1Ieova e, ia e finau ma i latou o e finau mai ia te au, ia e tau ma i latou o e faasaga tau mai ia te au.
2Ia e tago i le talita ma le talipupuni, ma ia e tulai mai e fesoasoani mai ia te au.
3Ia e to ae le tao, ma e pupuni atu i e tuliloa mai ia te au; ia e fetalai mai i lo‘u agaga, O lou faaola o a‘u lava lea.
4Ia faamaina ma ia masiasi o e saili ia oti a‘u; ia liutuaina ma ia taufaimamā i latou o e manatunatu i se mea e leaga ai a‘u.
5Ia avea i latou ia faapei o aputi o saito ona lelea i le matagi; ia tuleia i latou e le agelu a Ieova.
6Ia pouliuli ma ia maseesee lo latou ala; ma ia tuliloaina i latou e le agelu a Ieova.
7Auā na latou natia fua lo latou upega ia maua ai a‘u i le lua, na latou elia fua lava ia ou oti ai.
8Ia oo ia te ia le malaia ua na le iloa; ia maua lava o ia i lona upega na ia natia; ia paū lava o ia i lea lava malaia.
9Ona fiafia lea o lo‘u loto ia Ieova; e olioli lava i lana faaolataga.
10E fai atu o‘u ivi uma lava, Ieova e, o ai ea se tusa ma oe, o le ua laveai le tagata ua puapuagaina, mai ia te ia ua i ai le malosi e sili i lona; e laveaiina foi le ua puapuagaina ma le mativa i le ua faoa ana mea?
11Ua tutū mai ia te au o molimau faasaua, ua latou suesue ia te au i mea ou te lei iloa.
12Ua latou taui mai lo‘u lelei i le leaga, e ausage ai lo‘u agaga.
13A e peitai o a‘u nei, na ou ofu i ie talatala ina o latou mama‘i; na ou faatigaina a‘u e a‘u i le anapogi; ma ua foi mai la‘u tatalo i lo‘u fatafata.
14Na ou fealuai e peiseai o la‘u uo o ia po o lo‘u uso; na ou punou eleelea, e pei o le ua faanoanoa i lona tinā.
15A ua latou fiafia ina ua ou setusetu; ma ua latou faapotopoto mai; ua faapotopoto o e agatele e faatiga ia te au, a ua ou le iloa; na latou fesaeiai ia te au, ua le mapu lava.
16Ua lilivau o latou nifo ia te au faatasi ma tagata faalematau, o e faianaga ia maua ai se potoi areto.
17Le Alii e, e te silasila i ai seia afea? Ia e faafoisia mai lo‘u agaga mai a latou faatafunaga, ia laveaiina a‘u ua toatasi mai leona.
18Ou te vivii atu ia te oe i le faapotopotoga tele, ma pese atu ia te oe i luma o le nuu e toatele.
19Aua ne‘i mitamita ia te au o e ita fua mai ia te au; aua ne‘i fegenoai mata o e ‘ino‘ino fua mai ia te au.
20Auā e le tautala i le filemu i latou, a ua latou manatunatu i upu pepelo i e ua nofo fifilemu i le nuu.
21Ua faamamaga foi o latou gutu ia te au, ua fai mai, Ue! ue! ua vaai lava i ai o tatou mata.
22Ieova e, ua e silasila i ai; aua ne‘i e le tali mai; le Alii e, aua e te vavamamao ma a‘u.
23Lo‘u Atua e, lo‘u Alii e, ia e tulai mai, ma e maleifua mai i lo‘u faamasinoga, ma la‘u nei finauga.
24Ieova e, lo‘u Atua ia e faamasino mai ia te au e tusa ma lau amiotonu; aua ne‘i latou mitamita mai ia te au.
25Aua ne‘i latou fai ifo i o latou loto, Ue! o lo tatou lava manao lena; aua ne‘i latou fai ane, Ua foloina o ia e i tatou.
26Ia taufaimamā ma ia masiasi faatasi i latou o e ua mitamita i lo‘u tiga; ia faaofuina i latou i le mā ma le masiasi o e faasausili ia te au.
27Ia pepese ma taufaiolioli o e loto i la‘u amiotonu; ia fai ane pea lava i latou, Ia viia Ieova, o le ua finagalo ia manuia lana auauna.
28E ta‘uta‘u atu foi lo‘u laulaufaiva i lau amiotonu, ma vivii atu ai ia te oe i le aso atoa.
Who We AreWhat We EelieveWhat We Do
2025 by iamachristian.org,Inc All rights reserved.
