1Le au uso e, ou te loto ina ia outou iloa, sa i lalo o le ao o tatou tamā uma, ma ui ane uma i le sami,
2ma papatisoina uma ia Mose i le ao ma le sami,
3ma aai uma i le mea e ‘ai e tasi faaleagaga, ma feinu uma i le vai e tasi faaleagaga;
4auā na latou inu i le papa faaleagaga sa mulimuli atu ia te i latou, o lena papa foi o Keriso lea;
5a e peitai o le toatele o i latou ua le fiafia i ai le Atua, auā na faataatitia solo o latou tino i le vao.
6Na fai foi na mea ma faailoga mo i tatou, ina ne‘i tatou tu‘inanau atu i mea leaga, pei ona tu‘inanau lava i latou.
7Aua foi tou te ifo i tupua, pei o isi o i latou, pei ona tusia, Sa nonofo le nuu i lalo ma aai ma inu, ona latou tutū lea i luga e sisiva.
8Aua foi tatou te faitaaga, pei ona faitaaga o isi o i latou, ma fano ai i le aso e tasi e lua sefulu o afe ma afe e tolu.
9Aua foi tatou te faaonoono ia Keriso, pei ona faaonoono o isi o i latou, ma fano ai i gata.
10Aua foi tou te muimui, pei ona muimui o isi o i latou, ma fano ai i le na te olopalaina.
11Na oo na mea uma ia te i latou e fai ma faailoga; ua tusia foi e fai ma apoapoaiga mo i tatou o e ua aulia mai ai tausaga e gata ai.
12O lenei, o lē manatu o loo o tu ia, ina faaeteete ia ne‘i paū.
13Ua le maua outou e se tofotofoga e ese i lo tagata; a ua faamaoni le Atua, o le na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lavā oono.
14O le mea lea, au pele e, ia outou sosola ese ai i le ifo i tupua.
15Ou te fai atu i e o mafaufau; ina manatunatu ifo ia outou i la‘u e fai atu.
16O le ipu o le faafetai o tatou o faafetai ai, e le o le mafuta faatasi ea lea ma le toto o Keriso? O le areto tatou te tofitofi ai, e le o le mafuta faatasi ea lea ma le tino o Keriso?
17Auā o i tatou le toatele, o le areto e tasi ma le tino e tasi i tatou; auā ua tofutofusia i tatou uma i le areto e tasi.
18Faauta mai ia Isaraelu i la le tino; o e o aai taulaga, ua latou le tofu ea i tufaaga faatasi ma le fata faitaulaga?
19Se a foi ou te fai atu ai? O se mea aoga ea le tupua? po o se mea aoga le mea ua fasia mo tupua?
20E leai, a o mea ua fāsia e nuu ese, ua fāsia e i latou mo temoni, a e le o le Atua; ou te le loto foi ina ia outou mafuta faatasi ma temoni.
21Tou te le mafaia ona inu i le ipu a le Alii atoa ma le ipu a temoni; tou te le mafaia ona faatofutofusia i le laoai a le Alii atoa ma le laoai a temoni.
22Tatou te faaonoono ea i le Alii? Ua sili ea lo tatou malosi i lona?
23Ua tataga mea uma ia te au, a ua le aoga mea uma; ua tataga mea uma ia te au, a ua le faamafanafana mea uma.
24Aua le saili se tasi i lona lava lelei, a ia taitasi ma saili i le lelei o le isi.
25O mea uma ua faatauina i le mea e faatau ai mea e ‘ai, ia outou aai ai; aua lava le fesili ona o le loto fuatia ifo;
26auā o le lalolagi e o le Alii lea, atoa ma mea ua tumu ai.
27Afai foi e tala‘iina outou e se tasi o e le lotu, ma outou fia o atu ai, ia outou aai i mea uma ua laulauina mai ia te outou; aua lava le fesili ona o le loto fuatia ifo.
28A e afai e faapea mai se tasi ia te outou, O le mea nei ua fasia mo le tupua; aua tou te aai ai, ona o le na faaali mai ai, auā foi o le loto fuatia ifo; auā o le lalolagi e o le Alii lea, atoa ma mea ua tumu ai.
29O le loto fuatia ifo ou te fai atu ai, e le o lo‘u a o lo le tasi; auā se a le mea e faamasinoina ai lo‘u sa‘olotoga i le loto fuatia ifo o le tasi?
30O a‘u foi, afai ou te ‘ai ma le faafetai, se a le mea ua upuleagaina ai a‘u ona o le mea ua ou faafetai atu ai?
31O lenei, pe tou te aai, pe tou te inu, po o se tasi mea tou te faia, ia outou faia mea uma lava ia viia ai le Atua.
32Aua le avea outou ma mea e tautevateva ai Iutaia, po o Eleni, po o le ekalesia a le Atua;
33faapei o a‘u nei foi, ou te faafiafia atu i tagata uma i mea uma lava, o loo le sailia e a‘u so‘u lava lelei, a o lo le toatele, ina ia faaolaina ai i latou.
Who We AreWhat We EelieveWhat We Do
2025 by iamachristian.org,Inc All rights reserved.
