1Ua alu ane foi le tasi tagata o le aiga o Levi ua fai avā i le afafine o Levi.
2Ona to lea o le fafine, ua fanau mai le tama tane; ua ia iloa o ia ua lalelei, ona ia nā lava lea ia te ia i masina e tolu.
3Ua le toe mafai ona nā ia te ia, ona ia ave lea mo ia o le ato kome, na ia puluti ai i le pulu emeri, ma le pulu safeta; na ia tuu ai le tama, ona tuuina ai lea i le vao utuutu i le auvai o le vaitafe.
4A ua tu mamao atu lona tuafafine ina ia iloa pe iu ina faapefea o ia.
5Ona alu ifo lea o le afafine o Farao e taele i le vaitafe, o savavali ane foi lona galu teine i le auvai o le vaitafe; ua iloa atu e ia le ato o loo i le vao utuutu, ona au atu lea e ia o lana auauna fafine na te aumaia.
6Ua ia tatalaina, ua iloa ai le tama, faauta foi, ua tagi le tama; ona alofa lea i ai, ua faapea ane, O so le fanau a sa Eperū lenei.
7Ona fai mai lea o lona tuafafine i le afafine o Farao, Ou te alu ea e aami se fafine failele o sa Eperū e sau ia te oe, na te tausia le tama ma oe?
8Ua fai atu le afafine o Farao ia te ia, Ina alu ia; i le ua alu ane le teine ma valaau i le tinā o le tama.
9Ona fai atu lea o le afafine o Farao ia te ia, Ia e ave lenei tama ma tausi i ai ma a‘u, ou te avatu ai foi ia te oe le totogi; ona ave lea o le tama e le fafine, ma na tausia.
10Ua matua le tama, ona ia avatu lea i le afafine o Farao, i le ua fai ai mana tama; ua ia faaigoa ia te ia, O Mose, o loo faapea ana, Auā na ou toina ea o ia nai le vai.
11Ua oo i ona po na matua ai Mose, ona alu atu lea o ia i ona uso, ua na vaai atu foi i a latou avega mamafa; ua ia iloa foi le tagata Aikupito ua fasi le tagata sa Eperū o so lona au uso.
12Ua ia fevaavaaiai i lea itu ma lea itu, ua iloa e ia e leai se tagata, ona fasi lea e ia le Aikupito, ma ua natia i le oneone.
13Ona alu atu lea o ia i le aso a taeao, faauta, o tagata sa Eperū e toalua o loo femisai; Ona fai atu lea o ia i le ua sese, Se a ea le mea e te fasi ai i le lua te toalua?
14Ona fai mai lea o ia, O ai ea na tofia mai oe e fai ma alii ma faamasino ia te i matou? Ua e manatu ea e fasioti ia te au faapei ona e fasiotia le Aikupito? Ona fefe ai lea o Mose, ua faapea ana, E moni lava ua iloa lea mea.
15Ua faalogo Farao i lena mea, ona fia fasioti lea o ia ia Mose; ona sola ese lea o Mose ia Farao, ua nofo i le nuu o Mitiana; ua ia nofo foi i luga o le vaieli.
16Sa i le ositaulaga i Mitiana o afafine e toafitu; na latou o e utu ai vai, ua faatutumuina foi o mea e inu ai e faainu ai le lafu mamoe o lo latou tamā;
17A ua o mai leoleo mamoe, ma tutuli ia te i latou; ona tulai lea o Mose, ma laveai ia te i latou, ma faainu lo latou lafu mamoe.
18Ua latou o atu i lo latou tamā o Reuelu, ona fai mai lea o ia, Se a ea le mea ua outou vave mai ai i lenei aso?
19Ona latou fai atu lea, O le tagata Aikupito na laveai mai ia i matou i lima o leoleo mamoe, ma na utu mai le vai mā matou, ma na faainu le lafu mamoe.
20Ona fai mai lea o ia i ona afafine, Po o fea o i ai o ia? Se a le mea ua outou tuuna ai le tagata? Ina valaau lava ia te ia, ina ia ‘ai sina ana mea.
21Ua lelei foi ia Mose la te nonofo ma lea tagata; ua ia avatu foi lona afafine o Sepora ia Mose e fai mana avā.
22Ua ia fanauina ai le tama tane; ua faaigoa e Mose ia te ia, o Keresoma, auā sa faapea ana, Ua ou āumau i le nuu ese.
23Ua mavae atu ia aso e tele, ona oti lea o le tupu o Aikupito; a ua mapuitiga le fanauga a Isaraelu ona o le galuega; ua alalaga foi, ua oo ae lava i le Atua lo latou alaga ona o la latou galuega.
24Ua faafofoga foi le Atua i lo latou feoi, ua manatua foi e le Atua lana feagaiga na na faia ma Aperaamo, ma Isaako, atoa ma Iakopo.
25Ua silasila mai foi le Atua i le fanauga a Isaraelu, ma ua silafia i latou e le Atua.
Who We AreWhat We EelieveWhat We Do
2025 by iamachristian.org,Inc All rights reserved.
