1O le afioga na fetalai mai ai Ieova ia Papelonia ma le nuu o Kaletaia, na aumaia e le perofeta o Ieremia.
2Ina ta‘u atu ia outou i atu nuu, ma faailoa atu ai; sii i luga foi le tagavai; ina faailoa atu ia, aua le natia; ia outou faapea atu, Ua aea Papelonia, ua faamaina Pele, ua matautuia Merota; ua faamaina ona tupua, ua matautuia ana tupua.
3Auā e alu ae e tau ma ia le nuu ai le itu i matu, o le na te faia lona laueleele ma faatafunaga, e leai foi se nofo ai; ua sosola tagata atoa ma manu, ua latou ō.
4O na ona po, ma lena tausaga, ua fetalai mai Ieova, e o mai ai le fanauga a Isaraelu, o i latou ma le fanauga a Iuta faatasi, latou te fetagisi fano mai; latou te o ane, ma saili ia Ieova lo latou Atua.
5Latou te fesili i le ala i Siona, o faasaga mai iinei o latou mata, ua faapea, Ina o mai ia, se‘i faatasi atu i tatou ia Ieova i le feagaiga e faavavau, e le galo lava.
6O lo‘u nuu ua se lafu mamoe ua sē i latou; ua faaseseina i latou e o latou leoleo, ma latou faaliliuina i latou i le atu mauga; ua latou feoai i lea mauga ma lea mauga, ua galo ia i latou le mea sa latou taooto ai.
7O i latou uma na maua i latou, ua latou ‘aina i latou; na fai ane foi o e na saua mai ia te i latou, Matou te le nofo sala, auā ua latou agasala ia Ieova, o le mea e mau ai lē amiotonu, o Ieova, o le faamoemoe o latou tamā.
8Ina sosola ia ai totonu o Papelonia, ma o atu ai nai le laueleele o Kaletaia; ia outou faapei o ‘oti poa i luma o le lafu.
9Auā faauta, ou te faaosoina, ma aveina ae le faapotopotoga o atu nuu tetele mai le nuu i le itu i matu, e tau ma Papelonia; latou te sauniuni e tau ma ia; e aea foi o ia ai lena mea; o a latou u fanafana e pei o u fanafana a le toa poto; ua le foi fua mai.
10E fai foi Kaletaia ma vete; e malilie atoa uma o e vetea o ia, ua fetalai mai ai Ieova.
11Auā na outou fiafia, auā na outou olioli, o outou na vetea lo‘u tofi; auā ua outou osooso e pei o le povi fafine i le vao, ma outou tagi e pei o solofanua malolosi;
12e matuā ma lo outou tinā; e masiasi lava le na fanauina outou; faauta, e fai le nuu aupito mulimuli ma vao lafulafua ma nuu naumati, ma toafa.
13E le āina ia ona o le toasa o Ieova, a e faatafunaina uma lava; o i latou uma o e ui ane i Papelonia e taitasi ma ofo, ma uisa i ona mala uma.
14Ina sauniuni ia outou e tau ma Papelonia i ona itu uma; o outou uma o e lolo‘u aufana, ina fanafana atu ia ia te ia, aua ne‘i tuu ni u fanafana; auā ua na agasala ia Ieova.
15Ia outou alalaga ia te ia i ona itu uma; ua na tuuina mai lona lima; ua pauu ona faavae, ua sŏloia ona pa; auā o le taui ma sui lenei a Ioeva; ia outou taui atu ia te ia; e pei ona faia e ia, ia faapea ona outou faia ia te ia.
16Ia vavaeeseina i Papelonia lē lulu saito, atoa foi ma lē tago i le selesaito, i ona po o le seleselega; latou te taitasi ma liliu i lona lava nuu, latou te taitasi foi ma sola i lona lava laueleele, ai luma o le pelu saua.
17O Isaraelu o le lafu mamoe o ia ua faataapeapeina; ua tulia o ia e leona; o lē na muai ‘ai ia te ia, o le tupu o Asuria lea; a o lē mulimuli, o lenei tupu o Papelonia o Nepukanesa lea, ua pagugu e ia ona ivi.
18O le mea lea o loo faapea ona fetalai mai ai o Ieova o ‘au, le Atua o Isaraelu, Faauta, ou te taui atu i le tupu o Papelonia ma lona nuu, e pei ona ou taui atu i le tupu o Asuria.
19Ou te faafoisia Isaraelu i le mea na ia mau ai; e ‘ai o ia i Karamelu ma Vasana, e ma‘ona foi o ia i le mauga o Efaraima ma Kiliata.
20O na ona po, ma lena tausaga, ua fetalai mai Ieova e sailia ai le amioletonu a Isaraelu, a e leai; e sailia foi agasala a Iuta, a e le maua; auā ou te faamagaloina atu ia te i latou o e ua faatotoeina e a‘u.
21Ina alu ae ia i le nuu o Merataimo e tau ma ia, ma e o nonofo i Pekota; ia e faatafunaina ma matuā faaumatia o mulimuli atu ia te i latou, ua fetalai mai ai Ieova; ia e faia foi i ai e tusa ma mea uma na ou fai atu ai ia te oe.
22O loo i le nuu le vāvāō o le taua, ma le olopalaina e tele.
23E! ua gauia ma nutililiia le samala o le lalolagi uma. E! ua avea Papelonia ma mea e ofo ai i atu nuu.
