1Ua oo i le tasi aso, ona fai atu ai lea o Ionatana le atalii o Saulo i le taulealea o lona soātau, Sau ia, ina ta o atu i le leoleoga a Filisitia o loo i le tasi itu; a ua na le ta‘u atu ai i lona tamā.
2Ua nofo Saulo i le pito nuu o Kipea i lalo o le rimoni sa i Mekerona, atoa ma le nuu sa ia te ia, pe atoa se ono galau o tagata;
3sa i ai foi Akia le atalii o Akitopo, le uso o Ikapoti, le atalii o Fineaso, le atalii ia o Eli le faitaulaga a Ieova i Sailo, o loo ofu i le efota. Ua le iloa e le nuu ua alu Ionatana.
4O le ala na saili e Ionatana e ui atu ai i le leoleoga a Filisitia sa i ai le pito papa i le tasi itu ala, ma le pito papa i le tasi itu ala; o le igoa o le tasi o Posese, o le igoa o le tasi o Sene.
5Ua faasaga le tasi pito papa i le itu i matu e feagai ma Mekemase; a ua faasaga le tasi e feagai ma Kipea i le itu i toga.
6Ua fai atu Ionatana i le taulealea o lona soātau, Sau ia, ta o atu i le leoleoga a na nuu le peritomeina, atonu e galue Ieova mo i taua; auā e le faigata ia Ieova ona faaola e le toatele po o le toaitiiti.
7Ona fai mai lea ia te ia o lona soātau, Ina fai ia o mea uma e te finagalo i ai; ma o atu ia, faauta, o mea e te finagalo i ai o a‘u lava lea.
8Ua fai atu Ionatana, Faauta, o le a ta o atu i le nuu, ta faaali atu i tāua ia te i latou.
9Afai latou te faapea mai ia te i taua, Tutū ia iina, seia matou o atu ia te oulua; ona ta tutū ai lea i lalo, ma ta le o ae ia te i latou.
10A e afai latou te faapea mai, Ina o ae ia oulua i luga nei ia te i matou; ona ta o ae ai lea, auā ua tuuina mai i latou e Ieova i o t lima; e fai foi lenei mea ma faailoga ia te i taua.
11Ua faaali i laua i le leoleoga a Filisitia; ona fai ane lea o Filisitia, Faauta, ua o mai Eperu nai ana sa latou lafafi ai.
12Ua fai mai tagata o le leoleoga ia Ionatana ma lona soātau, ua fapea mai, O ae ia i luga nei ia te i matou, matou te faailoa atu se mea ia te oulua. Ona fai atu lea o Ionatana i lona soātau, Mulimuli ae ia ia te au, auā ua tuuina mai i latou e Ieova i lima o Isaraelu.
13Ona tausili ae lea o Ionatana, ua mulimuli ae ia te ia lona soātau; ona fasia lea o i latou e Ionatana, a e mulimuli atu ia te ia lona soātau, ma faaoti ia te i latou.
14O le luai fasi na fasia ai e Ionatana ma lona soātau, pe toaluafulu tagata i si fāsi fanua e tusa ma le vaeluagalemu o le suataga, o le galuega lea a povi e lua.
15Ua oo le matautuia i e sa i le togālauapi, ma le fanua, atoa ma le nuu uma; o le leoleoga ma e faatafuna ua matautuia foi i latou; ua gatete foi le eleele, sa i ai le matautuia mai le Atua.
16Ua iloa atu e tagata vaai o Saulo sa i Kipea o Peniamina, faauta i le vao tagata, ua tauāu ina faaumatia, ma taia pea lava i latou.
17Ua fai atu Saulo i le nuu sa ia te ia, Ina faitau ia seia iloa po o ai ua alu ese ia te i tatou; ua faitau, faauta, e lei i ai Ionatana ma lona soātau.
