1O loo faapea ona fetalai mai o Ieova o ‘au, le Atua o Isaraelu, ia Moapi, Oi talofa ia Nepo! auā ua faatafunaina ia; ua faamaina Kiriataima, ua aea; ua faamaina Mesekavo, ma ua faamatautia.
2E le toe viia Hesepona e Moapi, ua fai togafiti i latou e malaia ai o ia; ua latou faapea, Ina o mai ia, ia tatou faaumatia o ia, ia le toe fai ma nuu; Matameni e, e fano lava oe; e mulimuli atu le pelu ia te oe.
3O le leo o le alaga mai Horonaima, o i ai le faatafunaga ma le malaia tele.
4Ua malaia Moapi; ua pa mai le alaga a ona tama iti.
5Auā ua latou o ae lava i le aega o Luita o fetagisi; o le ifo a‘i foi mai Horonaima, ua lagona ai e ua ita mai le alaga ina ua malaia.
6Ina sosola ia, ia sao outou, ma ia avea outou e pei o le tula i le vao.
7Ua e faatuatua i mea ua e faia, ma au oloa, o le mea lea e puea ai lava oe; e alu atu foi Kimosa i le tafeaga, o ana faitaulaga ma ona alii faatasi ma ia.
8E sau foi le na te faatafunaina i aai uma, e leai se aai e sao; e fano foi le vanu, e faaumatia foi le eleele laugatasi, auā ua fetalai mai ai Ieova.
9Ia fai ni apaau mo Moapi, ina ia lele o ia ma alu ese; auā e fai ma faatafunaga ona aai, e leai se nofo ai.
10Ia faafanoina le na te faia le galuega a Ieova ma le faavaivai, ia faafanoina le ua taofia lana pelu ai le toto.
11Ua nofo filemu Moapi talu ina o taulealea o ia, ua nofo o ia i luga o lona ‘alu, e lei fesaaa‘iina o ia ai lea ipu i lea ipu, e lei alu foi o ia i se tafeaga; o le mea lea ua tumau ai lona nanamu, ua le liua lona manogi.
12O le mea lea faauta, e oo ai i ona po, ua fetalai mai Ieova, ou te aauina atu ai ia te ia nisi latou te faataoto ia te ia, ma saa ai ana ipu, ma taei i ona fagu.
13E mā foi Moapi ia Kimosa, e pei ona mā o le aiga o Isaraelu ia Peteli, o lo latou faatuatuaga.
14Pe faapefea ona outou fai mai, O toa i matou, o tagata malolosi e tau ai le taua?
15Ua faatafunaina Moapi, ma ua o ae ona aai; o ona taulelea foi na filifilia ua o ifo i latou ia fasiotia, o loo fetalai mai ai le Tupu, o Ieova o ‘au lona suafa.
16O le malaia o Moapi ua latalata ona oo mai, o le mea foi e leaga ai o ia e vave mai lava lea.
17O outou uma o e vagavagai ia te ia, ia outou faanoanoa ona o ia; o outou uma foi o e iloa lona igoa, ia outou faapea atu, E! ua gausia le tootoo malosi, o le laau matagofie.
18O oe na le tama fafine ua nofo i Tipona, ina alu ifo ia ai le mamalu, ma nofo i le nuu naumati; auā e alu ae ia te oe lē faatafunaina Moapi, na te faaumatia ou ‘olo.
19O oe na ua nofo i Aroeru, ia e tu i le ala, ma vaai atu; fesili atu i le ua sola, ma le ua sao, ia faapea atu, Po o le a ea le mea ua fai?
20Ua faamaina Moapi; auā ua lafoia o ia; ina uio ia outou ma alalaga; ina ta‘uina atu i Arinona, ua faatafunaina Moapi,
21ua oo foi le sala i le eleele laugatasi; o Holona, ma Iaesa, ma Mefata,
22ma Tipona, ma Nepo, ma Petetipelata,
23ma Kiriataima, ma Petekamulo, ma Petemeona,
24ma Kiriota, ma Posara, ma aai uma i le nuu o Moapi, e ua mamao, ma e ua lata mai.
25Ua vavaeeseina le nifo o Moapi, ma lona lima ua gausia, o loo fetalai mai ai Ieova.
26Ia outou faainu ia te ia ia onā; auā ua ia faamaualuga ia Ieova; e taafili Moapi i lona puaiga, e fai lava o ia ma tauemuga.
