1Ua fetalai mai foi Ieova ia Mose, ua faapea mai,
2Ina fai ane ia ia Arona, ma ona atalii, atoa ma le fanauga uma a Isaraelu, ia faapea ane ia i latou, O lenei le mea ua poloai mai ai Ieova, ua faapea mai.
3Ai se tagata o le aiga o Isaraelu, na te fasi se povi poa, po o se tamai mamoe, po o se ‘oti, i le toagālauapi, pe fasi i tua o le toagālauapi;
4a ua le aumaia i le faitotoa o le fale fetafai o le faapotopotoga e avatu ai le taulaga ia Ieova i luma o le malumalu o Ieova, e ta‘ua lea tagata o le faamaligi toto; ua faamaligiina e ia le toto, e vavaeeseina lea tagata i lona nuu,
5ina ia aumaia e le fanauga a Isaraelu a latou taulaga latou te fai taulaga ai i le vao, ia latou aumaia lava ia Ieova i le faitotoa o le fale fetafai o le faapotopotoga i le faitaulaga; latou te fai taulaga ai, o taulaga faafetai ia Ieova.
6E sausauina foi e le faitaulaga le toto i luga o le fata faitaulaga o Ieova i le faitotoa o le fale fetafai o le faapotopotoga, e susunu foi le ga‘o e fai ma mea manogi lelei ia Ieova.
7Latou te le toe faia foi a latou taulaga i aitu, sa latou mulimuli atu ai e mulilulua ai; o le tulafono lena e faavavau ia i latou i o latou tupulaga amuli.
8E te fai ane foi ia i latou, Ai se tagata o sa Isaraelu, po o so se tagata ese e āumau ia te i latou, na te faia se taulaga mu, po o se isi taulaga,
9a e le aumaia i le faitotoa o le fale fetafai o le faapotopotoga e sauni ai ai Ieova; e vavaeeseina lava lea tagata i lona nuu.
10Ai se tagata foi o sa Isaraelu, po o so se tagata ese ua āumau ia te i latou, na te ‘aina sina toto lava; ou te fai mo‘u fili lea tagata na te ‘aina le toto, ma ou vavae ese ia te ia i lona nuu.
11Auā o i le toto le ola o le tino; ua ou tuuina atu ai foi ia te outou e fai a‘i le togiola mo outou i luga o le fata faitaulaga; auā o le toto o le mea lava lea e fai a‘i le togiola mo le tagata.
12O le mea lava lea na ou fai atu ai i le fanauga a Isaraelu, Aua le ‘aina ni toto e so outou, aua le ‘aina foi le toto e se tagata ese e aumau ia te outou.
13Ai se tagata foi o le fanauga a Isaraelu, po o so se tagata ese ua āumau ia te i latou, na te tulia se manu o le vao, po o se manu lele e ‘aina; ia faamasaaina lava e ia lona toto, ma ufiufi ai i le eleele.
14Auā o le ola lea o mea ola uma; o lo latou toto, o lo latou ola lava lea; o le mea lava lea na ou fai atu ai i le fanauga a Isaraelu, Aua tou te aai i le toto o se mea ola; auā o le ola o mea uma o lo latou toto lava lea; ai se ‘ai ai e vavaeeseina o ia.
15Ai se tagata foi ua ‘ai i se mea ua mate, po o se mea ua saeia, o se tama a le eleele, po o se tagata ese, na te taia ona ofu, ma taele i le vai, e leaga foi o ia seia oo i le afiafi; ona mamā ai lea.
16A e afai na te le taia ona ofu, ma ua le taele lona tino, ona nofo sala lava lea o ia.
Who We AreWhat We EelieveWhat We Do
2025 by iamachristian.org,Inc All rights reserved.
