1Na i luga ia te au le aao o Ieova; na ia aveina atu a‘u i le Agaga o Ieova, ma na tuuina a‘u i le fanua laugatasi, ua tumu i ivi.
2Ua ia ta‘ita‘iina ane ai a‘u ia faataamilomilo ai lava; faauta foi, ua matuā tele lava i le fogāeleele; faauta foi, ua matuā mamago lava.
3Ona fai mai lea o ia ia te au, Le atalii e o le tagata, e mafai ea ona toe ola o ia ivi? Ona ou tali atu ai lea, Le Alii e Ieova e, ua e silafia lava oe.
4Ona fetalai mai ai lea o ia ia te au, Ia e vavalo atu i na ivi, ma fai atu i ai, Ivi mamago e, faalogologo mai ia i le afioga a Ieova.
5Ua faapea ona fetalai mai o le Alii o Ieova i na ivi; Faauta, ou te faaulu ane le mānava i totonu ia te outou, ona outou ola ai lea;
6ou te avane foi ua ia te outou, ma ou faatupuina ae aano ia te outou, ma ufiufi ia te outou i pa‘u, ou te tuuina atu foi le mānava i totonu ia te outou, e ola foi outou; ona outou iloa ai lea o a‘u lava o Ieova.
7Ona ou vavalo atu ai lea e pei ona poloaiina o a‘u; ua ou vavalo atu, a e gāsēsē; faauta foi, o le gaoioi, ona fesootai lea o ivi, o le ivi i lona ivi.
8Ua ou vaai atu, faauta, ua tupu ae ua ma aano ia te i latou, ua ufitia foi i latou i pa‘u; a ua leai se mānava i totonu ia te i latou.
9Ona fetalai mai lea o ia ia te au, Vavalo atu ia i le mānava le atalii e o le tagata, ina vavalo atu ia, ma ē faapea atu i le mānava, O loo faapea ona fetalai mai o le Alii o Ieova, Mānava e, ina sau ia mai matāmatagi e fa, ma ia mānava atu i ia tagata fāsia, ia latou ola ai.
10Ona ou vavalo atu lea e pei ona poloaiina o a‘u, ona ulu ane lea o le mānava i totonu ia te i latou, ona latou ola ai lea, ma tutū i luga i o latou vae, o le itu taua e matuā tele lava.
11Ona fetalai mai lea o ia ia te au, Le atalii e o le tagata, o ia ivi o le aiga uma ia o Isaraelu; faauta, ua latou fai mai, Ua mamago o matou ivi, ua faaumatia lo matou faamoemoe; ua fano lava i matou.
12O le mea lea ia e vavalo atu ai, ia faapea atu ia te i latou, Ua faapea ona fetalai mai o le Alii o Ieova, Faauta, lo‘u nuu e, ou te lagaina o outou tuugamau, ou te avae outou ai o outou tuugamau, ma aumaia outou i le laueleele o Isaraelu.
13Lo‘u nuu e, tou te iloa o a‘u lava o Ieova, pe a ou lagaina o outou tuugamau, ma avae outou ai o outou tuugamau.
14Ou te tuuina atu foi lo‘u Agaga i totonu ia te outou, e ola ai foi outou, ou te faanofofilemuina foi outou i lo outou lava laueleele; ona outou iloa ai lea o a‘u lava o Ieova, ua ou fai atu ai, ou te faia foi, o loo fetalai mai ai Ieova.
15Ua oo mai foi le afioga a Ieova ia te au, ua faapea mai,
16O oe na foi, le atalii o le tagata, ia e avane se laau e tasi, ma tusi ai, Mo Iuta, ma le fanauga a Isaraelu o e ‘au ia te ia; i le e avane foi se tasi laau, ma tusi ai, Mo Iosefa, o le laau a Efaraima, atoa ma le aiga uma o Isaraelu o e ‘au ia te ia.
17Ia e faaopoopoina le tasi i le tasi ia fai ma laau e tasi mo oe; ona avea lea o i laua ma laau e tasi i lou lima.
18A fai mai foi tagata o lou nuu ia te oe, e faapea mai, E te le faaali mai ea ia te i matou le uiga o ia mea?
19ia e fai atu ia te i latou, O loo faapea ona fetalai mai o le Alii o Ieova, Faauta, ou te ave le laau o Iosefa, o le ua i le lima o Efaraima, ma itu aiga o Isaraelu o e ‘au ia te ia, ma ou tuuina i latou e faatasi ma ia, e faatasi lava ma le laau o Iuta, e avea foi i latou ma laau e tasi, e fai foi ma laau e tasi i lo‘u lima.
20O laau foi e te tusi ai, e i ai ia i lou lima i o latou luma.
21Ia e fai atu foi ia te i latou, O loo faapea ona fetalai mai o le Alii o Ieova, Faauta, ou te aveina atu le fanauga a Isaraelu ai nuu ese ua latou ō i ai, ma ou faapotopotoina mai i latou ai lea itu ma lea itu, ma ou aumaia i latou i lo latou lava laueleele.
22Ou te faia foi i latou ma nuu e tasi i le laueleele i mauga o Isaraelu; o le tupu foi e tasi e fai ma tupu ia te i latou uma; e le toe avea i latou ma nuu e lua, e le toe vaeluaina lava i latou e fai ma malo e lua.
23E le toe leaga lava i latou ia te i latou i a latou tupua, po o a latou mea inosia, po o se tasi o latou solitulafono; a e ou te faaolaina i latou ai mea uma latou te nonofo ai, ua latou fai ai le agasala, ou te faamamāina foi i latou; e fai i latou mo‘u nuu, e fai foi a‘u mo latou Atua.
24O la‘u auauna foi o Tavita e fai o ia ma tupu ia te i latou; e tasi foi le leoleo mamoe ia te i latou uma; e savavali foi i latou i a‘u faamasinoga, ma tausi i a‘u tulafono, ma latou faia.
25Latou te nonofo foi i le nuu na ou foaiina ia Iakopo la‘u auauna, sa mau ai o outou tamā; latou te mau ai, o i latou, ma a latou fanau, ma le fanau a latou fanau e oo i le faavavau; e fai foi la‘u auauna o Tavita mo latou alii sili e faavavau.
26Ou te osia foi ma i latou le feagaiga e manuia ai; e fai foi ma feagaiga ia te i latou e faavavau; ou te faanofomauina i latou, ma faatoateleina i latou, ou te tuu foi lo‘u malumalu ia te i latou e faavavau.
27E i ai foi lo‘u fale ia te i latou; e fai foi a‘u mo latou Atua, e fai foi i latou mo‘u nuu.
28E iloa ai foi e nuu ese o a‘u lava o Ieova o lē faapaiaina Isaraelu, pe a i ai lo‘u malumalu i totonu ia te i latou e faavavau.
Who We AreWhat We EelieveWhat We Do
2025 by iamachristian.org,Inc All rights reserved.
