1Isaraelu e, afai e te fia foi mai, ina foi mai ia ia te au, o loo fetalai mai ai Ieova; afai foi e te tuuesea au mea e inosia i o‘u luma, ona e le taase lava lea;
2e te tauto foi i le faamaoni, ma le amio sa‘o, ma le amiotonu, O loo soifua Ieova; o nuu ese foi e ta‘uamuia i latou e i latou ona o ia, ma latou mitamita ona o ia.
3Auā o loo faapea ona fetalai mai o Ieova i tagata o Iuta ma Ierusalema, ina suatia ia lo outou fanua vaoa, aua foi ne‘i lulu a outou saito i laau tuitui.
4Ia faaperitomeina outou mo Ieova, ma ave ese le pa‘u o outou loto, outou tagata o Iuta, ma e o nonofo i Ierusalema; ne‘i alu atu lo‘u ita e pei o le afi, ne‘i mu foi a e le matineia e se tasi, ona o le leaga o a outou amioga.
5Ia outou ta‘u atu i Iuta, ma ia outou faailoa atu i Ierusalema; ia faapea atu, Ia ilia le pu i le nuu, ia alalaga tele, ma fai atu ai, Ina faapotopoto mai ia, se‘i tatou o atu ia i aai nofo ‘olo.
6Ia faatuina le tagavai i Siona; ia outou sosola, aua ne‘i tutū mai; auā o a‘u ou te aumaia le malaia mai le itu i matu, ma le olopalaina e tele.
7Ua alu ae le leona ai le vao filifili na i ai, o loo faasaga mai foi le na te faaumatia nuu ese; o loo sau ia ai le mea sa i ai e faatafunaina lou nuu; e fai ma mea tuufua ou aai, e leai se nofo ai.
8Ia outou fusi ia te outou i ie talatala ona o lea mea, ma taufaitagitu‘i, ma uio; auā e le liliueseina ia te i tatou le toasa tele o Ieova.
9O loo fetalai mai Ieova, O lea aso e matuā vaivai ai le loto o le tupu, ma loto o alii; e segia foi mauli o faitaulaga, ma fememeai perofeta.
10Ona ou fai atu lea, Aue! le Alii e Ieova, e moni, ua e matuā olegia lenei, nuu ma Ierusalema, ua faapea mai, E ia te outou le filemu, a ua oo lava le pelu i le loto.
11O ia ona po e fai mai ai i lenei nuu ma Ierusalema, O le matagi vevela i mauga tula i le vao, i le ala o le tama fafine a lo‘u nuu, a e le se matagi e faasavili a‘i saito, pe faamamā a‘i;
12e oo mai ia te au le matagi e sili ona tele i ia matagi; o lenei foi, ou te faasala ia te i latou.
13Faauta, e alu ae o ia e pei o ao, ma ona kariota e pei o le asiosio; e sili ona tele vavave o ana solofanua i aeto; o i talofa ia te i tatou! auā ua faatafunaina i tatou.
14Ierusalema e, ina fufulu ia lou loto ai le leaga, ina ia faaolaina oe; pe tumau seia afea ou mafaufauga leaga i totonu ia te oe?
15Auā ua fai mai le leo o le tasi mai Tanu, ua faailoa mai foi le malaia mai le mauga o Efaraima.
16Ia outou fai atu i nuu ese; faauta, ia outou faailoa atu ia Ierusalema; o loo o mai mai le nuu mamao, o e vagaia o ia latou te alalaga foi i aai o Iuta.
17Latou te siosioina o ia e pei o e leoleo fanua; auā ua ia fouvale ia te au, o loo fetalai mai ai Ieova.
18O lou ala, ma au amioga ua oo mai ai ia mea ia te oe; o lau amio leaga lenei; auā o le mea oona lea, ua oo lava i lou loto.
19Lo‘u manava e, lo‘u manava e! ua tiga lo‘u loto i totonu ia te au; ua tagi lo‘u loto; ou te le mafaalologo; auā lo‘u agaga e, ua e faalogo i le leo o le pu, ma le vāvāō o le taua.
20Ua alalaga mai, o lea mea ua sofaia ma lea mea ua sofaia; auā ua faatafunaina le nuu uma; na faafuasei ona faatafunaina o o‘u fale ie; ma o‘u ie puipui i le emo o le mata.
21Seia afea ona ou iloa ai le tagavai, ma ou faalogo atu i le leo o le pu?
22Auā ua faavalelea lo‘u nuu; ua latou le iloa lava a‘u; o le fanau vālea lava i latou, e leai foi so latou mafaufau; e popoto i latou i fai mea leaga, a e latou te le iloa ona fai o mea lelei.
23Na ou vaai atu i le nuu, faauta, ua tuufua ma le gaogao; na ou vaai atu i le lagi, ua leai foi se malamalama.
24Na ou vaai atu i le atu mauga, faauta foi, ua luluina, ua faagateteina foi o mauga uma.
25Na ou vaai atu, faauta foi, e leai se tagata, ua lele ese foi manu felelei uma.
26Na ou vaai atu, faauta foi, o le fanua sa lafulemu ua avea ma vao lafua; o ona aai uma foi ua fulisia i luma o Ieova ma lona toasa tele.
27Auā ua faapea ona fetalai mai o Ieova, E faatafunaina le nuu uma, a ou te le matuā faaumatia.
28O le mea lea e faanoanoa ai le nuu, e pouliuli ai le lagi i luga; auā ua ou fai ane, ua ou manatu lava i ai e fai, ou te le salamo ai, ou te le liliu ese ai.
29E sosola aai uma ona o le vāvāō o e tietie i solofanua ma e fanafana i u; latou te o i le vao matua, ma feaei i luga o papa; e tuua aai uma, e le nofo ai foi se tagata.
30O oe na foi le ua faatafunaina, se a se mea e te faia? E ui lava ina e ofu oe i ofu mūmū; e ui lava ina e teuteu ia te oe i teuga i auro; e ui lava ina masae ou mata i le vali, e te faalalelei fua ia te oe; e inosia oe e i latou sa mananao ia te oe, latou te sailiili foi e fasioti ia te oe.
31Auā ua ou faalogo i le leo e pei o se fafine ua faatiga, o le tiga e pei o le fafine a fanau mai lana tama ulumatua; o le leo o le tama fafine a Siona; o loo gae ia, o loo faaloaloa e ia ona lima; ua faapea ane, Aue! talofa lava ia te au, auā ua vaivai lo‘u loto ona o e fasioti tagata.
Who We AreWhat We EelieveWhat We Do
2025 by iamachristian.org,Inc All rights reserved.
