1Ieova o ‘au e, e matuā manaomia ou afioaga.
2O loo naunau lo‘u agaga, ma ua lailoa i le fia alu atu i lotoā o Ieova; o loo alaga fiafia lo‘u loto ma lo‘u tino i le Atua soifua.
3E moni, o le manulele ua maua se fale, o le pe‘ape‘a foi ua maua sona ofaga e tuu ai lana toloai, o au lava fata faitaulaga, Ieova o ‘au e, o lo‘u Tupu ma lo‘u Atua.
4Amuia i latou ua nonofo i lou fale; latou te vivii pea ia te oe. Selā.
5Amuia le tagata o loo ia te oe lona malosi; o ala ua i o latou loto ia.
6Ua ui ane i latou i le vanu o Peka, ua faia lea e i latou ma vaipuna; ua ufitia ai i le manuia ona o le uaga muamua.
7Latou te savavali ma le malosi e tupu pea; e iloa i latou i Siona i luma o le Atua.
8Ieova e, le Atua o ‘au, ia e faafofoga mai i la‘u tatalo; le Atua o Iakopo e, ia liliu mai ou fofogā. Selā.
9Le Atua e, lo matou talita, ia e silasila mai, ia e matuā silasila mai i fofoga o lē na e faauuina.
10Auā e sili le aso e tasi i ou lotoā i lo le afe. E sili lo‘u manao ia a‘u tu i le faitotoa o le fale o lo‘u Atua, i le manao e mau i fale ie o e amio leaga.
11Auā o Ieova le Atua o le la lava ia ma le talita; e foaiina mai e Ieova le alofa tunoa ma le manuia; e le taofia e ia se mea lelei i e ua sao lo latou savavali.
12Ieova o ‘au e, amuia le tagata ua faatuatua ia te oe.
Who We AreWhat We EelieveWhat We Do
2025 by iamachristian.org,Inc All rights reserved.
