1Amuia le tagata ua faamagaloina lona solitulafono, ma ua ufitia lana agasala.
2Amuia le tagata e le ta‘usalaina e Ieova, e leai foi se ‘ole‘olega i lona loto.
3Na ou faalologo, ona palagia ai lea o o‘u ivi i lo‘u faataio i le aso atoa;
4auā sa mamafa lou aao i luga ia te au i le ao atoa foi ma le po; ua liua lava lo‘u malosi i le vevela o le tausaga vevela. Selā.
5Ona ou faailoa atu ai lea ia te oe o la‘u agasala, na ou le ufitia foi la‘u amioletonu; sa ou faapea, Ou te faaali atu ia Ieova o‘u solitulafono; ona e aveesea ai lea o le leaga o la‘u agasala. Selā.
6O le mea lea e tatalo atu ai ia te oe o e amio Atua uma lava, i ona po e maua ai oe; e moni, e le oo ia te i latou tafega o vai e tele.
7O oe lava lo‘u lafitaga, e te leoleoina a‘u i le puapuaga, e te siosiomia a‘u i siva o le olataga. Selā.
8Ou te a‘oa‘o ia te oe, ma faasino ia te oe i lea lava ala e te savali ai; ou te faatonu ia te oe, ma ou vaai ia te oe.
9Aua e te faapei o le solofanua, po o le falata, e le o i ai se mafaufau, o latou teuga o le faagutu ma le taofi e taofi ai, auā ua latou le faalatalata mai ia te oe.
10E tele mea tiga e oo i e amio leaga; a o lē faatuatua ia Ieova e siomia o ia i le alofa.
11Ina fiafia ia ia Ieova, ma olioli o outou o e amiotonu; ina alalaga ia ma le fiafia o outou uma o e ua faamaoni o outou loto.
Who We AreWhat We EelieveWhat We Do
2025 by iamachristian.org,Inc All rights reserved.
