1O le sefulu ma le valu o tausaga o le tupu o Ierepoamo le atalii o Nepata, na fai ai Aviama ma tupu o Iuta.
2E tolu tausaga na fai ai o ia ma tupu i Ierusalema. O le igoa o lona tinā o Maaka le afafine o Apisaloma.
3Na savali o ia i agasala uma a lona tamā na ia faia e muamua ia te ia; ua le atoatoa lona loto ia Ieova lona Atua, e pei o le loto o lona tamā o Tavita.
4A e peitai ona o Tavita ua foaiina e Ieova lona Atua ia te ia o le lamepa i Ierusalema, i le faatuina o lona atalii ina ua mavae atu o ia, ma le faatumauina o Ierusalema.
5Auā na faia e Tavita o mea e tusa i luma o Ieova, na ia le liliu ese i se mea e tasi na ia fetalai mai ai ia te ia, i aso uma lava o lona ola, ua na o le mea na ia faia ia Uria le sa Hetī.
6Ua utu tau Reopoamo ma Ierepoamo i tausaga uma o lona ola.
7O toe o mea na faia e Aviama, ma mea uma na ia faia, e lei tusia ea i le tusi o tala i nofoaiga a tupu o Iuta? Na utu tau foi Aviama ma Ierepoamo.
8Ua taoto Aviama faatasi ma ona tamā, ua latou tanu foi ia te ia i le aai a Tavita; ona soloai ane lea o Asa lona atalii e fai ma tupu.
9O le lua sefulu o tausaga o Ierepoamo le tupu o Isaraelu na fai ai Asa ma tupu o Iuta.
10E fagafulu ma le tasi o tausaga na fai ai o ia ma tupu i Ierusalema. O le igoa foi o lona tinā o Maaka le afafine o Apisaloma.
11Ua amiotonu foi Asa i luma o Ieova, e pei o Tavita lona tamā.
12Ua ave ese e ia tagata faasotoma i le nuu, ma na aveesea tupua uma na faia e ona tamā.
13O Maaka foi lona tinā, ua ia aveesea o ia ia le fai o ia ma sa‘o tamaitai, auā na ia faia le tupua o Asaira; ua ta i lalo e Asa o lana tupua, ma susunuina i le alia o Ketarono.
14A e lei aveesea o mea maualuluga; a o le loto o Asa na atoatoa lea ia Ieova i ona aso uma.
15Ua au mai foi e ia i le fale o Ieova o mea na faasaina e lona tamā, ma mea foi na faasaina e ia, o ario, ma auro, ma ipu.
16Na utu tau Asa ma Paasa le tupu o Isaraelu i o la aso uma.
17Ona alu ae ai lea o Paasa le tupu o Isaraelu i Iuta, ua ia faia foi Rama, ina ia le mafai ai se tasi ona sau pe alu atu ia Asa le tupu o Iuta.
18Ona ave lea e Asa o le ario ma le auro uma ua totoe i oloa o le fale o Ieova, ma oloa o le fale o le tupu, ua avatu ai i lima o ana auauna; ua avatua foi e le tupu o Asa ia Peniata le atalii o Taperimoni le atalii o Hesiona, le tupu o Suria, o le sa nofo i Tamaseko, ua faapea atu,
19O loo ia te i taua le feagaiga a oe, o lo‘u tamā foi ma lou tamā; faauta, ua ou avatu ia te oe me alofa, o ario ma auro; ina e maliu mai ia, ma tatala la oulua feagaiga ma Paasa le tupu o Isaraelu, ina ia alu ese ia ia te au.
20Ona faalogo lea o Peniata i le tupu o Asa, ma ia aauina atu i aai o Isaraelu o e avea ‘au sa ia te ia, ma na fafasi i Iono, ma Tanu, ma Apela Petemaaka, ma Kinereta uma, i le ma le nuu uma o Nafatali.
21Ua faalogo ai Paasa, ona tuua lea e ia ona fai o Rama; ua nofo foi o ia i Tiresa.
22Ona tala‘i atu ai lea e le tupu o Asa ia Iuta uma, ua le tuu sa‘oloto se toatasi; ona latou ave ese lea o maa o Rama ma ona laau na fai ai le galuega e Paasa, a ua fai a‘i e le tupu o Asa o Kipea i Peniamina, ma Mesepa.
23O toe o mea uma na faia e Asa, ma lona fitafita uma ma mea uma na ia faia, ma aai na ia faia, ua le tusia ea ia i le tusi o tala i nofoaiga a tupu o Iuta? A ua oo ina toeaina, ona ma‘i ai lea o ia i ona vae.
24Ua taoto Asa faatasi ma ona tamā, ua tanumia foi o ia faatasi ma ona tamā i le aai a Tavita lona tama; ona soloai ane lea o Iosefatu lona atalii e fai ma tupu.
25O le lua o tausaga o Asa le tupu o Iuta, na fai ai Natapu le atalii o Ierepoamo ma tupu o Isaraelu, e lua tausaga na fai ai o ia ma tupu ia Isaraelu.
26Ua amio leaga foi o ia i luma o Ieova, ua ia savali foi i le ala o lona tamā ma lana agasala na ia faatupuina ai le agasala ia Isaraelu.
27Ua foua o ia e Paasa le atalii o Akia o le aiga o Isakara; ua fasia foi o ia e Paasa i Kipetonu o le aai a Filisitia; auā na vagaia Kipetonu e Natapu ma Isaraelu uma.
28Ua fasiotia o ia e Paasa i le tolu o tausaga o Asa le tupu o Iuta; ua fai foi o ia ma tupu e sui a‘i ia.
29Ua fai o ia ma tupu, ona ia fasiotia lea o le aiga uma o Ierepoamo; ua ia le faatoeina se tasi tagata ola ia Ierepoama, a ua faaumatia lava, e tusa ma le afioga a Ieova na ia fetalai mai ai na aumaia e lana auauna o Akia o le Sailo,
30ona o agasala a Ierepoamo na ia faia, ma agasala foi a Isaraelu na ia faatupuina i lona faaonoono na ia faaonoono ai ia Ieova le Atua o Isaraelu.
31O toe o mea na faia e Natapu, ma mea uma na ia faia, e lei tusia ea ia i le tusi o tala i nofoaiga a tupu o Isaraelu?
32Na utu tau Asa ma Paasa le tupu o Isaraelu i o la aso uma.
33O le tolu o tausaga o Asa le tupu o Iuta ua fai ai Paasa le atalii o Akia ma tupu o Isaraelu uma i Tiresa; e lua sefulu ma le fa tausaga o lana nofoaiga.
34Ua amio leaga ia i luma o Ieova, ua ia savali foi i le ala o Ierepoamo, ma lana agasala na ia faatupuina ai le agasala ia Isaraelu.
Who We AreWhat We EelieveWhat We Do
2025 by iamachristian.org,Inc All rights reserved.
