1Ua oti Samuelu, ona faapotopoto ai lea o Isaraelu uma, ua latou taufaiagitu‘i ia te ia, ma tanu ia te ia i lona fale i Rama. Ua tulai Tavita, ma alu ifo i le vao o Parana.
2Sa i ai le tasi tagata i Meona, o ana mea foi sa i Karamelu; ua tagata ola lava ia, sa ia te ia o mamoe e tolu gaafe, ma ‘oti e tasi le afe; sa sele fulufulu o ana mamoe i Karamelu.
3O Napalu le igoa o le tagata, o Apikaila le igoa o lana avā; o le fafine mafaufau lelei, ma le lalelei, a o le tane o le finauvale ia ma le leaga i ana mea e fai; o le sa Kalepō foi o ia.
4Ua faalogo Tavita i le vao, o loo sele e Napalu fulufulu o ana mamoe;
5ona auina atu lea e Tavita o taulelea e toasefulu; ua faapea ane Tavita i taulelea, O ae ia outou i Karamelu, ma o atu ia Napalu, ma ofo atu ia te ia i lo‘u igoa;
6tou te faapea atu i le ua tagata ola, Ia manuia oe, ia manuia lou aiga, ia manuia au mea uma lava.
7O lenei, ua au faalogo atu o loo ia te oe e ua sele fulufulu; o lenei, o au leoleo mamoe sa matou nonofo ma i matou, sa le afaina i latou; e leai foi se mea na le iloa ia te i latou i aso uma na latou i ai i Karamelu.
8Ia e fesili i ou taulelea, latou te ta‘u atu ai ia te oe; ma ia alofagia taulelea e oe; auā o le aso lelei ua o atu ai i latou; ia e foai ane se mea e soona maua e oe i au auauna ma lou atalii o Tavita.
9Ua oo atu taulelea o Tavita, ona latou fai atu lea ia Napalu, e pei o upu nei uma, i le igoa o Tavita, ona faalologo ai lea o i latou.
10Ona tali mai lea o Napalu i auauna a Tavita, ua faapea mai, O ai ea Tavita? O ai foi le atalii o Iese? E toatele auauna i nei ona po, ua taitasi ma sola ese i o latou matai.
11Ou te ave ea a‘u areto, ma a‘u vai, ma a‘u manu ua ou fasia mo e sele mo a‘u, ou te foai atu ai i tagata ou te le iloa pe maifea i latou?
12Ona liliu mai ai lea o taulelea o Tavita i lo latou ala, ua latou toe foi mai; ua oo mai, ma latou ta‘u mai ia te ia, e tusa ma ia upu uma.
13Ona fai atu lea o Tavita i ona tagata, Ia taitasi ma fusi i lana pelu; ona taitasi lea ma fusi i lana pelu, ua fusi foi e Tavita i lana pelu; ona mulimuli ae lea ia Tavita pe atoa se toafa galau o tagata, a e faamuli le toalua lau i oloa.
14Na ta‘u atu e le tasi taulealea ia Apikaila le avā a Napalu, ua faapea, Faauta, na auina mai e Tavita o auauna nai le vao e faamanuia i lo tatou alii; a ua ia oso feai atu ia te i latou.
15Sa agalelei tasi ia tagata ia te i matou; sa le afaina i matou, na leai foi sa matou mea e le iloa i aso uma na matou feoai ma i latou, a o i ai i matou i le vao.
16Sa fai ma pa i latou ia i matou i le po ma le ao i aso uma na mato i ai ma i latou o leoleo mamoe.
17O lenei, ia e iloa, ma e mafaufau pe se a se mea e te faia, auā ua uma ona saunia mai se leaga i lo tatou alii, atoa ma lona aiga uma; o ia foi le tagata ulavale, e le matautala atu se tasi ia teia.
18Ona faataalise ai lea o Apikaila, ua ia avane areto e lua selau, ma fagu pa‘u o uaina e lua, ma mamoe ua uma ona saunia e lima, ma sea o saito tunu e lima, ma fuifui vine mago e selau, ma potopotogāmati e lua selau, ua ia faaee ai i luga o asini;
19ua fai atu i ona taulelea, Muamua ia outou i o‘u luma; faauta, ou te mulimuli atu ia te outou; a ua le ta‘u atu ai ia Napalu lana tane.
20Sa tietie ia i luga o le asini, ma alu ifo i le itu e lilo o le mauga; faauta foi, o loo o ifo Tavita ma ona tagata ua feagai ma ia, na latou fetaiai ma ia.
21Na fai ane Tavita, E moni, ua ou leoleo fua i mea uma a lena tagata i le vao, ua leai lava sana mea e tasi e le iloa; a ua taui mai o ia ia te au le lelei i le leaga.
22Ia faapea ona fai e le Atua i e ita ia Tavita, ma ia faaopoopo i ai, pe afai ou te faasao, ia oo i le malama ae o le taeao, so latou uma o ia te ia e tulai atu i se aupa.
23Ua iloa e Apikaila ia Tavita, ona faataalise ai lea ona alu ifo o ia nai le asini, ua faapaū faō ia i luma o Tavita, ma ifo toele.
