FAAALIGA, 6 - Samoan Old Version Bible

O LE MATAUPU VI.O le tatalaina o faamaufaailoga.

1Na a‘u iloa atu foi ua tatalaina e le Tamai mamoe le tasi o faamaufaailoga, ona ou faalogo ai lea i le tasi o mea ola e fa, ua leo i le faititili, ua faapea mai, Sau ia ina vaai.

2Ona ou vaai ai lea, faauta foi, o le solofanua sinasina, ua i ai le aufana i loo tietie ai; ua avatu foi ia te ia le palealii; ona alu atu lea o ia, o loo manumalo, o le a manumalo pea ia.

3Ua tatalaina foi e ia o lona lua o faamaufaailoga, ona ou faalogo ai lea i lona lua o mea ola, o loo faapea mai, Sau ia ina vaai.

4Ona alu atu lea o le isi solofanua mūmū; ua avatu foi le pule i loo tietie ai na te aveeseina le filemu i le lalolagi, a e latou te fefasiai ai; ua avatu foi ia te ia le pelu tele.

5Ua tatalaina foi e ia o lona tolu o faamaufaailoga, ona ou faalogo ai lea i lona tolu o mea ola, o loo faapea mai, Sau ia ina vaai. Ona ou vaai lea, faauta foi, o le solofanua uliuli; ua i le lima o loo tietie ai le fua faatautau.

6Na ou faalogo foi i le leo mai le va o mea ola e fa, ua faapea mai, O le tau o le koini o le saito o le tenari lea, o le tau o koini e tolu o le karite o le tenari foi lea; a e aua e te faaleaga i le suāuu ma le uaina.

7Ua tatalaina foi e ia o lona fa o faamaufaailoga, ona ou faalogo ai lea i le leo o lona fa o mea ola, ua faapea mai, Sau ia ina vaai.

8Ona ou vaai lea, faauta, o le solofanua samasama, ma lē tietie ai, o lona igoa o le Oti, ua mulimuli atu foi Seoli ia te ia; ua avatu foi ia te i laua le pule e fasioti i lona fa o vaega o le lalolagi i le pelu, ma le oge, ma le oti, atoa ma manu feai o le vao.

9Ua tatalaina foi e ia o lona lima o faamaufaailoga, ona ou iloa lea o i lalo ifo o le fata faitaulaga o agaga o e na fasiotia ona o le afioga a le Atua, ma le mau na latou taofi mau ai;

10ua latou alalaga foi ma le leo tele, ua faapea atu, Le Alii e, le paia ma le faamaoni e te le faamasino ea ma taui i lo matou toto i e nonofo i le lalolagi seia afea?

11Ua foaiina atu ia te i latou taitoatasi ofu sisina; ua fai atu foi ia te i latou ia latou faatalitali lemu seia toe itiiti, seia atoatoa mai ai o latou uso a auauna atoa ma o latou uso, o le a fasiotia pei o i latou lava.

12Na a‘u iloa atu foi ua tatalaina e ia o lona ono o faamaufaailoga, faauta foi, o le mafuie tele, o le la foi ua liua ua uliuli e pei o le ie fulufulu talatala, o le masina foi ua liua e pei o le toto,

13o fetu foi o le lagi ua pauu i le lalolagi, e pei o le mati ona toulu o ona fua moto pe a luluina e le matagi tetele;

14ua mavae atu foi le lagi pei o se tusi ua taaia, o mauga ma motu uma foi ua aveeseina i mea sa i ai;

15o tupu foi o le lalolagi, ma alii sili, ma e ua tamaoaiga, ma ta‘ita‘i o ‘au e taitoaafe, ma e ua malolosi, ma pologa uma, atoa ma tama a le eleele uma ua latou lalafi i ana ma papa o mauga;

16ua latou fai atu foi i mauga ma papa, Mafuli mai ia ia te i matou, ma tanumai i matou ai le silafaga a lē tietie i le nofoālii, ma le toasa o le Tamai mamoe;

17auā ua oo mai le aso tele o lona toasa, o ai foi se na te mafaia ona tu atu?