1E fitu tausaga o Ioasa ina o fai o ia ma tupu; ua fai foi o ia ma tupu i Ierusalema i tausaga e fa sefulu. O le igoa o lona tinā foi o Sevi o le Peresepa.
2Ua faia foi e Ioasa le amiotonu i luma o Ieova i aso uma o Ieoiata le faitaulaga.
3Ua aumaia e Ieoiata o avā e toalua mā ia. Na fanaua foi ona atalii ma ona afafine.
4Ua mavae ia mea, ona loto lea o Ioasa e toe teuteu le fale o Ieova.
5Ona faapotopotoina lea e ia o le au faitaulaga ma sa Levī, ua faapea atu ia te i latou, O atu ia outou i aai o Iuta, ma faaputu tupe mai ia Isaraelu uma e toe teuteu a‘i le fale o lo outou Atua i lea tausaga ma lea tausaga, ia faavave foi e outou lenei mea. A ua le faavaveina lava e sa Levī.
6Ona aami lea e le tupu o Ieoiata, o le ua sili, ma na faapea atu ia te ia, Se a le mea ua e le fai atu ai i sa Levī e au mai mai Iuta ma Ierusalema le taulaga, e tusa ma le poloaiga a Mose le auauna a Ieova, ma le faapotopotoga o Isaraelu, mo le fale fetafai o le tulafono.
7Auā na sofaia le fale o le Atua e tama tane a Atalia, le fafine amio leaga; ma latou avatu foi ia Paala mea faapaiaina uma o le fale o Ieova.
8Ua fai atu foi le tupu, ona latou faia lea o le atolaau, ma tuu ai i fafo i le faitotoa o le fale o Ieova.
9Ona latou tala‘i atu ai lea i Iuta ma Ierusalema e au mai ia Ieova le taulaga na poloai mai ai Mose le auauna a le Atua ia Isaraelu i le vao.
10Ona fiafia lea o alii uma ma le nuu uma, ua latou au mai a latou taulaga, ma lafo i le atolaau, ua oo ina atoa.
11O le aso na au mai ai le atolaau, e sa Levī i e leoleo mea a le tupu, ma ua latou iloa e tele tupe, ona o mai lea o le tusi upu a le tupu, ma le auauna a le faitaulaga sili e sasaa le atolaau, ma toe ave i le mea na tuu ai. Sa faapea ona faia e i latou i lea aso ma lea aso, ma latou faaputu ai tupe e tele.
12Ona avatu ai lea e le tupu ma Ieoiata i e na galulue i le faiga o le galuega o le fale o Ieova, ma totogi ai i e talai maa, ma tufuga, e toe teuteu ai le fale o Ieova, ma e faigaluega foi i uamea, ma ‘apa memea, e toe teuteu ai le fale o Ieova.
13Ua galulue le au faigaluega, ua uma ona fai e i latou le galuega, ua latou toe faia le fale o le Atua pei o ona tuga tuai, ma ua latou faamalosia.
14Ua uma a latou galuega, ona latou aumaia lea o tupe na totoe i luma o le tupu ma Ieoiata, ona latou fai a‘i lea o ipu mo le fale o Ieova, o ipu e auauna a‘i, ma osi taulaga a‘i, ma ipu e asu a‘i, o ipu auro foi ma ipu ario. Ona latou fai ai lea o taulaga mu i le fale o Ieova e le aunoa i aso uma o Ieoiata.
15Ua toeaina lava Ieoiata, ma ua tuu tulu‘i lona ola, ona oti lea o ia. E tasi le selau ma le tolugafulu ona tausaga ina ua oti o ia.
16Ua latou tanumia o ia i le aai a Tavita faatasi ma tupu, auā na ia faia le mea lelei ia Isaraelu i le Atua, atoa ma lona fale.
17Ua mavae le oti o Ieoiata, ona o mai lea o alii o Iuta, ma latou ifo i le tupu. Ona faalogo ai lea o le tupu ia te i latou.
18Ua tuua e i latou le fale o Ieova le Atua o latou tamā, ma latou auauna i tupua o Asaira, ma isi tupua. Ona oo mai ai lea o le toasa ia Iuta ma Ierusalema, ona o la latou agasala lea.
19Ua aauina atu foi e ia o perofeta ia te i latou e toe faafoisia mai i latou ia Ieova; ma ua latou aoai atu ia te i latou; a ua le faalogo mai lava i latou.
20Ona oo mai lea o le Agaga o le Atua ia Sakaria le atalii o Ieoiata le faitaulaga, ua tu foi o ia i luga o le nuu, ma fai atu ia te i latou. O loo faapea ona fetalai mai o le Atua, Se a le mea tou te soli ai poloaiga a Ieova, e le manuia ai outou? Ua tuua e outou o Ieova, o le mea lea ua tuua ai outou e ia.
21Ona foua lea o ia e i latou, ma latou fetogi ia te ia i maa i le lotoā o le fale o Ieova, ina ua fai atu ai le tupu.
22Ua le manatua e le tupu o Ioasa le alofa o Ieoiata lona tamā ia te ia, a ua ia fasiotia lona atalii. Ua fai mai foi o ia ina a oti, E silasila mai le Atua, mana tauia.
23Ua uma le tausaga, ona o ae lea o ‘au a Suria e tau ma ia; na latou o mai i Iuta ma Ierusalema, ma faaumatia alii o le nuu ai le nuu, ma ua avatua i le tupu o Tamaseko a latou mea uma na vetea.
24Auā na o mai ‘au a Suria e toaitiiti tagata, a ua tuuina atu e Ieova o ‘au e matuā tele lava i o latou lima, auā ua latou tuua Ieova le Atua o latou tamā. Ua latou faaoo le sala ia Ioasa.
25Ua latou o ese ia te ia (auā ua tele ona ma‘i ina ua tuua o ia e i latou), ona foua lea o ia e ana auauna ona o le toto o atalii o Ieoiata le faitaulaga, ma latou fasioti ia to ia i lona moega, ona oti ai lea o ia; ua latou tanumia foi o ia i le aai a Tavita, a ua latou le tanua o ia i tuugamau o tupu.
26O i laua nei na foua o ia; o Sapata o le tama tane a Semea o le Amoni; ma Iosapa le tama tane a Someri o le Moapi.
27O le tala foi i ona atalii, ma le tele o avega na faaee ia te ia, ma le faavaeina o le fale o le Atua, faauta, ua tusia i le tala o i le tusi i tupu. Ona soloai ane lea o Amasia lona atalii e fai ma tupu.
Who We AreWhat We EelieveWhat We Do
2025 by iamachristian.org,Inc All rights reserved.
