IEREMIA, 22 - Samoan Old Version Bible

O LE MATAUPU XXII.O le aoaiga a Ieova ia Saluma, ma Ioakima, ma Konia.

1Ua faapea ona fetalai mai o Ieova, Ina e alu ifo ia i le fale o le tupu o Iuta, ma ia e fai atu lenei upu i lea mea,

2ia e faapea atu, Ia outou faalogologo mai i le afioga a Ieova, o oe le tupu o Iuta, o lē tietie i le nofoālii o Tavita, ma au auauna, ma lou nuu o e ulu mai i nei faitotoa;

3o loo faapea ona fetalai mai o Ieova, Ia outou faia le faamasinoga ma le amiotonu, ma ia laveaiina le ua faoa ana mea ai le lima o le tagata saua; aua le agaleaga atu, aua le faasaua atu i le tagata ese, ma le ua mātuaoti, ma le fafine ua oti lana tane; aua foi tou te faamaligiina i lenei mea le toto o e ua le sala.

4Auā afai tou te matuā faia lenei mea, ona ulufale mai ai lea i faitotoa o lenei fale o tupu o e tietie i le nofoālii o Tavita, o tietie i nofoa faataavalevale ma solofanua, e taitasi ma ana auauna, ma lona nuu.

5A e afai tou te le faalogo i nei upu, ou te tauto a‘u ia te au, o loo fetalai mai ai Ieova, e avea lenei fale ma faatafunaga.

6Auā ua faapea ona fetalai mai o Ieova, i mea a oo i le aiga o le tupu o Iuta, Ua o Kiliata oe ia te au, o le tumutumu o Lepanona; a e peitai e moni, ou te faia oe ma vao, o aai e le āina.

7Ou te tofia tagata faaumatia mea ia tiga ai oe, e taitasi le tagata ma ana auupega; latou te tatuuina o ou arasi silisili, ma lafo i le afi.

8E tele nuu e ui ane i lenei aai, ma fai ane le tasi i le tasi, Se a le mea ua faapea ai ona fai e Ieova i lenei aai tele?

9Ona fai atu ai lea e i latou, Auā ua tuua e i latou le feagaiga a Ieova lo latou Atua, a ua latou ifo i atua ese, ma auauna i ai.

10Aua tou te fetagisi ona o le ua oti, aua le faanoanoa ona o ia; a ia tagi tele ona o lē alu ese; auā e le toe foi mai o ia, e le toe iloa foi e ia le nuu na fanau ai o ia.

11Auā ua faapea ona fetalai mai o Ieova ia Saluma le atalii o Iosia le tupu o Iuta, o le na fai ma tupu e sui a‘i Iosia lona tamā, o le ua alu atu nai le mea nei; e le toe foi mai o ia i lea mea;

12auā e oti o ia i le mea ua latou avea ai o ia, a e le toe iloa mai e ia lenei nuu.

13Oi talofa i le ua faia lona fale ma le amioletonu, ma ua faia ona potu aupitoaluga ma le amio le tatau; ua fai fua e ia mana auauna lē la te tuaoi, ma ua le avatu ia te ia lona totogi;

14ua faapea ane o ia, Ou te faia mo a‘u le fale tele, ma potualuga e tetele; ua faia foi faamalama mo ia, ma ua tapapa i arasi, ma vali i le vali mūmū.

15E fai ea oe ma tupu ina ua e finau e fai fale arasi? O lou tamā na le ‘ai ea o ia ma inu, ma faia le faamasinoga ma le amiotonu? ona manuia ai lea o ia.

16Na faatonuina e ia le finauga o e ua puapuagaina ma e ua matitiva; ona manuia ai lea o ia. E le o le iloa ea o a‘u lena? o loo fetalai mai ai Ieova.

17A ua na ona faasaga o ou mata ma lou loto i lau oloa, ma le faamaligiina o le toto o le ua le sala, ma le faasaua, ma le faatigaina, ia faia.

18O le mea lea o loo faapea ona fetalai mai ai o Ieova i mea a oo ia Ioakima le atalii o Iosia, le tupu o Iuta, Latou te le taufaitagitu‘i ia te ia, e faapea, Aue! lo‘u uso e. Aue! le tuafafine e. Latou te le taufaitagitu‘i ia te ia e faapea, Aue! le alii e. Aue! le mamalu e.

19E tanumia o ia e pei ona tanua o le asini; e tosina ma tiaiina i tua o faitotoa o Ierusalema.

20Ina alu ae ia i Lepanona, ma alaga, ia e leo tele i Vasana, ia e alaga foi mai Aperima; auā ua faaumatia o i latou uma sa mananao ia te oe.

21Na a‘u fai atu ia te oe ina o ē manuia; a ua e fai mai, Ou te le faalogo atu. O lau masani lea talu ina e itiiti, ua e le faalogo i lo‘u leo.

22E fagaina au leoleo mamoe uma i le matagi; e ō i le tafeaga o e mananao ia te oe; ona e mā ai lava lea, ma masiasi ona o au amio leaga uma.

23O oe na lē mau i Lepanona, ma fai lou ofaga i arasi, talofa lava ia te oe pe a oo ia te oe le faatiga, o le tiga e pei o le fafine a fanau mai.

24O loo fetalai mai Ieova, O loo ola a‘u, pe afai ana fai Konia le atalii o Ioakima le tupu o Iuta ma faamaufaailoga i lo‘u lima taumatau; a ou te se‘iesea oe ai lea mea.

25Ou te tuuina atu foi oe i lima o e saili ia te oe ia oti, ma lima o i latou ua e mata‘u i ai, o le lima foi o Nepukanesa le tupu o Papelonia, ma lima o tagata o Kaletaia.

26Ou te tutuli ia te oulua ma lou tinā na fanaua oe e ō i le nuu ese na le fananau ai oulua; e oti foi oulua i lea mea.

27A o le nuu ua naunau o latou loto e toe foi mai i ai, latou te le toe foi mai lava i ai.

28O le ipu inosia ea ma le taeia lenei tagata o Konia? O le ipu ea o ia ua le fiafia i ai? Se a le mea ua tulia ai i latou, o ia, ma lana fanau, ma ua lafoaiina i latou i le nuu na latou le iloa?

29Le lalolagi e, le lalolagi e, le lalolagi e, ina faalogologo mai ia i le afioga a Ieova.

30O loo faapea ona fetalai mai o Ieova, Ia outou tusia lenei tagata e aufanaua, o le tagata e le manuia i lona olaga; auā e le manuia se tasi o lana fanau, e le tietie i le nofoālii o Tavita, pe toe pule i Iuta.