1O ona po o Aasa le atalii o Iotama, o le atalii lea o Usia le tupu o Iuta, na o ae ai i Ierusalema o Resina le tupu o Suria, ma Peka le atalii o Remalia le tupu o Isaraelu, e tau ai le taua, a ua le mafai ona manumalo i ai.
2Ua ta‘u atu foi i le aiga o Tavita, ua faapea atu, O loo fesoasoani Efaraima ia Suria; ona gatete ai lea o lona loto, ma loto o lona nuu, pei ona luluina o laau o le vao i le matagi.
3Ona fetalai mai ai lea o Ieova ia Isaia, Alu ia e faafetaiai ia Aasa, o oe, ma lou atalii o Sarasopa, i le pito alāvai i le lepa aupito i luga, i le ala tele i le fanua o le taofu,
4ma ia e fai atu ia te ia, Ia oe, ia e fifilemu, aua e te fefe, aua ne‘i faavaivai foi lou loto ona o ia i‘u aulama e lua ua pupusa, o le ita tele lea o Resina ma Suria, atoa ma le atalii o Remalia.
5Auā ua taupulepule e fai se mea leaga ia te oe e Suria, Efaraima, ma le atālii o Remalia, ua faapea ane,
6Ia tatou o ae i Iuta, ma faaatuatuvale ia te i latou, ia tatou lepetia se ala mo i tatou, ma ia tatou faatuina ai se tupu, o le atalii o Tapala lea.
7O loo faapea ona fetalai mai o le Alii o Ieova, E le tu lea mea, e le oo lava.
8Auā o le ulu o Suria, o Tamaseko lea; o le ulu foi o Tamaseko, o Resina lea; a oo foi i le onogafulu ma le lima o tausaga, ona lafoia ai lea o Efaraima, e le toe fai ma nuu.
9O le ulu foi o Efaraima, o Samaria lea; o le ulu foi o Samaria, o le atalii o Remalia ia; afai tou te le faatuatua, ona le faatumauina ai lea o outou.
10Ua toe fetalai mai Ieova ia Aasa, ua faapea mai,
11Ia e fai mai se faailoga e faia e Ieova lou Atua, ia e fai mai se mea i lalō, po o se mea i lugā.
12Ona fai atu ai lea o Aasa, Ou te le fai atu lava, ou te le faaonoono ia Ieova.
13Ona fai atu ai lea o ia, Ina faalogologo mai ia le aiga o Tavita, Se mea itiiti ea ia te outou ona faatigaina o tagata, tou te faatigaina ea lo‘u Atua?
14O le mea lea e tuuina mai ai e le Alii lava le faailoga ia te outou; faauta, e to le taupou, ma fanau mai se tama tane; na te faaigoa foi ia te ia o Emanuelu.
15E ‘ai e ia le suāsusu to‘a ma le meli, seia iloa e ia ona tetee atu i le leaga, a e filifili i le lelei.
16Auā a o lei iloa e le tama ona tetee atu i le leaga mona filifili i le lelei, e tuua e ona tupu e lua o le nuu ua leaga ia te oe.
17E faaoo mai e Ieova ia te oe, ma lou nuu, atoa ma le aiga o lou tamā, o aso e lei faapea ona oo mai talu ona po na te‘a eseese ai Efaraima ma Iuta; o le tupu lea o Asuria.
18O lea aso foi e mapumapu atu ai Ieova i le lago o loo i mulivai o vaitafe o Aikupito, ma le lago meli o loo i le nuu o Asuria.
19Ona latou o uma mai ai lea, ma nonofo i alia, ma māvaevae o papa, ma laau tuitui uma, atoa ma taaga uma lava.
20O lea aso e tafi ai e le Alii, i le tafi ua tauia, mai ona tala atu o le vaitafe, o le tupu o Asuria foi lea, e tafia le ulu, ma fulufulu o vae, e salaeseina foi atoa ma le ‘ava.
21O lea aso foi e fafaga ai e le tagata o le povi fafine taanoa ma mamoe e lua.
22E ‘aina e ia o le suāsusu to‘a ona o le tele o le suāsusu e maua mai ai; auā e aai le suāsusu to‘a ma le meli e i latou uma o e totoe i totonu o le nuu.
23O lea aso foi e i ai o laau talatala ma laau tuitui i mea uma sa i ai vine e afe, e faatatauina i tupe e afe.
24Latou te o mai ai ma u fanafana ma aufana; auā e avea le nuu uma ma laau talatala ma laau tuitui.
25O mauga uma foi ua galuea‘iina i le suo, e te le alu atu i ai ina ua fefe i laau talatala ma laau tuitui, a e ave i ai povi, e tataa ai foi mamoe.
Who We AreWhat We EelieveWhat We Do
2025 by iamachristian.org,Inc All rights reserved.
