1O ona po ia na fetalai mai ai Ieova ia te au, Ia e ta mai ni papamaa se lua pei o papa muamua, ma ia e alu ae ia te au i le mauga; ia e faia foi se atolaau.
2Ou te tusi foi i ia papa o upu sa i papa muamua na e nutimomoia, e te tuu ai foi i le atolaau.
3Ona ou faia lea o le atolaau i le laau o le setima, na ou ta foi o papamaa e lua pei o papa muamua, ona ou alu ae ai lea i le mauga, na i ai foi papa e lua i lo‘u lima.
4Ona tusi lea e ia i papa pei o upu na muai tusia, o upu e sefulu na fetalai mai ai Ieova ia te outou i le mauga, mai totonu o le afi, i le aso na fai ai le faapotopotoga, ona au mai ai lea e Ieova ia te au.
5Ona ou liliu lea, ma ou alu ifo nai le mauga, ua ou tuu foi papa i le atolaau na ou faia, o loo i ai lava, faapei ona poloai mai ai o Ieova ia te au.
6Ona o atu ai lea o le fanauga a Isaraelu nai Perota o i Peneakana i Mosera; ua oti ai Arona, ua tanumia ai foi; ona fai ai lea ma ositaulaga o Eleasaro lona atalii e sui a‘i o ia.
7Ua latou o atu i lea mea i Kikata, na o atu foi na Kikata i Iatepata, o le nuu lea o vaitafe.
8O ona poi a na vavaeeseina ai e Ieova o le itu aiga o Levi, ia latou tauave le atolaau o le feagaiga a Ieova, ia latou tutū i luma o Ieova ia auauna ia te ia, ma ia latou faamanuia atu i tagata i lona suafa, ua oo mai i le aso nei.
9O le mea lea e le maua ai e Levi se fanua po o se tofi faatasi ma ona uso; o Ieova o lona tofi ia, faapei ona fetalai mai ai o Ieova lou Atua ia te ia.
10Na ou i ai pea i le mauga i ao e fagafulu ma po e fagafulu, pei o ona aso muamua; na faafofoga mai Ieova ia te au i ona po ia foi, i le ua le finagalo Ieova e faauma ia te oe.
11Ona fetalai mai lea o Ieova ia te au, Tu ia i luga, ina e alu ia e muamua i le nuu, ia latou oo atu, ma ia fai mo latou le nuu na ou tauto ai i o latou tamā e foai atu ia te i latou.
12O lenei, Isaraelu e, se a se mea e finagalo i ai Ieova lou Atua ia te oe, na ona ia e mata‘u ia Ieova lou Atua, ina ia e savali i ona ala uma lava, ma ia e alofa atu ia te ia, ma ia e auauna ia Ieova lou Atua ma lou loto atoa ma lou agaga atoa,
13ina ia e tausiusi i poloaiga a Ieova ma ana tulafono ou te fai atu ai ia te oe i le aso nei, ina ia manuia ai oe?
14Faauta, o ia Ieova lou Atua le lagi ma le lagi o lagi, o le lalolagi foi, ma mea uma lava o i ai.
15A ua fiafia Ieova i ou tamā, ua alofa ia te i latou, ua ia filifilia foi a latou fanau ina ua mavae atu i latou, o outou lava ia, a e tuua nuu uma, pei ona fai i le aso nei.
16O lenei, ia outou peritomeina le pa‘u o outou loto, aua ne‘i toe maaa o outou ua.
17Auā o Ieova lo outou Atua o le Atua o atua ia, o le Alii o alii, o le Atua silisili, e mamana o ia ma le matautia, o le na te le faailogaina tagata,
18e le talia foi e ia se taui; o le na te faamasinoina mo le ua mātuaoti ma le fafine ua oti lana tane; o le alofa atu i le tagata ese, ua avatu ai ia te ia le mea e ‘ai atoa ma ofu.
19O lenei foi, ia outou alolofa atu i le tagata ese; auā foi sa tagata ese outou i le nuu o Aikupito.
20Ia e mata‘u ia Ieova lou Atua, ia e auauna ia te ia, ia e pipii foi ia te ia, ma ia e tauto i lona suafa.
21O ia lava lē e te viia, o ia foi o lou Atua, o le na faia mo oe nā mea tetele ma le matautia na vaai i ai ou mata.
22Na o ifo i Aikupito ou tamā na o le toafitugafulu i latou; a o nei ona po ua faatoateleina oe e Ieova lou Atua e pei o fetu o le lagi ona tele.
Who We AreWhat We EelieveWhat We Do
2025 by iamachristian.org,Inc All rights reserved.
