1Le Atua e, ua oo mai nuu ese i lou tofi; ua latou faaleagaina lou malumalu paia; ua latou faia Ierusalema ma faupuegāmaa.
2Ua latou avatu tino o au auauna ua oti e fai ma mea e ‘ai a manu felelei, ua avatu tino o ou tagata amio Atua i manu feai e tataa.
3Ua latou faamaligi o latou toto e pei o le vai, ua soo ai Ierusalema; na leai foi se na te tanua i latou.
4Ua avea i matou ma gao a ē ua matou tuaoi, o ulaga ma tauemuga a e ua vagavagai mai ia te i matou.
5Ieova e, e te toasa mai seia afea? E faavavau ea? E mu ea pei o le afi lou fuā?
6Ia e sasaaina atu lou toasa tele i nuu ese o e le iloa oe, atoa ma malo o e le valaau i lou suafa.
7Auā ua latou ‘aina Iakopo, o le mea foi sa nofo ai o ia ua latou faatafunaina lea.
8Aua e te manatua a matou agasala anamua; ia vave ona tomua mai o lou alofa mutimuti vale ia te i matou; auā ua matuā vaivai i matou.
9Le Atua o lo matou faaolataga e, ia e fesoasoani mai ia te i matou ona o lou suafa mamalu; ia e laveai mai foi ia te i matou, ma ia e faamagaloina a matou agasala ona o lou suafa.
10Se a le mea e fai ane ai o nuu ese, O ifea o i ai lo latou Atua? Ia iloa i nuu ese o loo i o matou luma le taui o le toto o au auauna na faamaligiina.
11Ia oo atu ia te oe le auega a le ua fusifusia; e tusa ma lou aao malosi ia e faasaoina e ua tuu e oti;
12ma ia e taui faafitu atu i fatafata o e ua matou tuaoi a latou upu na latou faifai ai ia te oe le Alii.
13O i matou foi o lou nuu ma le lafu mamoe na e fagaina, matou te vivii ia te oe e faavavau; matou te ta‘uta‘u atu ou viiga i lea tupulaga ma lea tupulaga.
Who We AreWhat We EelieveWhat We Do
2025 by iamachristian.org,Inc All rights reserved.
