1Ua mavae isi aso, ona toe maliu atu lea o ia i Kapanaumi; ua ave foi le logo ua i ai o ia i le fale.
2Ona potopoto loa mai lea o tagata e toatele, ua le toe ofi, ua le ofi lava i se mea e latalata i le faitotoa, ona folafola atu lea e ia le upu ia te i latou.
3A ua o mai nisi ia te ia, ua au mai le tagata supa, o loo fataina mai e le toafā.
4Ua le mafai foi i latou ona faalatalata atu ia te ia, auā le motu o tagata, ona latou tatala lea o le ufi o le fale sa i ai o ia, ua faasosofa i ai, ona latou tuutuu ifo ai lea o le moega o taoto ai le supa.
5Ua silafia e Iesu lo latou faatuatua, ona fetalai atu lea o ia i le supa, Lo‘u atalii e, ua faamagaloina au agasala.
6Sa nonofo mai ai nisi o le au tusiupu, sa manatunatu ifo i o latou loto,
7Se a le mea ua upu leaga ai faapea lenei tagata i le Atua? E mafaia ea ia te ai ona faamagaloina o agasala, ua na o le toatasi o le Atua lea?
8Ua silafia loa e Iesu i lona finagalo ua faapea ona latou manatunatu i o latou loto, ona fetalai atu ai lea o ia ia te i latou, Se a le mea ua outou manatunatu ai ia mea i o outou loto?
9Po o le fea e faigofie? po o le fai atu i le supa, Ua faamagaloina au agasala; po o le fai atu, Ina tulai ia, ma ave lou moega, ma savali?
10A e peitai ina ia outou iloa o i ai i le Atalii o le tagata i le lalolagi le pule e faamagalo ai agasala, (ua fetalai ane ia i le supa,)
11Ou te fai atu ia te oe, Ina tulai ia, ina ave lou moega, ma alu atu i lou fale.
12Ona tulai loa lea o ia, ua ave foi lona moega, ma savali ane i luma o i latou uma. Ona ofo tele ai lea o i latou uma, ma vivii atu i le Atua, ua faapea, Ua tatou le iloa mai anamua se mea faapena.
13Ua toe maliu ane ia e latalata ane i le vai, ona o mai lea o le motu o tagata uma ia te ia, ona a‘oa‘o atu lea o ia ia te i latou.
14Ua maliu ane o ia, ona silafia lea e ia o Levi o le atalii o Alefaio, ua nofo i le fale e tali ai taulaga, ona fetalai atu lea o ia, Mulimuli mai ia ia te au. Ona tulai lea o ia, ua mulimuli atu ia te ia.
15Ua taoto o ia i lona fale e taumafa, e toatele foi telona ma e agasala ua taooto e aai faatasi ma Iesu ma ona soo; auā e toatele i latou, ua latou mulimuli atu foi ia te ia.
16Ua iloa e le au tusiupu ma le au faresaio o ia o loo taumafa faatasi ma telona ma tagata agasala, ona latou fai atu lea i ona soo, Se a le mea e ‘ai ai o ia ma inu faatasi ma telona ma e ua agasala?
17Ua lagona e Iesu, ona fetalai atu lea o ia ia te i latou, E le aoga le fomai i e malolo, na o e mamai; ua ou le sau e valaau i e amiotonu, a o e agasala ina ia salamo.
18Sa anapopogi le au soo o Ioane, ma soo o le au faresaio; o le mea lea ua latou o mai ai, ma fai mai ia te ia, Se a le mea e anapopogi ai le au soo o Ioane ma soo o le au faresaio, a o ou soo e le anapopogi i latou?
19Ona fetalai atu lea o Iesu ia te i latou, Pe mafai ea aumea a le faatoafaiavā ona anapopogi ina o ia te i latou le faatoafaiavā? Latou te le mafai ona anapopogi i ona aso o ia te i latou le faatoafaiavā.
20A e oo i ona po e aveeseina ai le faatoafaiavā ia te i latou, ona latou anapopogi ai lea i na ona aso.
21E leai foi se tasi na te fonoa le matuā ofu i le ie fou; a faapea, e masae le matuā ofu i le fono fou, ona atili ai lea ona masae.
22E le utufia foi e se tasi le uaina fou i fagu pa‘u tuai; a faapea, e pāpā ai fagu pa‘u i le uaina fou, ona masaa lea o le uaina, e māumau foi fagu pa‘u; a e peitai ia utufia le uaina fou i fagu pa‘u fou e tatau ai.
23Ua ui ane o ia i le sapati i tosaito, ona ooti fano lea o ona soo i ‘au saito.
24Ona fai atu lea o le au faresaio ia te ia, Faauta, se a le mea latou te fai ai le mea e sa ona fai i le sapati?
25Ona fetalai atu lea o ia ia te i latou, Ua outou le faitauina ea le mea na faia e Tavita, ina ua leai ni ana mea, ua fia ‘ai foi o ia atoa ma i latou sa ia te ia,
26ua ulu atu o ia i le fale o le Atua i ona po o Aviata le ositaulaga sili, ua ia ‘ai foi areto e laulauina i luma, ma avane i e sa ia te ia? O mea e sa ona ‘ai ai o se tasi, na o le au ositaulaga lava.
27Ua ia fetalai atu foi ia te i latou, Ua faia le sapati mo tagata, a ua le faia tagata mo le sapati.
28Lenei la, o le Atalii o le tagata, o le Alii lava lea o le sapati.
Who We AreWhat We EelieveWhat We Do
2025 by iamachristian.org,Inc All rights reserved.
