1O oe foi le atalii o le tagata ia e avane mā oe se polo maai, ia e avane mā oe se tafi a le sala ‘ava, ma tafi a‘i lou ulu ma lau ‘ava; ia avane foi mā oe se fua faatautau e fua a‘i, ma e vaevae ai.
2O lona tolu o vaega e te sunua i le afi i le aai pe a atoa aso e vagai ai; e te ave foi le tasi ona vaega, ma tipitipisoloina i le polo; o le isi ona tolu o vaega e te faataapeapeina i le matagi; ou te to ae foi le pelu e mulimuli atu i ai.
3E te au mai ai foi ni nai lauulu itiiti, ma e fusi ai i lou pito ofu.
4E te toe au mai ai foi nisi, ma lafo i le afi, ma e susunuina i le afi; e alu atu ai le afi i le aiga uma o Isaraelu.
5Ua faapea ona fetalai mai o le Alii o Ieova, O Ierusalema lena ua ou tuuina o ia i totonu o nuu ese, ma nuu o vagavagaia o ia.
6Ua fouvale o ia i a‘u faamasinoga, ua sili ona amio leaga i nuu ese. Ua fouvale foi i a‘u tulafono e sili i nuu ua vagavagaia o ia; auā ua latou ‘ino‘ino i a‘u faamasinoga, ma latou le savavali i a‘u tulafono.
7O le mea lea o loo faapea ona fetalai mai ai o le Alii o Ieova, Ona ua sili o lo outou faanunununu i nuu ua vagavagaia outou, ma ua outou le savavali i a‘u tulafono, ma ua le faia a‘u faamasinoga, ma ua le fai e tusa ma tu a nuu ua vagavagaia outou;
8o le mea lea o loo faapea ona fetalai mai ai o le Alii o Ieova, Faauta o a‘u, o a‘u lava, ou te faasaga atu ia te oe, ma ou faaoo atu sala ia te oe i luma o nuu ese.
9Ou te faia foi ia te oe se mea ou te lei faia, ou te le toe faia foi se mea faapea, ona o au mea uma e inosia.
10O le mea lea e ‘aina ai e tamā o latou atalii i totonu ia te oe, e ‘aina foi e atalii o latou tamā; ou te faaooina foi sala ia te oe, ou te faataapeapeina foi i matamatagi uma e o totoe uma o ia te oe.
11O le mea lea o loo fetalai mai ai le Alii o Ieova, O loo ola a‘u, e moni, ona ua leaga ia te oe lo‘u malumalu i au mea leaga uma, ma au mea e inosia uma, o a‘u foi ou te faatoaitiitiina oe, ou te le faasao, ou te le faapelepeleina lava.
12E oti lona tolu o vaega o ia te oe i le faamai, e faaumatia foi i le oge i latou i totonu ia te oe; e fasia foi le tasi vaega i le pelu i mea uma e siosioina ai oe; ou te faataapeapeina le isi ona tolu o vaega i matāmatagi uma, ou te to ae foi le pelu e mulimuli atu ia te i latou.
13Ou te faauma atu lo‘u ita, e tumau foi lo‘u tiga tele ia te i latou, ona to‘a filemu ai lea o a‘u; ona iloa ai lea o i latou, o a‘u o Ieova na ou fai atu i lo‘u fuā ina ua ou faauma atu lo‘u ita tele ia te i latou.
14Ou te faia foi oe ma mea ua faatafunaina ma luma i nuu ese e vagavagaia oe, i luma o i latou uma o e ui ane ai.
15E fai foi oe ma luma, ma upu faifai, ma faaa‘oa‘o, ma mea e ofo ai i nuu ese e vagavagaia oe, ina ua ou faaooina sala ia te oe i lo‘u ita ma lo‘u tiga, ma aoaiga e matuā ogo lava. O a‘u o Ieova o lē fai atu ai.
16Pe a ou fana atu ia te i latou i a‘u u fanafana, o le oge e malaia ai i latou, e fano ai i latou, ou te faaooina atu ai foi e fano ai outou; ou te faateleina le oge ia te outou, ma ou gausia le tootoo o la outou mea e ‘ai.
17Ou te faaoo atu foi ia te outou le oge ma manu feai, e aufanaua ai oe, e ui atu ia te oe le faamai ma le toto; ou te faaoo atu foi le pelu ia te oe. O a‘u o Ieova o lē fai atu ai.
Who We AreWhat We EelieveWhat We Do
2025 by iamachristian.org,Inc All rights reserved.
