1Ua uma ona fai e Solomona o le fale o Ieova, ma le fale o le tupu, ma le finagalo uma o Solomona na ia finagalo e fai;
2ona faaali mai lea o Ieova ia Solomona, o le atu lua lea, e pei ona faali mai o ia ia te ia i Kipeona.
3Ua fetalai mai Ieova ia te ia, Ua ou faalogo i lau tatalo, ma lau aioi, na e aioi mai i o‘u luma; ua ou faapaiaina lenei fale ua e faia e tuu ai lo‘u igoa e faavavau; e faasaga i ai o‘u mata ma lo‘u loto i aso uma.
4Afai foi e te savali i o‘u luma, e pei ona savali lou tamā o Tavita, ma le loto sao, ma le amio sa‘o, ina ia fai e tusa ma mea uma ua ou fai atu ai ia te oe, ma e tausia a‘u tulafono ma a‘u faamasinoga;
5ona ou faatumauina lea o le nofoālii o lou malo i Isaraelu e faavavau, e faapei ona ou fai atu ai i lou tamā o Tavita, ua faapea atu, E le motu lou gafa i le nofoālii o Isaraelu.
6A e afai e te liliu ese, a e le toe mulimuli mai ia te au, o outou po o a outou fanau, ma outou le tausia a‘u poloaiga ma a‘u tulafono ua ou tuuina atu i o outou luma; a e o atu outou, ma outou auauna atu i atua ese, ma ifo atu ia te i latou;
7ona ou faaumatia lea o Isaraelu ai le fogāeleele ua ou foaiina atu ia te i latou; o lenei fale foi ua ou faapaiaina mo lo‘u igoa, ou te lafoai atu ai i o‘u luma; e avea foi Isaraelu ma upu faatusa, ma tauemuga i nuu uma lava.
8O lenei fale foi o loo ua maualuga, e ofo i ai o i latou uma o e ui ane, ma uisa, ma fai ane, Se a le mea ua faapea ai ona fai e Ieova i lenei nuu, ma lenei fale?
9Ona tali mai lea o i latou, Auā ua latou tuua Ieova lo latou Atua o le na aumaia o latou tamā mai le nuu o Aikupito, a e latou taofi i atua ese, ma ifo atu ia te i latou, ma auauna atu ia te i latou; o le mea lea ua faaoo ai e Ieova lenei malaia uma ia te i latou.
10Ua mavae tausaga e luafulu, na fai ai e Solomona o fale e lua, o le fale o Ieova, ma le fale o le tupu,
11(na au mai ai e Hiramo o le tupu o Turo ia Solomona, o laau o arasi, ma laau o perosi, ma auro, e tusa ma mea uma na ia loto i ai,) ona avatu lea e le tupu o Solomona ia Hiramo o aai e luafulu i le nuu o Kalilaia.
12Ona sau lea o Hiramo mai Turo e matamata i aai na avatu e Solomona ia te ia; a ua le tatau ia aai ia te ia.
13Ona faapea mai ai lea o ia, Lo‘u uso e, o a ea ia aai ua e aumaia ia te au? Ua ia faaigoa foi i ai, o le nuu o Kapula, ua oo i ona po nei.
14Ua au mai foi e Hiramo i le tupu o auro e selau ma le luafulu o taleni.
15O le mea foi lenei na totogi ai e le tupu o Solomona o tagata; ia faia le fale o Ieova, ma lona fale, ma Milo, ma le pa o Ierusalema, ma Hasora, ma Mekito, ma Kasera.
16Auā na alu ae Farao le tupu o Aikupito, na ia faoa foi Kasera, na ia faamuina foi i le afi, ma ia fasiotia o sa Kananā e na nonofo i le aai, ua na avatu foi e fai ma mea avaga mo lona afafine o le avā a Solomona.
17Ua fai foi e Solomona o Kasera, ma Peteorana i lalo,
18ma Paalata, ma Tatemora i le vao i le nuu,
19Ma aai uma sa ia Solomona e tuu ai oloa, ma aai mo kariota, ma aai mo e tietie i solofanua, ma mea uma na finagalo i ai Solomona e fai i Ierusalema, ma Lepanona, ma nuu uma e pule ai o ia.
20O tagata uma na totoe o sa Amorī, ma sa Hetī, ma sa Perise, ma sa Hivī, ma sa Iepusē, o i latou e le o le fanauga a Isaraelu;
21o le fanauga i latou a e na totoe i le nuu ina ua mavae atu i latou, o i latou na le mafai e le fanauga a Isaraelu ona faaumatia, na faia i latou e Solomona ma pologa, e oo lava i ona po nei.
22A ua le faia e Solomona ni o le fanauga a Isaraelu ma pologa; a o tagata tau i latou, ma ana auauna, ma ona alii, ma alii ave ‘au, ma alii e pule i ana kariota, ma ana ‘au e tietie i solofanua.
23O alii nei na tofia e pule i le galuega a Solomona, e lima selau ma le toalimagafulu o i latou, na pule i le nuu e na faia le galuega.
24Na alu ae foi le afafine o Farao ai le aai a Tavita i lona fale na faia mo ia e Solomona; ona fai ai lea e ia o Milo.
25E taiatutolu foi i tausaga ona faia o Solomona o taulaga mu, ma taulaga faafetai i luga o le fata faitaulaga na ia faia mo Ieova; ua ia faamuina foi mea manogi i le fata ua i luma o Ieova. Ua faaumaina ona fai o le fale.
26Ua faia foi e le tupu o Solomona o le fua i Esiokape, ua felatai ma Elata i le matafaga o le sami Ulaula i le nuu o Etoma.
27Na aauina atu e Hiramo o ana auauna i le fua, o tagata tautai na masani ma le sami, e faatasi ma auauna a Solomona.
28Ua latou o atu i Ofeira, ma au mai ai auro e fa selau ma le luafulu o taleni; ma latou au mai ai i le tupu o Solomona.
Who We AreWhat We EelieveWhat We Do
2025 by iamachristian.org,Inc All rights reserved.
