ISAIA, 60 - Samoan Old Version Bible

O LE MATAUPU LX.O te tupu tele o le upu a le Atua, ma le manuia o ona tagata.

1Tulai ia, ina malamalama ia, auā ua oo mai lou malamalama; ua alu ae foi le pupula o Ieova i ou luga.

2Auā faauta mai, e ufitia le lalolagi i le pouliuli, e ufitia foi nuu i le pogisa; a e afio ae Ieova i ou luga, ma le pupula o Ieova e aliali mai lea i ou luga.

3E o mai nuu ese i lou malamalama, o tupu foi e o mai i latou i le pupula o lou alu ae.

4Ia e fetepai i itu uma, ma e vaai, o loo faapotopoto mai i latou uma; ua latou o mai ia te oe, o au tama tane e o mai i latou i mea mamao, e afisi foi au tama fafine i lou itu.

5Ona e vaai ai lea, ma e olioli; e polepole oe, ma fiafia tele lou loto; auā e liua mai ia te oe le oa o le sami; e oo mai ia te oe le oloa o nuu ese.

6E ufitia oe i le vao kamela e tele, o kamela taanoa o Mitiana ma Efa; o i latou uma mai Seepa e o mai; latou te aumaia auro ma pulu lipano, latou te tala fiafia i viiga o Ieova.

7E faapotopotoina ia te oe lafu mamoe uma o Kitara; e auauna ia te oe mamoe poa o Nepaiota, latou te o ae, e talileleia i lo‘u fata faitaulaga; ou te faamatagofie foi le fale o i ai lo‘u matagofie.

8O ai ea i latou na o loo felelei e pei se ao, e pei o lupe foi i o latou faitotoa?

9Auā e faatalitali nuu tu matafaga ia te au, e muamua foi vaa o Tasesa, e aumaia lau fanau i mea mamao, o a latou ario ma a latou auro e faatasi ma i latou; ona o le suafa o Ieova lou Atua, ma le Paia o Isaraelu, auā ua ia faamatagofie ia te oe.

10E atiina ae ou pa e tagata ese; e auauna mai o latou tupu ia te oe; auā o lo‘u ita na a‘u taia ai oe; a o lo‘u alofa ou te alofa ai lava ia te oe.

11E avanoa pea lava ou faitotoa, e le punitia i le ao ma le po; ina ia aumaia ia te oe le oloa o nuu ese, ma ia ta‘ita‘iina ai o latou tupu.

12Auā e fano le nuu ma le malo ua le mafai ona auauna ia te oe; e matuā faatafunaina ia nuu.

13E o mai ia te oe mea e ta‘ua ai Lepanona o le perosi, ma le titara, ma le tasura e faatasi, e faamatagofie a‘i le mea e i ai lo‘u malumalu; ou te faalaleleia foi le mea e tu ai o‘u vae.

14O le fanau o e na faasaua ia te oe latou te o mai, ma latou ifo ia te oe; o i latou uma e na ‘ino‘ino ia te oe, latou te ifo atu i ou alofivae; latou te faaigoa ia te oe, O le aai a Ieova, O Siona o le aai a le Paia o Isaraelu.

15Na fai oe ma nuu lafoaiina ma le inosia, ua leai foi se ui ai, a o lenei e faia oe e a‘u ma nuu matagofie e faavavau, ma nuu e olioli ai i lea tupulaga ma lea tupulaga.

16E te susu i le suāsusu o nuu ese, e te susu foi i susu o tupu; e te iloa foi o a‘u o Ieova o lou Faaola, ma le na faatauina oe, o le Malosi o Iakopo.

17Ou te aumaia le auro e sui a‘i le ‘apa memea; ou te aumaia foi le ario e sui a‘i le uamea, ma le ‘apa memea e sui a‘i laau, ma uamea e sui a‘i maa; e avea foi e a‘u ou alii ia filemu, ma ou faipule ia amiotonu.

18E le toe lagona le sauaga i lou laueleele; o le faatafunaina ma le lepetia o mea e le lagona ia i lou nuu; a e faaigoaina e oe ou pa, O le olataga, ma ou puipui, O le viiga.

19E le toe faia le la mou malamalama i le ao; e le faamalamalama foi ia te oe le masina i lona susulu mai; a e faia Ieova mou malamalama e faavavau, e fai foi lou Atua mou matagofie.

20E le toe goto lou la, e le toe mavae atu foi lou masina; auā e faia Ieova mou malamalama e faavavau; e uma foi aso o lou faanoanoa.

21O lou nuu foi e amiotonu i latou uma lava; e fai mo latou le nuu e faavavau; o le tātupu o la‘u faatoaga, o le galuega a o‘u lima, e fai mo‘u viiga.

22O le toaitiiti e fai ma toaafe, ma le ua faatauvaa e fai ma nuu malosi; o a‘u o Ieova, ou te faavave ona fai i ona lava aso.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help