1Na fai le tauto e tagata o Isaraelu i Mesepa, o loo faapea, E leai so tatou e avatu lona afafine e fai ma avā i so sa Peniaminā.
2Ona oo atu lea o le nuu i Peteli, ua latou nonofo ai i luma o le Atua, ua oo i le afiafi. Ona leo tetele ai lea i latou ma fetagisi i le tagi tele.
3Ua latou fai atu, Ieova e, le Atua o Isaraelu, pe se a le mea ua oo mai ai lenei mea ia Isaraelu, ina ua mavae atu le tasi itu aiga o Isaraelu i lenei aso?
4Ona oo lea i le taeao ua ala usu le nuu, ua latou faia i lea mea le fata faitaulaga, ma avatu ai taulaga mu ma taulaga faafetai.
5Ua fai ane le fanauga a Isaraelu, O ai ea so le au ituaiga uma o Isaraelu na le o ae ia Ieova i le faapotopotoga? Auā sa latou faia le tautoga mamafa i se na te le alu ae ia Ieova i Mesepa, sa faapea, E matuā fasiotia lava o ia.
6Ua salamo foi le fanauga a Isaraelu ona o Peniamina lo latou uso, ua latou faapea ane, Ua vavaeeseina i lenei aso le tasi itu aiga nai ia Isaraelu;
7se a se mea tatou te faia ia maua avā mā e ua totoe? Auā ua tauto i tatou ia Ieova, e le avatu lava o tatou afafine e fai ma latou avā.
8Ona fai ane ai lea o i latou, O ai so le au itu aiga o Isaraelu na le alu ae ia Ieova i Mesepa? Faauta foi, e lei sau se tasi i le toagālauapi i le faapotopotoga mai Iapese-Kiliata.
9Ona latou faitaulia lea o le nuu; faauta, ua le i ai se tagata o e nonofo i Iapese-Kiliata.
10Ona aauina ai lea e le faapotopotoga o tagata e sefulu afe ma afe e lua o e totoa; ua fai atu ia te i latou, o loo faapea, O ia, ina outou fafasi i le pelu o e nonofo i Iapese-Kiliata, o fafine atoa ma tama iti;
11a o lenei le mea tou te faia, O tane uma, ma fafine uma ua tanea ia faaumatia i latou.
12Ua latou maua i e na nonofo i Iapese-Kiliata o teine taupou e toafa selau, o e na le tanea; ua latou aumaia i latou i le toagālauapi i Sailo i le nuu o Kanana.
13Ona aau atu lea nisi e le faapotopotoga uma, ua tautalatala ma le fanauga a Peniamina, sa i le papa o Rimoni; na valaau ia i latou, ua ola le taua.
14Ua toe foi Peniamina i ia ona aso, ona latou avatu lea o avā ia i latou e na faasaoina mai fafine o Iapese-Kiliata; a e lei tofu ai i latou.
15Ua salamo le nuu ona o Peniamina; auā ua lepetia e Ieova itu aiga o Isaraelu, ua leai se tasi.
16Ua fai ane toeaina o le faapotopotoga, Se a sa tatou mea e fai mo e totoe, ia maua avā, auā ua faaumatia fafine o Peniamina?
17Ua fai ane, Ia faia lava le tofi mo e ua sao o Peniamina, ina ia le tineia se itu aiga o Isaraelu.
18A o i tatou, tatou te le mafaia ona avatu ni o tatou afafine e fai mā latou avā, auā ua tauto le fanauga a Isaraelu, o loo faapea, Ia malaia se na te avatu se avā ia Peniamina.
19Ona latou fai atu lea, Faauta, o le tausamiga ia Ieova e faia i Sailo i lea tausaga ma lea tausaga, o loo i le itu i matu o Peteli, i gagae o le ala tele e alu ae nai Peteli i Sekema, ma le itu i toga o Lepona.
20Ua latou fai atu i le fanauga a Peniamina, o loo faapea,
21O ia, ina lamalama i tovine, ma outou vaavaai; faauta foi, afai e o atu teine o Sailo e fai le siva, ona outou o atu lea ai tovine, ma outou toso mā outou ia taitasi ma lana avā ai teine o Sailo; ona outou o lea i le nuu o Peniamina;
22afai foi e o mai ia te i matou o latou tamā, po o latou tuagane, e tagi mai ia te i matou, ona matou fai atu lea ia te i latou, Ia alofa ia i latou ona o i matou, auā na matou le faasao ni fafine i le taua, ia tofu le tagata ma lana avā; auā e le o outou na foai atu ai ia te i latou i nei ona po, ina ne‘i nofo sala ai outou.
23Ua faia faapea le fanauga a Peniamina, ua latou fai mā latou avā e na sisiva, na latou toso e faatatau ma i latou; ona latou o lea, ma foi atu i o latou lava nuu, ma latou faia o latou aai, ma latou nonofo ai.
24Ona o ai lea i ia ona aso o le fanauga a Isaraelu ai lea mea, e taitasi i lona itu aiga ma lona aiga; ua latou o ese i lea mea e taitasi i lona tofi.
25O ia ona aso sa leai se tupu ia Isaraelu, ua taitasi ma fai le mea e tusa i lona lava manatu.
Who We AreWhat We EelieveWhat We Do
2025 by iamachristian.org,Inc All rights reserved.
