1Ieova e, ua e suesue mai ia te au, ua e silafia lava a‘u.
2O oe lava ua e silafia lo‘u nofo i lalo ma lo‘u tulai i luga; ua e silafia mamao mai o‘u manatunatu.
3Ua e suesue i lo‘u savali ma lo‘u taoto, ua e masani lava ma o‘u ala uma.
4A o leai lava se upu i lo‘u gutu, faauta, Ieova e, ua e silafia uma lava.
5Ua e siosio mai i o‘u tua atoa ma o‘u luma, ua e faaee mai foi lou aao i luga ia te au.
6O le poto lea e sili ona faigata ia te au, ua maualuga, ou te le mafaia.
7Ou te alu ea ifea ai lou Agaga? Ou te sola ifea ai ou luma?
8Afai ou te alu ae i le lagi, o i ai lava oe; afai ou te fofola so‘u moega i seoli, faauta, o i ai lava oe.
9Afai e faia mo a‘u apaau o le taeao, ma ou nofo i le tulu‘iga o le sami;
10e ta‘ita‘i mai ia te au i lea lava mea e lou aao, e taofi mai foi ia te au lou aao taumatau.
11Afai ou te faapea atu, E ufitia lava a‘u i le pouliuli; ona fai lea o le po ma malamalama e siosiomia ai a‘u.
12Auā o le pouliuli e le pouliuli lava lea ia te oe; e malamalama le po pei o le ao; e tusa lava ia te oe le pouliuli ma le malamalama.
13Auā sa ia te oe o‘u manatunatu; na e ufiufi ia te au i le manava o lo‘u tinā.
14Ou te vivii atu ia te oe, auā na faia a‘u e ala ai ona matautia ma ofo tele ai; o mea na e faia, o mea mamana ia; ua ou matuā iloa e a‘u nei mea.
15E lei lilo lo‘u tino ia te oe, ina ua faia a‘u i le mea lilo, ina ua saunia a‘u i mea loloto i le lalolagi.
16Na silasila mai ou fofoga i o‘u tino uma ina o afuafua; ua tusia foi uma lava i lau tusi, o ona aso foi na faia ai, a o leai ni o‘u tino.
17Le Atua e, ua matuā sili ou manatunatu ona aoga ia te au, ua sili lava ona tele o lo latou faitau aofai.
18Afai ou te faitaulia, ua sili ia ona tele i le oneone; a a‘u ala, tā te i ai pea ma a‘u.
19E moni, le Atua e, e te fasioti i e amio leaga; o lea, ia o ese atu ai ia te au outou tagata ua totolima,
20o e fai upu ia te oe e faatupu ai le leaga; e ta‘uta‘u fua i lou suafa o e ita ia te oe.
21Ieova e, ou te le ‘ino‘ino ea ia te i latou o e ‘ino‘ino ia te oe? Ma e o laga atu ia te oe, ou te le matuā ‘ino‘ino ea i ai?
22Ou te ino‘ino lava ia te i latou ma le matuā ‘ino‘ino tele; ua fai i latou mo‘u fili.
23Le Atua e, ia e suesue mai ia te au, ma ia e silafia lo‘u loto; tofotofo mai ia ia te au, ma ia e silafia o‘u manatunatu;
24ma ia e silafia po o ia te au se ala e tiga ai; ma e ta‘ita‘iina mai a‘u i le ala o le faavavau.
Who We AreWhat We EelieveWhat We Do
2025 by iamachristian.org,Inc All rights reserved.
