1Ua alu Iakopo i lana malaga, ua fetaiai ma ia agelu a le Atua.
2Ua faapea foi a Iakopo ina ua iloa atu ia te i latou, O le ‘au a le Atua lenā; ona faaigoa atu lea o ia i lena mea o Maanaima.
3Ua aauina atu foi e Iakopo ni e muamua atu i le feau i lona uso o Esau, i le nuu o Seira, o le nuu o Etoma.
4Ua ia fai atu foi ia te i latou, ua faapea atu, Ia outou faapea atu i lo‘u alii o Esau, O loo faapea mai lau auauna o Iakopo, Ua ou āumau ma Lapana, ma ou nofo ai ua oo mai i nei ona po;
5ua ia te au foi o povi, ma asini, ma mamoe, ma auauna tane, ma auauna fafine; ua ou aauina atu foi e ta‘u atu ai i lo‘u alii, ina ia alofagia a‘u e oe.
6Ua foi mai ia Iakopo e na aauina e ia, ua faapea mai, Na matou oo atu i lou uso o Esau, o loo ua maliu mai foi o ia ma tagata e toafagalau ma ia, e faafetaiai ia te oe.
7Ona mata‘u tele ai lea o Iakopo, ma ua atuatuvale; ona vaeluaina lea e ia o tagata sa ia te ia, atoa ma lafu mamoe, ma lafu povi, ma kamela, i vaega e lua; ua faapea foi o ia,
8Afai e sau Esau i le tasi vaega, ma fafasi ai, ona sao lea o le isi vaega ua totoe.
9Ua faapea foi a Iakopo, Ieova e, le Atua o lo‘u tamā o Aperaamo, o le Atua foi o lo‘u tamā o Isaako, o le na faapea mai ia te au, Ina e toe foi atu i lou nuu, ma lo‘u aiga, ou te agalelei atu foi ia te oe;
10ou te le aoga lava i mea alofa uma ma le faamaoni uma ua e faia i lau auauna; auā na ou laasia mai i Ioritana nei, na o a‘u ma lo‘u tootoo; a o lenei, ua ou sau ma vaega e lua.
11Ou te aioi atu, ia e laveai mai ia te au ai le lima o lo‘u uso, o le lima lava o Esau; auā ou te fefe ia te ia, ina ne‘i sau ia ma fasia a‘u, ma tinā, atoa ma fanau.
12Na e faapea mai foi, Ou te agalelei atu lava ia te oe, ou te faia foi lau fanau ia pei o le oneone i le sami, e le mafaitaulia ina ua tele.
13Sa nofo ai foi o ia i lea po; na ia ave foi ni mea na ia te ia e fai ma mea alofa i lona uso o Esau;
14o ‘oti fafine e lua selau, ma ‘oti poa e luafulu, o mamoe fafine e lua selau, ma mamoe poa e luafulu,
15o kamela fananau e tolugafulu ma a latou tama, o povi fafine e fagafulu, ma povi poa e sefulu, o asini fafine e luafulu, ma tamai asini e sefulu.
16Ona tuuina atu lea e ia o lafu taitasi i lima o ana auauna; ua faapea atu foi i ana auauna, Ia muamua atu outou i o‘u luma, ma ia va a‘i lea lafu ma lea lafu.
17Ua ia fai atu foi i le a muamua atu, ua faapea atu, Pe a lua fetaiai ma lo‘u uso o Esau, a fesili mai ia te oe, e faapea mai, Se, so sa aī ea oe? A ē alu ifea? O ai ea e ana ia mea e muamua mai ia te oe?
18Ona e tali atu ai lea, O mea a lau auauna o Iakopo ia; o mea alofa ua au mai i lo‘u alii o Esau; faauta foi, o loo mulimuli mai o ia ia te i matou.
19Ua faapea foi ona fai atu o ia i lona toalua, ma lona toatolu, ma e mulimuli atu uma lava i lafu, ua faapea atu, Ia faapea lava ona outou tautala atu ia Esau, pe a outou fetaiai ma ia.
20Ia outou faapea atu foi, Faauta, o loo mulimuli mai lau auauna o Iakopo ia te i matou. Auā na faapea a ia, Ou te faalaulelei ia te ia i le mea alofa o loo o muamua atu ia te au, mulimuli ane foi ou te iloa atu i ona fofoga; atonu e tali lelei mai o ia ia te au.
21Ona muamua atu lea ia te ia o le mea alofa; a o ia ua nofo lava o ia i le toagālauapi i lea po.
22Ua ia tulai foi i lea po, ma ave ana avā e toalua, ma ana auauna fafine e toalua, ma ona atalii e toasefulu ma le toatasi ma laasia atu i le asaga o Iapoka.
23Ua ia ave ia te i latou, ma momoli atu ia te i latou i le tasi itu o le alia, ua aveina atu foi i ai o ana mea.
24Ua tuua foi Iakopo e toatasi; ua la fagatua foi ma le tasi tagata ua oo ina aoina.
25Ua iloa foi e ia ua le malo ia ia te ia, ona pa‘i atu lea o ia i le fa‘iga o lona suilapalapa, ona see lea o le fa‘iga o le suilapalapa o Iakopo ina o la fagatua ma ia.
26Ua faapea mai foi o ia, Tuu mai ia o a‘u a ou alu, auā ua ao. A ua tali atu ia, Ou te le tuuina atu lava oe seia e faamanuia mai ia te au.
27Ona faapea mai lea o ia ia te ia, O ai ea lou igoa? Ona tali atu ai lea o ia O a‘u o Iakopo.
28Ona faapea mai lea o ia, E le toe ta‘ua lou igoa o Iakopo, a o Isaraelu, auā e pei o se alii ua e finau i le Atua atoa ma tagata, ma ua e manumalo.
29Ua fesili atu foi Iakopo, ua faapea atu, Ina ta‘u mai ia o lou igoa. Ona tali mai lea o ia, Se a le mea ua e fesili mai ai i lo‘u igoa? Ona faamanuia lea o ia ia te ia i lea mea.
30Ona faaigoa atu lea e Iakopo lea mea o Penieli; auā ua faapea a ia, Na ou iloa ai le Atua ua ma fesagai lava, a ua laveaiina a‘u.
31Na alu ae le la o ui ane o ia i Penueli, ua setusetu foi lona vae.
32O le mea lea ua le aai ai le fanauga a Isaraelu i le ua na memei, o loo i le fa‘iga o le suilapalapa, ua oo mai i nei ona po; auā na pa‘i atu o ia i le fa‘iga o le suilapalapa o Iakopo i le ua na memei.
Who We AreWhat We EelieveWhat We Do
2025 by iamachristian.org,Inc All rights reserved.
