1Ua tepa ae Iakopo ua iloa atu, faauta foi, o Esau ua sau ma tagata e toafa selau ma ia. Ona vavae atu lea e ia o le fanau ia Lea, ma Rasela, ma auauna fafine e toalua.
2Ona tuumua atu lea e ia o auauna fafine ma a laua fanau, ma Lea ma ana fanau e aupito ane i ai, ma Rasela ma Iosefa e aupito mulimuli i laua.
3Ona muamua atu lea o ia ia te i latou, ua faafitu ona ifo toele, ua oo ina latalata atu i lona uso.
4Ona momo‘e mai lea o Esau e faafetaiai mai ia te ia, ua fusi ia te ia, ma punou i lona ua, ma feasogi ma ia; ona la fetagisi ai lea.
5Ona tepa ae lea o Esau, ua iloa atu fafine ma le fanau; ona faapea mai lea o ia O ai ea i latou na ua ia te oe? Ona tali atu lea o ia, O a‘u fanau ua foaiina mai e le Atua i lona alofa i lau auauna.
6Ona faalatalata mai lea o auauna fafine, o i laua ma a la fanau, ona ifo lea o i latou.
7Ua faalatalata mai foi Lea ma ana fanau, ua ifo foi i latou; mulimuli ane ona faalatalata mai lea o Iosefa ma Rasela, ua ifo foi i laua.
8Ona faapea mai lea o ia, E faapefea lena vao manu ua matou fetaiai? Ona tali atu lea o ia, O au manu ia alofaina ai a‘u e lo‘u alii.
9Ona faapea mai lea o Esau, Lo‘u uso e, e tele a‘u nei mea; tuu pea ia au mea ia te oe.
10Ona tali atu lea o Iakopo, Aua lava, afai e te alofa mai ia te au, ia e talia mai lava la‘u mea alofa; auā o lenei, ua ou iloa atu ou fofoga, e peiseai ua ou iloa atu fofoga o le Atua, ma ua e finagalo malie mai ia te au.
11Ia e talia lava lo‘u alofa ua avatu nei ia te oe; auā ua alofaina a‘u e le Atua, auā foi ua ia te au mea uma; ua ia uunai atu ia te ia, ona talia lea e ia.
12Ona faapea mai lea o Esau, Se‘i sauni la tatou malaga, ina tatou o ia, ou te muamua foi ia te oe.
13Ona tali atu lea o ia, Ua silafia e lo‘u alii ua faalelavā le fanau, o lafu mamoe foi ma lafu povi ma a latou tama, ua ia te au ia; afai foi e tulituliteteleina i latou i le aso e tasi, ona mamate ai lea o le lafu uma.
14Ia maliu atu lava lo‘u alii e muamua i lana auauna; a o a‘u, ou te savali lemu e faatatau i manu e muamua ia te au, atoa ma le fanau, seia ou oo atu i lo‘u alii i Seira.
15Ona faapea mai lea o Esau, Se‘i ou tuuina atu ia te oe ni o matou tagata nei. Ona tali atu lea o ia, Ai se a foi? Ia alofaina a‘u e lo‘u alii.
16Ona toe foi atu lea o Esau i lea aso i lana malaga i Seira.
17Ua alu atu foi Iakopo i Sukota, ua fai ai foi lona fale, ua fai ai foi fale apitaga o ana manu; o le mea lea na faaigoaina ai lea mea o Sukota.
18Ua saogalemu atu foi Iakopo i le aai o Sekema, o i le nuu o Kanana lea, ina ua sau o ia mai Patanarama; ua ia faatuina foi lona fale ie i luma o le aai.
19Ua ia faatau foi se fasi fanua i le mea sa faatuina ai e ia lona fale ie, nai le fanauga a Hamoro, le tamā o Sekema, i ni tupe e selau.
20Ua ia faatuina foi i lea mea le fata faitaulaga, ua ia faaigoa ai foi o Eleloiisaraelu.
Who We AreWhat We EelieveWhat We Do
2025 by iamachristian.org,Inc All rights reserved.
