1Ona alu ai lea o Iakopo i lana malaga, ua oo atu i le laueleele o le nuu i sasae.
2Ua ia vaai, ona iloa lea, o le vaieli i le fanua, faauta foi, ua taooto latalata i ai o lafu mamoe e tolu; auā o lea vaieli na latou faainu ai lafu; ua i ai foi le maa tele i le gutu o le vaieli.
3A faapotopotoina foi lafu uma i lea mea, ona latou fuli ese ai lea o le maa i le gutu o le vaieli, ma faainu mamoe; ona latou toe tuu ai lea o le maa i le gutu o le vaieli, i lea mea e tuu ai.
4Ona fai atu ai lea o Iakopo ia te i latou, O‘u uso e, maifea outou? Ona latou fai mai ai lea, O i matou nei mai Karana.
5Ona fai atu ai lea o ia ia te i latou, Ua outou iloa ea Lapana le atalii o Nakori? Ona latou fai mai ai lea, Ua matou iloa lava.
6Ona fai atu ai lea o ia ia te i latou, O malolo ea ia? Ona latou fai mai ai lea, O malolo lava. Faauta foi, o loo sau lona afafine o Rasela ma mamoe.
7Ona fai atu ai lea o ia, Faauta, e maualuga pea le la, e lei oo i le itu la e faapotopotoina ai manu, ia outou faainu mamoe, i le outou o e fafaga ai.
8Ona latou fai mai ai lea, Matou te le mafaia, seia faapotopotoina lafu uma, seia latou fuli ese foi le maa i le gutu o le vaieli, ona matou faainu ai lea o mamoe.
9O loo latou tautala ma ia, a e sau Rasela ma mamoe a lona tamā, auā na ia leoleo ai.
10Ua iloa e Iakopo o Rasela le afafine o Lapana le tuagane o lona tinā, ma mamoe a Lapana le tuagane o lona tinā, ona soso atu ai lea o Iakopo, ua fuli ese le maa i le gutu o le vaieli, ma faainu mamoe a Lapana le tuagane o lona tinā.
11Ona sogi atu lea o Iakopo ia Rasela, ua tagi foi ma le leo tele.
12Ona ta‘u atu ai lea e Iakopo ia Rasela o ia o le uso o lona tamā, o le tama foi a Repeka, ona momo‘e ai lea o ia e ta‘u atu ai i lona tamā.
13Ua faalogo Lapana i le tala ia Iakopo le tama a lona tuafafine, ona momo‘e ai lea o ia e faafetaiai ia te ia, ua fusi ia te ia, ma sogi ia te ia, ua au mai foi ia te ia i le fale; ona tala atu ai lea e ia o na mea uma ia Lapana.
14Ona fai mai ai lea o Lapana ia te ia, O o‘u lava ivi oe ma o‘u aano. Ua la nonofo foi ma ia i le masina atoa.
15Ona fai mai ai lea o Lapana ia Iakopo, A ē auauna fua mai ea ia te au auā o oe o lo‘u uso? Ia e fai mai ia te au pe se a lou totogi.
16Na ia Lapana o afafine e toalua, o le igoa o le matua o Lea, o le igoa, foi o le itiiti o Rasela.
17O Lea ua leaga ona mata, a o Rasela ua lalelei le tino, ua lalelei foi ma ona mata.
18Ua manao Iakopo ia Rasela, ua fai atu ia, Ou te auauna ia te oe i tausaga e fitu ona o Rasela lou afafine aupito itiiti.
19Ona fai mai ai lea o Lapana, E lelei ona ou avatu ai o ia ia te oe, a e leaga ona ou avatu i se tasi tagata; ina ta nonofo ia ma a‘u.
20Ona auauna ai lea o Iakopo i tausaga e fitu ona o Rasela, ua peiseai o nai aso itiiti ia i lona manatu, auā o lona manao tele ia te ia.
21Ona fai atu ai lea o Iakopo ia Lapana, Au mai ia la‘u avā; auā ua atoa o‘u aso ina ia ou alu atu ia te ia.
22Ona faapotopotoina lea e Lapana o tagata uma o le nuu, ua fai le tausamaaga.
23Ua oo i le afiafi, ona ave ai lea e ia o lona afafine o Lea, ua aumaia ia te ia; ona alu atu ai lea o ia ia te ia.
24Ua avatu e Lapana i lona afafine o Lea o lana auauna fafine o Selepa, e fai mana auauna.
25Ua oo i le taeao, faauta mai, o Lea; ona fai atu ai lea o ia ia Lapana, Se a lenei mea ua e faia ia te au? ou te lei auauna ea ia te oe ona o Rasela? Se a foi le mea ua e faa‘ole‘ole mai ai ia te au?
26Ona fai mai ai lea o Lapana, E le faapea le tu i lo matou nuu, ona muai avatu le itiiti a e mulimuli le matua.
27Ia faaatoa ona aso e fitu, ona avatu ai foi lea ia te oe atoa ma lenei, ona o le galuega e te auauna mai ai ia te au i isi tausaga e fitu.
28Ua faia lava lea e Iakopo, ua faaatoa ona aso e fitu; ona au mai ai lea e ia o lona afafine o Rasela e fai mana avā.
29Ua avatu e Lapana i lona afafine o Rasela o lana auauna fafine o Pila e fai mana auauna.
30Ona alu atu ai lea o ia ia Rasela foi, ua sili foi lona alofa ia Rasela i lona alofa ia Lea; ona auauna lea o ia ia Lapana i isi tausaga e fitu.
31Ua silafia e Ieova ua inosia Lea, ona faagaaufanauina lea o ia e ia, a o Rasela ua pa ia.
32Ona to ai lea o Lea, ua fanau lana tama tane, ua na faaigoa ia te ia o Reupena; auā ua faapea ana, Ua silasila mai Ieova i lo‘u tiga; o lenei, e alofa mai ai la‘u tane ia te au.
33Ua toe to foi o ia, ua fanau lana tama tane, ua faapea ana, Auā ua faafofoga e Ieova ua inosia a‘u, o le mea lea ua na au mai ai ia te au lenei tama foi; ua ia faaigoa ia te ia o Simeona.
34Ua toe to o ia, ua fanau lana tama tane, ua faapea o ia, O lenei, a sosoo nei o ma loto ma la‘u tane, auā ua ou fanau ia te ia tama tane e toatolu; o le mea lea na ia faaigoa ai ia te ia o Levi.
35Ua toe to foi o ia, ua fanau lana tama tane; ua faapea o ia, O lenei ou te vivii ia Ieova; o le mea lea ua ia faaigoa ai ia te ia o Iuta, ona pa ai lea o ia.
Who We AreWhat We EelieveWhat We Do
2025 by iamachristian.org,Inc All rights reserved.