24Papelonia e, ua ou tuu le mailei mo oe, ua maua ai oe, a ua e le iloa; ua maua oe, ua puea foi, auā na e sii le taua ia Ieova.
25Ua tatalaina e Ieova lana mea e teu ai auupega, ua na au mai ai auupega o lona toasa; auā o le galuega lena ua i le Alii o Ieova o ‘au i le nuu o Kaletaia.
26Ina o mai ia ia te ia ai mea aupito mamao, ina tatalaina ia ona fale e tuu ai mea e ‘ai; ia outou faafaupue ia te ia ia pei o faupuegāsaito, ma matuā faaumatia o ia; aua ne‘i ai se mea e totoe ia te ia.
27Ina faaumatia ia o ana povi poa taanoa uma, ia latou o ifo ia fasia; oi talofa ia te i latou! auā ua oo mai lo latou aso, o ona po e tauia ai i latou.
28O le alaga o e ua sosola ma ua sao ai le nuu o Papelonia, e ta‘u atu i Siona le taui ma sui a Ieova lo tatou Atua, o le taui ma sui ona o lona malumalu.
29Ia faalaei ‘au i e fanafana u e tau ma Papelonia, o i latou uma o e lolo‘u le aufana; ia outou to lauapi e vagavagai ia te ia, aua ne‘i ai sē sao; ia outou taui atu ia te ia e tusa ma ana galuega; e pei o mea uma na ia faia, ia faapea ona outou faia ia te ia; auā ua faamaualuga o ia ia Ieova, le Paia o Isaraelu.
30O le mea lea e pauu ai o ona taulelea i ona malae, e fano foi i lea lava aso ona tagata tau uma, ua fetalai mai ai Ieova.
31O oe na le ua faamaualuga, faauta, ou te faia oe mo‘u fili, ua fetalai mai ai le Alii, o Ieova o ‘au; auā ua oo mai lou aso, o ona po ou te taui atu ai ia te oe.
32E tausuai ma paū le ua faamaualuga, e leai foi se na te faatulai ia te ia; ou te faamuina le afi i ona aai, e susunuina ai ona itu uma.
33O loo faapea ona fetalai mai o Ieova o ‘au, Na sauaina faatasi le fanauga a Isaraelu ma le fanauga a Iuta; o i latou uma e na avea i latou o tagata o taua na latou taofi mau ia te i latou; ua latou le mafafai ona tuuina i latou ia ō.
34E malosi le na te togiolaina i latou, o Ieova o ‘au o lona suafa lea; e matuā faia e ia la latou finauga, ina ia faanofofilemuina e ia le lalolagi, ia faagateteina foi e o nonofo i Papelonia.
35Ua fetalai mai Ieova, E oo le pelu ia Kaletaia, ma ē nonofo i Papelonia, ma ona alii, ma ona tagata popoto.
36O le pelu i e pepelo, e faavālea foi i latou; o le pelu i ona toa, e matatau ai foi i latou.
37O le pelu i ana solofanua, ma ona kariota, ma tagata eseese uma ua i totonu ia te ia; e avea foi i latou ma fafine; o le pelu i ana oloa, e vetea foi ia.
38E oo le vevela i lona vai, ona mate ai lea; auā o le nuu lava lea o tupua ua ta, ua latou mitamita vale foi i mea matautia.
39O le mea lea e nonofo ai manu feai o le vao, faatasi ma aie, e mau ai foi iaena; e le toe āina e faavavau; e le mau ai lava se tasi i lea tupulaga ma lea tupulaga.
40E pei o le faaumatia e le Atua o Sotoma ma Komoro, ma e na latou tuaoi, o loo fetalai mai ai Ieova, e le nofo ai se tasi, e le mau ai foi se atalii o se tagata.
41Faauta, e o mai le nuu ai le itu i matu, o le nuu tele; e faaosoina foi tupu e toatele ai tuluiga o le lalolagi.
42Latou te ‘u‘u le aufana ma le tao; ua saua i latou, ma latou le alolofa; e taalili o latou leo e pei o le sami, ua latou tietie i solofanua, o sauniuni e pei o tagata e ō i le taua, ina ia tau ma oe, le tama fafine Papelonia.
43Ua faalogo le tupu o Papelonia i le tala ia te i latou, ona vaivai ai lea o ona lima; ua maua foi o ia i le puapuaga, o le tiga foi e pei o se fafine o le a fanau.
44Faauta, e alu ae o ia e pei o le leona ai le matagofie o Ioritana, i le mea malosi e mau ai; a e ou te faaoso ia te i latou ia faavave ona o ese ia te ia, e pei o le emo o le mata; o ai foi le tagata filifilia ou te tofia e tau ma ia? auā po o ai ea e tusa ma a‘u? o ai foi e atofa ni aso ia te au? o ai foi lena leoleo mamoe e mafai ona tu i o‘u luma?
45O le mea lea ia outou faalogologo mai ai i le pule a Ieova ua ia pule ai ia Papelonia, ma ona mafaufauga ua ia mafaufau ai ia leaga ai le nuu o Kaletaia, E moni, e tosina i latou e le aupito itiiti o le lafu mamoe; e moni, na te faatafunaina i o latou luga le mea e mau ai.
46O le taalili ina ua maua Papelonia, ua luluina ai le lalolagi, ua lagona foi le alaga i nuu ese.
Who We AreWhat We EelieveWhat We Do
2025 by iamachristian.org,Inc All rights reserved.