27E lei faia ea Isaraelu ma tauemuga ia te oe? na maua ea o ia faatasi ma tagata gaoi? auā e iloga ona e tautala ia te ia, ua e lialiai lou ulu.
28O outou o e nonofo i Moapi, ia outou tuua aai, ma outou mau i le papa; ia pei o le lupe foi outou, o le ua fai lona ofaga i itu o le gutu o le lua.
29Ua matou faalogo i le faamaualuga o Moapi, o lona matuā faamaualuga ma lona faasausili, ma lona faasiasia, ma lona faamaualuga, ma le faafefeteina o lona loto.
30O loo fetalai mai Ieova, O a‘u nei ua ou iloa lona ita, a e faatauvaa lava; o ana mea faatauvaa e le faia lava ia.
31O le mea lea ou te uio ai ona o Moapi, ma ou alaga ona o Moapi uma; e oi o ia ona o tagata o Kiriaresa.
32Le vine e o Sepema, ou te tagi ona o oe ma le tagi o Iasaru; ua sopoia le sami e ou moemoe, ua oo atu i le sami o Iasaru; ua osofia e le na te faatafunaina ou fua otata, ma lou taugāvine.
33Ua aveesea le fiafia ma le olioli i le fanua lafulemu, o le nuu o Moapi lea; ua ou faaiuina le uaina i le soligāvine; e le solia ma le alaga fiafia; o le alaga fiafia e le se alaga fiafia lea.
34Ona o le alaga a Hesepona ua latou fevalaauai e oo i Eleale, e oo lava i Iaesa, e afua mai i Soara e oo i Horonaima, o le povi fafine ua tolu ona tausaga; auā ua avea le vai o Nimara lava ma mea naumati.
35Ua fetalai mai Ieova, ou te faaumatia i Moapi, lē fai taulaga i le mea maualuga, ma lē faamu mea manogi i ona atua.
36O le mea lea e tagi ai lo‘u loto e pei o fagufagu ona o Moapi, e tagi ai foi lo‘u loto e pei o fagufagu ona o tagata o Kiriaresa; auā o le tele o mea na na maua ua fano.
37Auā ua selemamāina o latou ulu uma, ma ua sala ‘ava uma; ua selei foi lima uma, ua fusia sulugatiti i ie talatala.
38E pa le lauaitu i luga o fale uma i Moapi, ma ona malae uma; auā ua ou nutililiia Moapi, e pei o se ipu e le fiafia i ai, ua fetalai mai ai Ieova.
39Latou te uio e faapea, E! ua faatafunaina o ia. E! ua liutuaina Moapi ma le mā. E fai foi Moapi ma tauemuga ma mea e matatau ai ia te i latou i ona itu uma.
40Auā o loo faapea ona fetalai mai o Ieova, Faauta, e lele o ia e pei o le aeto ma fālō ona apaau i luga o Moapi.
41Ua aea Kiriota, ua maua foi ‘olo, e avea loto o toa o Moapi i lea lava aso e pei o le loto o le fafine ua faatiga.
42E faaumatia Moapi, e le fai ma nuu, auā na ia faamaualuga ia Ieova.
43E ia te oe lē nofo i Moapi, le mata‘u ma le lua, ma le mailei, ua fetalai mai ai Ieova.
44O le ua sola i le mata‘u e paū ia i le lua; o le ua alu ae ai le lua e lāvea o ia i le mailei; auā ou te faaoo ia Moapi lava le tausaga e tauia mai ai i latou, ua fetalai mai ai Ieova.
45O i latou na sosola, ua latou tutū i le paolo o Hesepona, ua leai so latou malosi; a ua alu atu le afi ai Hesepona, ma le afi mumū mai totonu o Sekono, ua mu ai le itu o Moapi, ma le tumuai o tagata vāvāō.
46Moapi e, oi talofa ia te oe! ua faaumatia le nuu o Kimosa; auā ua avea ou atalii i le tafeaga, ma ou afafine i le tafeaga.
47A e peitai ou te faafoisia le tafeaga a Moapi i ona po amuli, ua fetalai mai ai Ieova. Ona gata lea o le faasalaina o Moapi.
Who We AreWhat We EelieveWhat We Do
2025 by iamachristian.org,Inc All rights reserved.