18Ona fai atu lea o Saulo ia Akia, Au mai ia iinei le atolaau a le Atua. (Auā sa i ai le atolaau a le Atua i le fanauga a Isaraelu i na ona aso.)
19O loo tautala Saulo ma le faitaulaga, ua tuputupu pea le vāvāo sa i le togālauapi a Filisitia, ua tele lava. Ona fai atu lea o Saulo i le faitaulaga, Ina tuu ia i lalo lou lima.
20Ua faapotopoto Saulo ma le nuu uma sa ia te ia, ona latou o ai lea i le taua; faauta, ua taitasi ma faaoo lana pelu i le tasi; sa matuā tele le faanunununu.
21O Eperu foi sa muai i ai ia Filisitia, na o ae ma i latou i le togālauapi mai itu uma, ua liliu mai foi i latou e ‘au ma Isaraelu sa ia Saulo ma Ionatana.
22O tagata Isaraelu uma sa lalafi i le mauga o Efaraima, ua faalogo i latou ua sosola Filisitia, o i latou foi ua latou tuliloa ia te i latou i le taua.
23Ua faaola Ieova ia Isaraelu i lea aso; ua oo ane le taua i Petavene.
24Sa tigaina tagata Isaraelu i lea aso, auā na fai atu Saulo i le nuu ia tauto, o loo faapea, Ia malaia le tagata na te ‘ai se mea seia oo i le po, ina ia ou tani atu i o‘u fili; ona le ‘ai lava lea se mea e le nuu uma.
25Ua oo le nuu uma i le vao, sa i ia le meli vao i luga o le eleele.
26Ua oo le nuu i le vao, faauta, ua sosolo ifo le meli vao, a e lei tuu ae le lima o se tasi i lona gutu, auā ua matatau le nuu i le tauto.
27A ua le lagona e Ionatana le tautoga a lona tamā na fai atu ai i le nuu, ua na tuu atu le pito tootoo sa i lona lima, ua fufui i le meli vao, ua tuu atu ai lona lima i lona gutu, ona malamalama ai lea ona mata.
28Ona fai mai lea o le tasi tagata, ua faapea, Ua matuā tauto mai lou tamā i le nuu, ua faapea, Ia malaia le tagata na te ‘ai se mea i le asō; ua lailoa ai le nuu.
29Ona fai atu ai lea o Ionatana, Ua faatigaina le nuu e lo‘u tamā; faauta mai, ua malamalama o‘u mata ina ua ou ‘ai sina mea itiiti o lenei meli vao;
30ai lava ana matuā aai le nuu i lenei aso i mea a le itu taua na latou maua, po o penei ua faatele lava se fasi o Filisitia.
31Ua latou fafasi i lea aso ia Filisitia, e afua mai i Mekemase ua oo i Ailona; a ua matuā lailoa le nuu.
32Ua feosofi le nuu i mea a le itu taua; ua pupue i mamoe, ma povi, ma tamai povi, ua latou fafasi ai i luga o le eleele; ona aai ai lea e le nuu ma le toto.
33Ua latou ta‘u atu ia Saulo, ua faapea, Faauta, ua agasala le nuu ia Ieova ina ua latou aai ma le toto. Ona fai mai lea o ia, Ua outou faia lea mea pepelo; fulifuli mai nei lava ia te au se maa tele.
34Ona fai mai lea o Saulo, Ia feoai solo outou i le nuu, ma fai atu ia te i latou; ia taitasi ma au mai ia te au lana povi po o lana mamoe, ma outou fafasi ai i le mea nei, ma aai ai; aua le agasala ia Ieova i le ‘ai ma le toto. Ona taitasi ai lea o le nuu uma ma au mai lana povi i lea lava po; ua latou fafasi ai i lea mea.
35Ua faia e Saulo le fata faitaulaga ia Ieova; o lona lea faatoa fai fata faitaulaga ia Ieova.
