1Ua faalogo Ietero, o le ositaulaga a Mitiana, o le tamā foi o le avā a Mose, i mea uma ua faia e le Atua ia Mose ma Isaraelu lona nuu, ina ua aumaia e Ieova o Isaraelu nai
2Aikupito; ona ave lea e Ietero le tamā o le avā a Mose, o Sepora le avā, a Mose, auā na ia muai faafoi atu ia te ia,
3ma ana tama tane e toalua, o le igoa o le tasi o Keresoma, auā ua faapea ana, Ua ou āumau i le nuu ese;
4o le igoa foi o le tasi o Elisara, auā (sa faapea a ia,) O le Atua o lo‘u tamā, o lo‘u fesoasoani lea, na ia laveai mai ia te au le pelu a Farao.
5Ua o ane foi Ietero, le tamā o le avā a Mose, ma ona atalii, ma lava avā ia Mose i le vao, i le mea ua ia to ai le lauapi i le mauga o le Atua.
6Ua ia fai atu foi ia Mose, O a‘u o Ietero le tamā o lau avā, ua matou o mai ia te oe, o a‘u, atoa ma lau avā, ma ana tama tane e toalua ma ia.
7Ona alu atu lea o Mose e faafetaiai i le tamā o lana avā, ua ifo i ai, ua la feasogi foi ma ia; ua la fealofani ona o ane lea i le fale ie.
8Ona talatala atu lea e Mose i le tamā o lana avā o mea uma lava na faia e Ieova ia Farao ma Aikupito, ona o Isaraelu, ma lo latou tiga uma lava i le ala, o Ieova foi ua laveai ia i latou.
9Ona olioli lea o Ietero i mea lelei uma lava ua faia e Ieova ia Isaraelu, ina ua laveai mai ia i latou nai lima o Aikupito.
10Ua faapea ane foi Ietero, Faafetai lava ia Ieova, o le ua laveai mai ia te outou nai lima o Aikupito ma le lima o Farao, o le ua laveaiina le nuu nai lima o Aikupito.
11O lenei, ua ou iloa e silisili lava Ieova i atua uma lava; auā o le mea na latou faamaualuga ai, na ia manumalo ai ia i latou.
12Ua faia foi e Ietero, le tamā o le avā a Mose, le taulaga mu ma taulaga i le Atua; ona o ane ai lea o Arona ma toeaina uma lava o Isaraelu, latou te aai faatasi ma le tamā o le avā a Mose i luma o le Atua.
13Ua oo foi i le taeao, ona nofo lea o Mose e faamasino i le nuu; ua laulaututū foi le nuu i luma o Mose, e afua mai i le taeao ua oo i le afiafi.
14Ua iloa foi e le tamā o le avā a Mose, mea uma na ia faia i le nuu, ona fai mai ai lea o ia, Se a lava lenei mea o loo e faia i le nuu? O le a le mea ua e nofo toatasi ai, a o laulaututū mai o le nuu uma i ou luma, e afua mai i le taeao, ua oo lava i le afiafi?
15Ua tali atu foi Mose i le tamā o lana avā, Auā o le nuu e o mai i latou ai te au, latou te saili i le Atua.
16Ai se mea ia te i latou, latou te o mai ia te au; ou te faamasino i le tasi ma le tasi, ma ou faailoa atu i ai o faatonuga a le Atua ma ana tulafono.
17Ona fai mai lea o le tamā o le avā a Mose ia te ia, E le lelei le mea o loo e faia.
18O lea matuā tigaina oe atoa ma lenei nuu o loo ia te oe; auā e mafatia oe i lenei mea, e te le lavā ona e faia toatasi.
19O lenei, ia e faalogo mai ia te au, ou te faatonu atu ia te oe, ona ia te oe lea o le Atua; ia fai oe ma tautuu upu mo le nuu i luma o le Atua, ina ia e taulogologoina mea i le Atua.
20Ia e faamalamalama atu foi ia te i latou i faatonuga ma tulafono, ma faailo atu ia i latou le ala latou te savavali ai, ma mea e fai, latou te faia.
21Ia e filifili foi ai le nuu atoa ni tagata o loto tetele, o e matatau i le Atua, o tagata faamaoni, ma e ‘ino‘ino i le manumanu; ma ia e tofia i latou e pule ia i latou, e fai ma alii o taitoaafe, ma alii o taitoaselau, ma alii o taitoalimagafulu, ma alii o taitoatinoagafulu;
22ma ia latou faamasino atu i le nuu i aso uma lava; o mea tetele uma lava e au mai ia ia te oe, a o mea iti uma ia latou faamasinoina; ona faamāmā ai lea ia te oe, latou te fesoasoani foi ia te oe.
23Afai e te faia lena mea, a fetalai mai foi le Atua ia te oe faapena, ona e lavā tamau lea; o lenei nuu uma foi, latou te maua atu le mea latou te nonofo ai ma le manuia.
24Ua faalogo Mose i le tamā o lana avā, ua ia faia foi o mea uma lava na ia fai mai ai.
25Ona filifili lea e Mose o tagata loto tetele, mai Isaraelu uma, ua ia tuuina atu i latou e pule i le nuu, o alii o taitoaafe, ma alii o taitoaselau, ma alii o taitoalimagafulu, ma alii o taitoatinoagafulu.
26Ua latou faamasino atu foi i le nuu i aso uma lava; o mea faigata ua latou avane ia Mose, a o mea māmā uma, ma latou faamasinoina e i latou.
27Ona tuuina atu lea e Mose le tamā o lana avā e alu; ona alu atu lea o ia i lona lava nuu.
Who We AreWhat We EelieveWhat We Do
2025 by iamachristian.org,Inc All rights reserved.
