1Ua oo mai foi le afioga a Ieova ia te au, ua faapea mai,
2Le atalii e o le tagata, o loo e nofo i le aiga fouvale ua ia te i latou mata e vaai, a ua latou le vaai ai; ua ia te i latou taliga e faalogo a ua latou le faalogo, ai; auā o le aiga fouvale lava i latou.
3O le mea lea, le atalii e o le tagata, ia e sauni ai mo oe o mea e alu ma oe i le tafeaga, ma ia e alu atu i le ao i o latou luma, e te alu ese i le mea ua e mau ai i se tasi mea i o latou luma; e ui lava o le aiga fouvale i latou, atonu latou te mafaufau ai.
4E te tautuu atu foi au mea i le ao i o latou luma, e pei o mea e ave i le tafeaga. E te alu atu foi i le pouliuli i o latou luma, e pei o e o atu i le tafeaga.
5E te eli le pa i o latou luma, ma tautuu atu ai.
6E te faafuataina ia mea i lou ua i o latou luma, ma e avatu ai i le afiafi; e te ufiufi ou mata ia e le iloa ai le eleele; auā ua ou fai oe ma faailoga i le aiga o Isaraelu.
7Ona ou faia lea e pei ona poloaiina mai o a‘u; na ou tautuu atu a‘u mea i le ao pei o mea e ave i le tafeaga; na ou eli le pa i le afiafi i lo‘u lima; na ou tautuu atu ai i le pouliuli, ma ou faafuata i lo‘u ua i o latou luma.
8Ua oo mai ai le afioga a Ieova ia te au i le taeao, ua faapea mai,
9Le atalii e o le tagata, e lei faapea mai ea ia te oe le aiga o Isaraelu, le aiga fouvale, Se a ea le mea ua e faia?
10Ia e fai atu ia te i latou, O loo faapea mai le Alii o Ieova, O le avega lenei i le alii sili o Ierusalema, ma le aiga uma o Isaraelu, o e ua ia te i latou.
11Fai atu ia, O a‘u nei o le faailoga ia te outou; e pei ona ou faia, e faapea ona faia ia te i latou; e o faatagataotaua i latou i le tafeaga.
12O le alii sili foi o loo ia te i latou, na te faafuataina mea i lona ua i le pouliuli, ma alu atu, latou te elia le pa e tautuu atu ai; na te ufitia ona mata, ia na le iloa le eleele i ona mata.
13Ou te folasia la‘u upega ia te ia, e lavea foi o ia i la‘u mailei; ou te aumaia foi o ia i Papelonia o le nuu o Kaletaia; e oti ai o ia, a e na te le vaai i ai.
14Ou te faataapeapeina i matāmatagi uma i latou uma o e ua ia te ia e fesoasoani ia te ia, atoa ma ana ‘au uma; ou te to ae foi le pelu e mulimuli atu ia te i latou.
15Ona latou iloa ai lea o a‘u lava o Ieova, pe a ou faataapeapeina i latou i nuu ese, ma faasalalauina i latou i nuu eseese.
16A e ou te faatotoeina ni o latou tagata e toaitiiti ai le pelu, ma le oge, ma le faamai; ina ia latou talatala atu i a latou mea inosia uma i nuu latou te o i ai; latou te iloa foi o a‘u lava o Ieova.
17Ua oo mai foi le afioga a Ieova ia te au, ua faapea mai,
18Le atalii e o le tagata, ia e ‘ai au mea e ‘ai ma le gatete, ma e inu i lou vai ma le tetemu ma le atuatuvale.
19Ia e fai atu foi i tagata o le nuu, O loo faapea ona fetalai mai o le Alii o Ieova i e o nonofo i Ierusalema, ma le laueleele o Isaraelu; latou te aai a latou mea e ‘ai ma le atuatuvale, ma feinu i o latou vai ma le fememeai, ina ia faatafunaina lo latou nuu ia tea mea ua tumu ai, ona o le saua o i latou uma o e nonofo ai.
20O aai ua āina e faagaogaoina ia, e faatafunaina foi le nuu; ona outou iloa ai lea o a‘u lava o Ieova.
21Ua oo mai foi le afioga a Ieova ia te au, ua faapea mai,
22Le atalii e o le tagata, se a ea lena faatusa ua ia te outou i le nuu o Isaraelu, ua faapea mai, Ua faalevaleva aso, ua iuvale faaaliga uma?
23O le mea lea ia e fai atu ai ia te i latou, Ua faapea ona fetalai mai o le Alii o Ieova, Ou te faate‘aina lena faatusa, latou te le toe faia lea faatusa i Isaraelu; a ia e fai atu ia te i latou, Ua latalata ona aso, ma le taunuuga o faaaliga uma.
24Auā e le toe ai lava se faaaliga faatauvaa, ma se togafiti faataulāitu faa‘ole‘ole i le aiga o Isaraelu.
25Auā o a‘u o Ieova ou te tautala atu, o le upu foi ou te tautala atu ai e taunuu lea, e le toe faatuai; auā o outou lava aso, le aiga fouvale e, ou te tautala atu ai le upu, ma ou faataunuuina lava, o loo fetalai mai ai le Alii o Ieova.
26Ua oo mai foi le afioga a Ieova ia te au, ua faapea mai,
27Le atalii e o le tagata, faauta, o loo fai mai le aiga o Isaraelu, O le faaaliga o loo iloa e ia, mo aso amuli lava ia, ua ia vavalo foi i ona po e mamao atu.
28O le mea lea ia e fai atu ai ia te i latou, O loo faapea ona fetalai mai o le Alii o Ieova, E le toe faatuai lava se tasi o a‘u upu; a o le upu ua ou fai atu ai e faia lava, o loo fetalai mai ai le Alii o Ieova.
Who We AreWhat We EelieveWhat We Do
2025 by iamachristian.org,Inc All rights reserved.