36Ua fai mai foi Saulo, Tatou o ifo ia ia Filisitia i le po nei, tatou te fafasi ia te i latou seia malama ae le taeao, aua le toe se tagata e toatasi o i latou. Ona fai atu lea o i latou, O mea uma e te finagalo i ai, ina fai ia o lea. Ua fai ane le faitaulaga, Ia tatou faalatalata atu i le Atua iinei.
37Ona fesili atu lea o Saulo i le Atua, Ou te alu ifo ea ia Filisitia? E te tuuina mai ea i latou i lima o Isaraelu? A ua le tali mai o ia ia te ia i lea aso.
38Ua fai mai Saulo, Ia faalatalata mai iinei outou alii uma o le nuu, ina ia tatou iloa, ma ia tatou vaai, po o le a lenei agasala i le aso nei.
39Auā ua soifua Ieova o lē faaola ia Isaraelu, e ui lava ina i ai ia Ionatana lo‘u atalii e oti lava o ia. A ua leai so le nuu uma na tali atu ia te ia.
40Ona fai mai lea o ia ia Isaraelu uma, O outou, tou te i le tasi itu, a o a‘u ma Ionatana lo‘u atalii, ma te i le tasi itu. Ua fai atu le nuu ia Saulo, O le mea e te finagalo i ai, ina fai ia o lea.
41Ua fai atu Saulo ia Ieova le Atua o Isaraelu, Ia e tuu mai le tonu. Ona maua lea o Saulo ma Ionatana, a ua sao le nuu.
42Ona fai mai lea o Saulo, Ina fai ia la maua vili ma Ionatana lo‘u atalii; ona maua lea o Ionatana.
43Ua fai mai Saulo ia Ionatana, Ina ta‘u mai ia ia te au pe se a le mea ua e faia? Ua ta‘u atu Ionatana ia te ia, ua faapea, Na ou ‘aina sina meli vao itiiti nai le pito tootoo i lo‘u lima, faauta foi, o le a a‘u oti ai.
44Ona fai mai lea o Saulo, Ia faapea ona faia e le Atua ia te au, ma ia faaopoopo i ai, pe afai e te le oti lava oe Ionatana.
45Ona fai atu lea o le nuu ia Saulo, E maliu ea Ionatana na na faia lenei faaolataga tele mo Isaraelu? ia mamao lava; o loo soifua Ieova, e le paū i le eleele se lau ao o lona ao, auā na galulue faatasi o ia ma le Atua i lenei aso. Ua laveai le nuu ia Ionatana, ia le oti o ia.
46Ona alu ae lea o Saulo, ua le toe tuliloa ia Filisitia; ua o foi Filisitia i lo latou nuu.
47Ua faia e Saulo le malo o Isaraelu; ua tau foi o ia ma e na ita mai uma lava i itu uma, o Moapi, ma le fanauga a Amoni, ma Etoma, ma tupu o Sopa, ma Filisitia; o nuu uma na ia fasaga atu i ai, ua manumalo ai o ia.
48Ua faamalosi o ia, ma ua fasi ia Ameleka, ma na laveai ia Isaraelu ai lima o e na vete mea.
49O atalii nei o Saulo, o Ionatana, ma Iesivi, ma Makisua, o igoa foi o ona afafine e toalua, o le igoa o le matua o Merapa, a o le igoa o lē itiiti o Mekala.
50O le igoa o le avā a Saulo, o Ainoama le afafine o Aimaasu; o le igoa o le pule i ana ‘au, o Apineru le atalii o Neru, le uso o le tamā o Saulo.
51O Kiso le tamā ia o Saulo, o Neru le tamā ia o Apineru, o ia o le atalii o Apielu.
52Sa tele lava taua ma Filisitia i aso uma o Saulo; a vaai Saulo i se tagata malosi, po o se tagata fitafita ua na faaopoopoina mai lea ia te ia.
Who We AreWhat We EelieveWhat We Do
2025 by iamachristian.org,Inc All rights reserved.
