ieova sa sŏloia i lalo.
31Ona ave lea e Elia o maa e sefulu ma le lua, e tusa ma le faitauina o itu aiga o atalii o Iakopo, o le na oo i ai e afioga a Ieova, na faapea, E igoa oe ia Isaraelu.
32Ona faia lea e ia i ia maa o le fata faitaulaga i le suafa o Ieova; ua faia foi e ia le utu ua soo ai le fata faitaulaga; o lona tele ua tusa ma sea e lua o fua.
33Ona faaafu lea e ia o fafie, ma pena le povi, ma faaee ai i luga o fafie; ona fai atu lea o ia, Ina faatumu mai ia o kate e fa i le vai, ma sasaa ai i luga o le taulaga mu, ma luga o fafie.
34Ua ia fai atu foi, Ina foi faalua mai ia. Ona latou foi faalua mai ai lea. Ua ia fai atu foi, Ina foi faatolu mai ia. Ona latou foi faatolu mai ai lea.
35Ua tafe le vai ua soo ai le fata faitaulaga; ua tumu foi le utu i le vai.
36Ua oo i le itu la e fai ai le taulaga afiafi, ona faalatalata atu ai lea o Elia le perofeta, ua faapea atu, Ieova e, le Atua o Aperaamo, ma Isaako, ma Isaraelu, ia faailoa i lenei aso, o oe o le Atua i Isaraelu, o a‘u foi o lau auauna, ma ua ou faia o nei mea uma e tusa ma lau afioga.
37Ia e faafofoga mai ia te au, Ieova e, ia e faafofoga mai ia te au, ina ia iloa e le nuu nei o oe o Ieova o le Atua, ma ua e faaliliuina mai o latou loto.
38Ona paū ifo lea o le afi a Ieova, ma faaumatia ai le taulaga mu, ma fafie, ma maa, ma le eleele ua mitiia ai foi le vai sa i le utu.
39Ua iloa e le nuu uma, ona faapauufao ai lea o i latou, ua faapea, O Ieova, o le Atua ia; o Ieova o le Atua ia!
40Ona fai atu lea o Elia ia te i latou, Ia outou pupue i perofeta a Paala; aua ne‘i sao atu so latou. Ona latou pupue lea ia te i latou; ua ave ifo foi e Elia ia te i latou i le alia o Kisona, ma na fasioti ia te i latou i lea mea.
41Ona fai atu lea o Elia ia Aapo, Ina maliu ae ia oe, ia e taumafa ma inu; auā o le taalili o le ua tele.
42Ona alu ae ai lea o Aapo e ‘ai ma inu; ua alu ae foi Elia i le tumutumu o Karamelu, ua ia ifo ai i le eleele, ma tuu ona mata i le va o ona tulivae.
43Ua fai atu ia i lana auauna, Ia e alu ae, ma vaavaai i tai. Ona alu ae lea o ia, ma ia vaavaai, ua faapea mai, E leai se mea. Ona fai atu lea o ia, Ina foi faafitu atu ia.
44Ua oo i lona foi faafitu, ona ia fai mai lea, Faauta, ua alu ae i le sami si ao itiiti e pei o se alofilima o se tagata. Ona fai atu lea o ia, Ina alu ae ia, ma e fai atu ia Aapo, Ina sauni ia lou nofoa faataavalevale, ma e maliu ifo, ne‘i taofia oe i le uaga.
45O loo fai foi ia mea, ua faamalumalu ifo le lagi i ao ma le savili; ua tele lava le timu. Ua tietie Aapo i le nofoa faataavalevale, ma alu i Isereelu.
46Sa ia Elia le aao o Ieova; ona fusi ai lea o ia i lona sulugatiti, ma tamoe i luma o Aapo, ua oo i le mea e ui atu ai i Isereelu.
Who We AreWhat We EelieveWhat We Do
2025 by iamachristian.org,Inc All rights reserved.
