1O Igoa nei o atalii o Isaraelu e na o atu i Aikupito faatasi ma Iakopo, e taitasi ma lona aiga na o atu ai;
2o Reupena, o Simeona, o Levi, ma Iuta,
3o Isakara, o Sepulona, ma Peniamina,
4o Tanu, ma Nafatali, o Kato, ma Asera.
5O tagata uma na fanaua e Iakopo e toafitugafulu i latou, a o Iosefa sa i ai o ia i Aikupito.
6Ua oti foi Iosefa, ma ona uso uma, atoa ma lea lava tupulaga uma;
7a ua fanafanau le fanauga a Isaraelu, ua matuā faatoateleina, ua uluola, ma ua faasilisili ona toatele, ua tumu lava le nuu ia te i latou.
8Ona nofo mai lea i le malo o Aikupito o le tupu fou na te lei iloa Iosefa.
9Ua ia fai atu i lona nuu, Faauta, o le nuu o le fanauga a Isaraelu ua sili ona toatele ma le malosi ia i tatou;
10ina o mai ia, ina tatou togafiti poto ia i latou, ne‘i tupu tele, ona iu ai lea, pe a oo se taua, ina ‘au faatasi i latou ma e ‘ino‘ino mai ia i tatou, ma latou tau mai ia i tatou, ma o ese i le nuu nei.
11Ona latou tofia ai lea o e pule i galuega ia te i latou, ina ia latou faatiga ia te i latou i a latou avega mamafa; ua latou faia foi mo Farao o aai e tuu ai oloa, o Pitoma ma Ramese.
12Ua latou faatiga ia i latou, ua atili ai ona faatoateleina, ua atili ai foi ona tutupu; ua atuatuvale i latou i le fanauga a Isaraelu.
13Ua faapologaina a Aikupito le fanauga a Isaraelu i le faasaua.
14Ua latou faafiufiu foi ia i latou i le galuega mamafa, i le omea, ma maaomea, ma galuega uma i fanua; o a latou galuega uma lava na latou faapologaina ai latou, ua faia ma le faasaua.
15Ua fai atu foi e tupu o Aikupito i e na faatosaga i fanauga o fafine Eperu, o le igoa le tasi o Sepela,
16o le igoa foi o le tasi o Pu‘a, ua faapea atu, Pe a oulua faatosaga i fanauga o fafine Eperu, a oo ina a fanau, afai o se tama ia fasioti ia te ia, a e afai o se teine ia ola ia.
17A ua matatau i le Atua e na faatosaga i fanauga, e lei faia foi le mea na fai atu ai le tupu o Aikupito ia te i laua, a ua la faaola lava i tama tane.
18Ona aami atu lea e le tupu o Aikupito e na faatosaga i fanauga, ma fai atu ia te i laua, Se a ea le mea ua oulua fai ai lenei mea ina ua lua faaolaina o tama tane?
19Ona fai mai lea e na faatosaga i fanauga ia Farao, Auā e le pei o fafine o Aikupito o fafine Eperu; auā e malolosi lava i latou, ua uma ona latou fanau mai, a o lei oo atu ai lava lē faatosaga i fanauga.
20Ua agalelei le Atua i e na faatosaga i fanauga; ua faatoateleina le nuu, ua malolosi lava i latou.
21Ua matatau i le Atua e na faatosaga i fanauga, o le mea lea na ia fai aiga mo i laua.
22Ua fai atu foi Farao i lona nuu uma lava, o loo faapea atu, O tama uma lava e fanau mai ia outou lafo i le vaitafe, a o teine uma lava ia outou faaolaina.
Who We AreWhat We EelieveWhat We Do
2025 by iamachristian.org,Inc All rights reserved.