24Ua faapaū mai i ona vae, ua fai mai, Le alii e, ia ia te au lenei agasala; o a‘u nei lau auauna fafine, se‘i ou fai atu i ou fofoga, ma e faafofoga mai i upu a lau auauna fafine;
25aua ne‘i tuu e lo‘u alii i lona finagalo o amio a lena tagata ulavale, o Napalu; auā e pei o lona igoa e faapea foi o ia; o Napalu lona igoa, o loo ia te ia foi le valea; a o a‘u lau auauna fafine, ou te lei iloa taulelea o lo‘u alii, na e auina atu ai.
26O lenei, le alii e, o loo soifua Ieova, o loo e soifua foi oe, ua taofi Ieova ia te oe, ina ne‘i e alu atu e sasaa le toto, ma taui atu ai e lou lima ia Napalu; o lenei, ia pei o Napalu e ua ita ia te oe, atoa ma e ua saili e agaleaga i lo‘u alii.
27O lea foi, o le alofa lenei ua au mai e lau auauna fafine i lo‘u alii; ia avatu ia i taulelea o loo mulimuli mai i lo‘u alii.
28Ia e faamagalo le agasala a lau auauna fafine; auā e faia lava e Ieova mo lo‘u alii se aiga tumau, auā ua tau e lo‘u alii taua o Ieova, e lei iloa foi se leaga ia te oe i ou aso uma.
29A ua tulai mai le tagata e tulituliloa ia te oe, o loo sailiili foi ia maliu oe; a e fusifusia le ola o lo‘u alii i le ta‘ui o le ola e Ieova lou Atua, a o le ola o e ita ia te oe, na te sasau i ai i le maatā.
30A uma ona fai e Ieova i lo‘u alii o mea lelei uma na ia fetalai mai ai ia te oe, ma ua tofia oe e fai ma ta‘ita‘i e pule ia Isaraelu,
31e le fai le mea nei ma faalavelave ia te oe, ma mea e tiga ai le finagalo o lo‘u alii, ina ua e le sasaa fua le toto, ma ua le taui atu e lo‘u alii le leaga. A faamanuia mai foi e Ieova i lo‘u alii, ia e manatu mai i lau auauna fafine.
32Ona fai atu lea o Tavita ia Apikaila, Faafetai ia Ieova le Atua o Isaraelu, o le na auina mai oe i le aso nei e faafetaiai ia te au.
33Faafetai foi i lou mafaufau, ma faafetai ia te oe, ina ua e taofi ia te au i lenei aso, ina ne‘i ou alu e sasaa le toto, ma taui le leaga e lo‘u lava lima.
34E moni, o loo soifua Ieova le Atua o Isaraelu, le na taofi mai ia te au, ina ia ou le fai se mea leaga ia te oe; auā ana e le faataalise ona sau e faafetaiai ia te au, po ua le toe ia Napalu i le malama ae o le taeao se tulai atu i se aupa.
35Ona talia lea e Tavita nai lona lima o mea ua ia au mai ia te ia; ua fai atu foi ia te ia, Alu ae ia oe ma le manuia i lou fale; faauta, ua ou faalogo i lau upu, ma ou alofa ia te oe.
36Ona alu atu lea o Apikaila ia Napalu; faauta, ua fai e ia le tausamiga i lona fale, pei o le tausamiga a se tupu; ua fiafia foi le loto o Napalu i totonu ia te ia o loo inu ia ua onā tele ai. Ua ia le ta‘u atu ai ia te ia se upu itiiti, po o se upu tele se‘i malama ae le taeao.
37Ua oo i le taeao, ua mavae le onā i le uaina ia Napalu, ona ta‘u atu ai lea e lana avā ia te ia o nei mea uma; ona oti ai lea o lona loto i totonu ia te ia, ua avea o ia pei se maa.
38Pe atoa le sefulu o aso, ona taia lea o Napalu e Ieova; ua oti ai.
39Ua faalogo Tavita ua oti Napalu, ona fai ane lea o ia, Faafetai ia Ieova, ua ia taui atu i le agatele mai o Napalu, ma na taofi i lana auauna nai le leaga; a ua faafoi atu e Ieova le leaga o Napalu i lona lava ulu. Ua alu le feau a Tavita e tautalatala ma Apikaila, ia fai mana avā.
40Ua oo atu auauna a Tavita ia Apikaila i Karamelu, ona latou tautala atu lea ia te ia, ua faapea atu, Ua aauina mai i matou e Tavita ia te oe ina ia fai oe mana avā.
41Ona tulai lea o ia, ua ifo toele; ua fai mai, Faauta i lau auauna fafine, ia fai ma auauna e mulumulu i vae o auauna a lo‘u alii.
42Ua faataalise ona tulai o Apikaila, ua tietie i luga o le asini, ua mulimuli foi ia te ia ona teine e toalima; ua ia mulimuli atu i auauna a Tavita, ona fai ai lea o ia mana avā.
43Ua fai avā foi Tavita ia Ainoama le Isereelu, ua fai mana avā o i laua e toalua.
44A ua foai atu e Saulo lona afafine o Mekala le avā, a Tavita ia Paleti, le atalii o Laisa, o le Kali.
Who We AreWhat We EelieveWhat We Do
2025 by iamachristian.org,Inc All rights reserved.
