SAKARIA, 7 - Samoan Old Version Bible

O LE MATAUPU VII.O anapogi o le nuu; o a latou agasala ua tiga ai i latou.

1O le tausaga e fa o Tariu le tupu, ua tŭlei mai ai le afioga a Ieova ia Sakaria i le aso e fa, i le iva o masina, o Kiselu lea.

2Ua auina atu o Peteli o Saresa, ma Rekemeleki, ma ona tagata e faalaulelei i le finagalo o Ieova;

3o loo fai mai i faitaulaga e ua i ai i le fale e Ieova o ‘au, atoa ma perofeta, o loo faapea mai, Ou te tagi ea i le masina e lima, ma ou nofo ese, pei ona ou faia i ia tausaga ua tele?

4Ona oo mai lea o le afioga a Ieova o ‘au ia te au, o loo faapea mai,

5Fai atu i tagata uma o le nuu, atoa ma faitaulaga, ia faapea atu, Na outou anapogi ma fetagisi i le lima ma le fitu o masina i ia tausaga e fitugafulu, na outou anapogi ai ea ia te au?

6na outou aai foi, ma outou feinu, e le o outou lava ea sa aai, o outou foi sa feinu?

7E le o upu ea ia sa valaau ai Ieova i perofeta anamua, ina o āina o Ierusalema ma ua manuia, mōna aai ua vagavagai i ai, ma le itu i toga ma le itu maulalo sa āina ia.

8Ua tŭlei mai foi le afioga a Ieova ia Sakaria, o loo faapea,

9Ua faapea ona fetalai mai o Ieova o ‘au, o loo faapea mai, Ia faamasino i le faamasinoga tonu, ma ia agalelei ma alofa o le tasi i le tasi;

10aua le faasaua i fafine ua oti a latou tane ma e ua mātua-oti, o le tagata ese ma le ua mativa; aua foi le manatunatu i o outou loto i se mea leaga e fai e le tasi i le tasi.

11A ua latou le mafafai ona uai mai o latou taliga, ma ua liu tua mai i latou ma le finau vale; ma o latou taliga ua faatulituli ia ina ia latou le faalogo.

12Ua latou faia foi o latou loto ma samira, ina ia le faalogo i latou i le tulafono ma afioga na auina mai ai e Ieova o ‘au e lona Agaga i perofeta anamua; o lea na tele ai le toasa mai ia Ieova o ‘au.

13O lenei, e pei ona valaau o ia, a e lei faalogologo mai i latou; e faapea foi ona valaau o i latou, a e ou te lei faalogo i ai, ua fetalai mai ai Ieova o ‘au.

14Na a‘u faataapeape ia te i latou i nuu uma na latou le iloa; sa tuufua le nuu i o latou tua, ua le fealuai ai se tasi; na faia e i latou le nuu matagofie ma mea tuufua.