1Auā e tusa le malo o le lagi ma le tasi matai na alausu atu e tautala ma nisi e faigaluega i lona tovine a e taui atu.
2Ua tautala o ia ma ē faigaluega, o le aso ma le tenari; ona aauina atu ai lea e ia o i latou i lana tovine.
3O le itu aso foi e tolu ua alu atu ai o ia, ona iloa atu ai lea e ia o isi ua tutū i le malae e leai se galuega;
4ona fai atu ai lea o ia ia te i latou, Ina o atu ia outou foi i le tovine, a e ou te avatu ia te outou se mea e tusa. Ona latou o atu ai lea.
5Ua toe alu atu ia i le itu aso e ono, ma le iva, ua faapea foi ona fai.
6O le itu aso foi e sefulu ma le tasi ua alu atu ai o ia, ona iloa atu ai lea e ia nisi ua tutū e leai se galuega, ua na fai atu foi ia te i latou, Se a le mea tou te tutu mai ai iinei i le aso uma e leai se galuega?
7Ua latou fai mai ia te ia, E leai se na fai mai ia te i matou. Ua fai atu ia ia te i latou, Ina o atu ia o outou foi i le tovine, a e maua e outou se mea e tusa.
8Ua oo i le afiafi, ona fai atu ai lea o le alii e ana le tovine i lana auauna e pule, Valaau ia i e faigaluega, ma avatu le taui ia te i latou, ia afua i e na mulimuli, ia oo i e na muamua.
9Ua o mai foi o e na o ane i le itu aso e sefulu ma le tasi, ua taitasi ma latou maua le tenari.
10Ona o mai ai lea o e na muamua, fa te i latou e sili sa latou mea e maua; a ua taitasi foi o i latou ma maua le tenari.
11Ua maua ai e i latou, ona latou muimui ai lea i le matai,
12ua faapea mai, E tasi lava le itu aso na galulue ai i latou nei na mulimuli, a ua e faatusaina i latou ma i matou o e na tigaina i le galuega ma le vevela o le aso.
13Ona tali atu ai lea o ia i le tasi o i latou, ua faapea atu, Sole, e leai sa‘u agaleaga ia te oe; ta te lei tautala ea i le tenari e tasi?
14Ina tago ia i lau mea, ma alu; o la‘u pule lea e avatu lava i lenei na mulimuli e pei o a oe lava.
15E le faitalia ea a‘u ona pule i a‘u lava mea? e te faaūū mai ea ina ua ou agalelei?
16E faapea ona muamua o e na mulimuli, e mulimuli foi e na muamua; auā e toatele e ua tala‘iina, a e toaitiiti e ua filifilia.
17Ua maliu ae Iesu i Ierusalema, ona ave ai lea e ia o le au soo e toasefulu ma le toalua i le ala ua na o i latou lava, ua faapea atu ia te i latou,
18Faauta, o le a tatou o ae i Ierusalema, e tuuina atu ai le Atalii o le tagata i le au faitaulaga sili, ma le au tusiupu, latou te faasala ia te ia ia oti;
19latou te tuuina atu foi ia te ia i nuu ese, ina ia latou faatauemu, ma sasa, ma faasatauro ia te ia; a e toe faatuina o ia i le aso tolu.
20Ona sau ai lea o le tinā o atalii o Sepetaio, faatasi ma ana tama tane, ua ifo ma ole mai ia te ia i se mea.
21Ona faapea atu ai lea o ia ia te ia, Se a se mea e te manao i ai? Ua fai mai o ia ia te ia, Ia e fetalai ane, ia nonofo a‘u nei tama e toalua, o le tasi i lou itu taumatau o le isi foi i lou itu tauagavale i lou malo.
22Ona tali atu ai lea o Iesu, ua faapea atu, Lua te le iloa le mea lua te ole mai ai na. Lua te mafaia ea ona inu i le ipu o le a a‘u inu ai, ma ia papatisoina oulua i le papatisoga o le a papatisoina ai a‘u? Ua la fai mai ia te ia, Ma te mafaia.
23Ona fetalai atu ai lea o ia ia te i laua, Lua te feinu lava i la‘u ipu, o le papatisoga foi e papatisoina ai a‘u e papatisoina ai oulua; a o le nofo i lo‘u itu taumatau ma lo‘u itu tauagavale, e le o ia te au lea ona avatu, a e tau lava o e ua saunia mo i latou lea mea e lo‘u Tamā.
24Ua faalogo ai le toasefulu, ona tiga ai lea o latou loto i lea uso e toalua.
25A ua valaau atu Iesu ia te i latou, ona faapea atu lea o ia, Ua outou iloa o alii o nuu ese ua aliitai i latou, o e ua sili foi ua pule ia te i latou;
26a e le faapea outou; a o sē fia sili ia te outou, ia fai o ia ma a outou auauna;
27o sē fia muamua foi ia te outou, ia fai o ia ma a outou tautua.
28E pei o le Atalii o le tagata e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui a‘i tagata e toatele.
29Ua latou o atu nai Ieriko, ona mulimuli mai ai lea ia te ia o le motu o tagata e toatele.
30Faauta foi, ua nonofo i le au ala tagata tauaso e toalua, ua la faalogo ua maliu ane Iesu, ona la alalaga mai ai lea, ua faapea mai, Le Alii e, le alo o Tavita, ia e alofa mai ia te i maua.
31Ona vavao ai lea e le motu o tagata ia te i laua, ia la faalologo; a ua atili ai ona alalaga o i laua, ua faapea mai, Le Alii e, le alo o Tavita, ia e alofa mai ia te i maua.
32Ona tu ai lea o Iesu, ua valaau atu ia te i laua, ona faapea atu lea o ia, Se a se mea lua te mananao i ai ou te faia mo oulua?
33Ona la fai mai ai lea ia te ia, Le Alii e, ia pupula o maua mata.
34Ona mutimuti vale ai lea o le alofa o Iesu, ua pa‘i atu i o la mata; ona vaai loa ai lea o la mata, ona la mulimuli mai ai lea ia te ia.
Who We AreWhat We EelieveWhat We Do
2025 by iamachristian.org,Inc All rights reserved.
