1O le tasi tagata o Ramata-sofimo i le mauga o Efaraima, o lona igoa o Elekana le atalii o Ieroama, o le atalii ia o Eliu, o le atalii ia o To‘u, o le atalii ia o Sufi, o le sa Efaratā.
2Sa nonofo ana avā e toalua, o Hana le igoa o le tasi, o Penina le igoa o le tasi; sa ia Penina le fanau, a e leai se fanau a Hana.
3Na alu ae lea tagata nai lana aai i lea tausaga ma lea tausaga e tapuai, ma fai taulaga i Sailo ia Ieova o ‘au; sa i lea mea foi atalii e toalua o Eli, o Hofeni ma Fineaso, o faitaulaga a Ieova.
4A oo foi i le aso e fai ai le taulaga a Elekana, ona avatu lea e ia o tufaaga ia Penina lana avā, ma ana tama tane uma, atoa ma ana tama teine.
5A ua avatu ia Hana lea le tufaaga e tusa ma tufaaga e lua, auā ua ia alofa ia Hana; a o le pule a Ieova na le fanau ai o ia.
6Ua faalili foi ia te ia le na ita mai, ua faaonoono foi ia te ia ina seia ita, auā na le fanau o ia o le pule a Ieova.
7Ua faapea ona fai e Elekana i lea tausaga ma lea tausaga i le alu ae o le fafine i le fale o Ieova; ua faapea ona faalili ia te ia, ona tagi ai lea o ia, ma ua le ‘ai.
8Ona fai atu lea o Elekana lana tane ia te ia, Hana e, se a le mea e te tagi ai? Se a foi le mea e te le ‘ai ai? Se a foi le mea e tiga ai lou loto? E le ua sili ea ona lelei o a‘u ia te oe i tama tane e toatinoagafulu?
9Ua uma ona ‘ai, ua uma foi ona inu i Sailo, ona tulai lea o Hana; sa nofo foi Eli le faitaulaga i le nofoa i le pou o le faitotoa o le malumalu o Ieova.
10A o le fafine, ua tiga lona loto, ua ole atu ia Ieova, ma ua tagi tele.
11Ua ia tauto foi, ua faapea atu, Ieova o ‘au e, afai e te silasila mai i le puapuaga o lau auauna fafine, ma e manatu mai ia te au, a e le faagalogalo mai i lau auauna fafine, ma e foai mai i lau auauna fafine se tama tane, ona ou foai atu lea o ia ia Ieova i aso uma o lona ola; e le oo foi se tafi i lona ulu.
12Ua faatele lana tatalo i luma o Ieova, a ua vaai atu Eli i lona gutu.
13A o Hana, ua tautala lava ia i lona loto, ua na ona memu ona laugutu, a e le logona lona leo, fā Eli ua onā o ia.
14Ona fai mai lea o Eli ia te ia, E te onā seia afea? Ia te‘a lou onā i le uaina.
15Ua tali atu Hana, ua faapea atu ia te ia, Le alii e, e leai; o a‘u o le fafine ua tiga le loto, ou te lei inu i se uaina po o se ‘ava, a ua ou momoli atu lo‘u loto ia Ieova.
16Aua e te ta‘ufaatasia lau auauna ma fafine ulavavale; auā o le tele o lo‘u mafaufau ma lo‘u tiga ua ou tautala ai ua oo i lenei itu aso.
17Ona tali mai ai lea o Eli, ua faapea mai, Alu ia oe ma le manuia; ia foai mai foi e le Atua o Isaraelu le mea na e faatoga atu ai ia te ia.
18Ua fai atu ia, Ia alofaina lau auauna fafine e oe. Ona alu ai lava lea o le fafine, ua ‘ai o ia ua le toe mata faanoanoa.
19Ua latou tutū i le taeao lava, ma latou tapuai i luma o Ieova; ona latou foi atu lea, ua oo i lo latou fale i Rama. Na iloa Elekana ia Hana lana avā, ua manatu foi Ieova ia te ia.
20Ua oo i ona aso na to ai Hana, ua fanau mai le tama tane; ua ia faaigoa ia te ia, o Samuelu; ua faapea ia, Auā na ou faatoga ia Ieova mo ia.
21Ua alu ae le tagata lea o Elekana ma lona aiga uma e fai le taulaga ia Ieova, o le taulaga e fai i tausaga, ma le mea na ia tauto ai.
22A ua le alu ae Hana, auā na ia fai atu i lana tane, Seia te‘a le tama ma le susu, ona ou molia ai lea o ia, ia iloa o ia i luma o Ieova, ma ia nofo ai pea lava.
23Ona fai mai lea o Elekana lana tane ia te ia, Ia e faia le mea e te loto i ai; ina nofo ia, seia te‘a o ia ma le susu; tau lava ina ia faataunuuina e Ieova lana afioga. Ona faamuli ai lea o le fafine, ma faasusu i lana tama seia te‘a o ia ma le susu.
24Ua te‘a o ia ma le susu, ona la o ae lea ma ia, ua ave foi povi poa taanoa e tolu, ma le efa e tasi o falaoa, ma le fagu pa‘u o uaina, ua momoli atu ia te ia i le fale o Ieova i Sailo; ua itiiti lava le tama.
25Ua latou fasi le tasi povi, ona avatu ai lea o le tama ia Eli.
26Ua fai atu foi Hana ia te ia, Le alii e, ua soifua oe le alii e, o a‘u lava le fafine sa ta iinei ma oe; sa ou faatoga atu ai ia Ieova;
27o le tama nei na ou tatalo atu ai; ua foai mai e Ieova ia te au le mea na ou faatoga atu ai ia te ia.
28O a‘u foi ua ou tuuina atu o ia ia Ieova; ua tuuina atu o ia ia Ieova i aso uma e ola ai o ia; ona ifo ai lea o ia ia Ieova i lea mea.
Who We AreWhat We EelieveWhat We Do
2025 by iamachristian.org,Inc All rights reserved.
