1-2Faauta, ua iloa e o‘u mata nei mea uma, ua faalogo ai o‘u taliga ma lagona ai. O mea ua iloa e outou, ou te iloa foi a‘u; ou te le faatauvaa a‘u ia te outou.
3A e peitai a‘u, ou te fia tautala i Le e ona le malosi uma lava, ou te loto lava ina ia ma filifili ma le Atua.
4Auā ua outou fatu fua lava tala pepelo, o fomai le aoga lava outou uma.
5E! A na matuā faalologo outou, po ua avea lea ma poto ia te outou.
6Ia outou faalogologo mai lava i la‘u faatonu atu, ina liliu mai o outou taliga i a‘u finauga.
7Tou te tautala ea ma le le tonu mo le Atua? Tou te tautala faa‘ole‘ole ea mo ia?
8Tou te faailogaina ea o ia? Tou te finau ea mo le Atua?
9Pe lelei ea ina ia suesue mai o ia ia te outou? Pe tou te pelogia ea o ia, e pei ona pelogia o le tagata e le tasi?
10E matuā aoai o ia ia te outou, pe a outou faailogaina faalilolilo nisi.
11Pe le faamatautia ea outou i lona silisili? Pe le oo atu ea lona matautia ia te outou?
12O a outou upu faamanatu o faatusa lefulefu ia, o outou ‘olo o ‘olo omea ia.
13Soia tou te tautala ia te au, so‘u tautala atu a‘u, ona faitalia lea se mea e oo mai ia te au.
14Faitalia se mea e oo mai ou te u lo‘u tino i o‘u nifo, ma ou tuu lo‘u ola i lo‘u lima.
15E ui lava ina fasioti o ia ia te au, ou te faamoemoe pea ia te ia; a e peitai ou te faatonu atu o‘u ala i ona luma.
16E fai lava o ia mo‘u faaolataga; auā e le alu atu se tagata faalematau i ona luma.
17Ina matuā faalogologo mai ia i la‘u upu ma la‘u faamatalaga i o outou taliga.
18Faauta mai ea, ua ou sauni i le faamasinoga; ua ou iloa, e ta‘uamiotonuina lava a‘u.
19Po o ai ea o ia ma te fefinauai? Auā o le a ou faalologo nei, ma ou oti.
20Tau o mea e lua aua e te faia ia te au, ona ou le lafi ai lea i ou luma.
21Ia mamao lou aao ia te au, aua foi ne‘i faafefe ia te au i lou matautia.
22I le ia e valaau mai, ona ou tali atu ai lea; po ou te tauala atu, ona e tali mai ai lea ia te au.
23E fia ea a‘u amio leaga ma a‘u agasala? Ina faailoa mai ia ia te au lo‘u solitulafono ma la‘u agasala.
24Se a ea le mea ua ‘alo ai ou fofoga ma e faia a‘u mou fili?
25E te faamatau ea le laumea ua lelea? Ma e tuliloaina ea tagutugutu o saito ua mamago?
26Auā ua e tusi mai mea mamafa ia te au; ua e faia foi mo‘u tofi o agasala na ou faia ina ou taulealea.
27Ua e tuu foi o‘u vae i laau faamau, ua e lamalama foi i o‘u ala uma; ua e puipuia o‘u alofivae.
28E palagia lava o ia e pei o le mea ua pala, e pei o se ofu ua atia e le mogamoga.
Who We AreWhat We EelieveWhat We Do
2025 by iamachristian.org,Inc All rights reserved.
