TEUTERONOME, 20 - Samoan Old Version Bible

O LE MATAUPU XX.O upu a le faitāulaga ma le au faipule i le nuu pe a o i le taua.

1A ē alu atu e tau ai se taua ma lou fili; a ē ilo atu solofanua, ma kariota, ma le nuu e sili ona toatele ia te oe, aua ne‘i e fefe ia te i latou; auā o ia te oe Ieova lou Atua, o le na aveina ae oe ai le nuu o Aikupito.

2A latalata ona outou tau, ona faalatalata atu lea o le faitaulaga, ma tautalatala i le nuu,

3e faapea atu ia te i latou, Isaraelu e, faalogo mai ia, ua outou faalatalata atu i le aso nei e tau le taua ma o outou fili; aua ne‘i faavaivai o outou loto, aua tou te fefefe, aua tou te matatau, aua foi tou te gatete ia te i latou;

4auā o Ieova lo outou Atua tou te o ma ia, na te tau ai la outou taua ma o outou fili, na te faaolaina outou.

5Ia fai atu foi le au faipule i le nuu, ia faapea atu, O ai se tagata ua faia sona fale fou, a e lei faaulufaleina? Ina alu o ia, ina foi atu i lona fale, ne‘i oti o ia i le taua, ona faaulufaleina ai lea e se tasi.

6O ai foi se tagata ua faia se tovine, a e lei faatatagaina? Ina alu ia, ina foi atu i lona fale, ne‘i oti o ia i le taua, ona faatatagaina ai lea e se tasi.

7O ai foi se tagata ua la fai le feagaiga ma se fafine e fai mana avā, a e lei faatasia? Ina alu ia, ina foi atu i lona fale, ne‘i oti o ia i le taua, ona fai ai lea o ia ma avā a se tasi tagata.

8Ia toe tautala atu foi le au faipule i le nuu, ia latou faapea atu, O ai ea se tagata e fefe, ma faavaivai lona loto? Ina alu ia, ma foi atu i lona fale, ne‘i faavaivai loto o ona uso e pei o lona loto.

9A uma foi ona tautala atu o le au faipule i le nuu, ona tofia lea e i latou o alii e ave ‘au e ta‘ita‘iina le nuu.

10A ē faalatalata i se aai e tau ai le taua, ona e valaau atu lea i ai ia ola le taua;

11afai foi e tali mai i latou ia te oe, ina ola ia, ma latou faaavanoa faitotoa ia te oe, ona avea ai lea o tagata uma e maua ai ma ē au mai taulaga ia te oe, ma latou auauna ia te oe.

12A e afai e le mafai ia te i latou ona fai o se leleiga ma oe, a e fia tau lava i latou ma oe, ona e siosioina atu ai lea;

13pe a tuuina mai foi e Ieova lou Atua ia te oe, ia e fasiotia tane uma lava o i ai i le pelu;

14na o fafine, ma tama iti, ma manu vaefa, ma mea uma lava o i le aai, o le oloa uma o i ai e te vetea mou; e te ‘ai foi i mea a ou fili, ua foaiina mai e Ieova lou Atua ia te oe.

15Ia faapea ona e fai i aai uma ē matuā vava mamao ma oe, e le ni aai ia o na nuu.

16A o aai o na nuu e foaiina mai e Ieova lou Atua ia te oe e fai mou tofi, aua ne‘i e faaolaina ai se tasi e ola.

17A ia e matuā faaumatia i latou; o sa Hetī, ma sa Amorī, o sa Kananā, ma sa Perisē, o sa Hivī, ma sa Iepuse; e pei ona fetalai mai o Ieova lou Atua ia te oe;

18ina ne‘i latou a‘oa‘o mai ia te outou e fai e tusa ma a latou mea inosia uma, ua latou faia i o latou atua; ona outou agasala ai lea ia Ieova lo outou Atua.

19Afai foi e tele ni aso ua e siosioina ai se aai, ma tau ai le taua ina ia maua, aua ne‘i e faataumaoi ona laau i ta a‘i i le mătau; auā e te ‘ai ai, aua e te ta i lalo e fai a‘i se mea i le siosioina o le aai, (auā o le laau o le fanua mo tagata ia).

20Na o laau ua e iloa e le ni laau aina ia, e te faataumaoi ma ta i lalo; e te faia foi se ‘olo e faafeagai ma lea aai lua te tau ai le taua, seia faatoilaloina.