II. NOFOAIGA A TUPU, 3 - Samoan Old Version Bible

O LE MATAUPU III.O le faiga o le malumalu; o kerupi na i ai, ma le ie puipui, ma pou e lua.

1Ua amata Solomona ona fai o le fale o Ieova i Ierusalema i le mauga o Moria, i le mea na faaalia mai ia Tavita lona tamā, o le mea na saunia e Tavita, o le mea na sasa ai saito a Aruna le sa Iepusē.

2Ua amata e ia ona fai o le fale i le lua o aso o le lua o masina, i le fa o tausaga o lana nofoaiga.

3O faavae lava ia na fai ai e Solomona le fale o le Atua. O le umi i kupita e faatatau i le luai fua e ono sefulu ona kupita, ma le luafulu o kupita o lona lautele.

4O le umi o le faapaologa i luma e tusa ma le lautele o le fale, e luafulu ona kupita, ma lona maualuga e selau ma le luafulu ona kupita; ua ufi ai e ia i totonu i auro lelei.

5A o le fale tele na ia tapapa i le laau o le perosi, na ia ufi ai foi i auro lelei, ma ua avane i ai o pama, ma mea faafilifili.

6Ua ufi e ia le fale i maa tāua ia matagofie; o le auro foi o le auro o Parovaima.

7Ua ufi e ia le fale, o utupoto, ma faitotoa, ma ona pa, ma ona puipui, i auro; na togitogi foi o kerupi i pa.

8Ua ia faia foi le fale e sili ona paia, o lona umi e tusa ma le lautele o le fale, e luafulu o kupita, ma lona lautele e luafulu o kupita; ua ia ufi ai foi i auro lelei, ua ono selau o taleni.

9O le mamafa o fao e lima sefulu o sekeli auro ia. Ua ufi foi e ia o afeafe aupitoaluga i auro.

10Ua ia faia foi i le fale e sili ona paia o kerupi e lua, i le galuega o e togitogi mea, ma na ufiufi i laua i auro.

11O le umi o apaau o kerupi e luafulu ona kupita; o le tasi apaau e lima ona kupita, ua oo i le pa o le fale; ma le tasi apaau e lima ona kupita ua pai atu i le apaau o le tasi kerupi.

12O le apaau o le tasi kerupi e lima ona kupita, ua oo i le pa o le fale; ma le tasi apaau e lima ona kupita, ua soo ane ma le apaau o le tasi kerupi.

13Ua faaloaloa atu apaau o ia kerupi, e luafulu o kupita. Ua la tutū i o la vae, ua faasaga foi o la mata i totonu.

14Ua ia faia le ie puipui i le ie uli, ma le pāuli, ma le mūmū, ma le ie vavae, ma na fai i ai o kerupi.

15Ua ia faia foi i luma fale o pou e lua, e tolugafulu ma le lima o kupita le maualuga, ma le kapetala o luga o pou taitasi e lima kupita.

16Ua ia faia o mea faafilifili, e pei ona faia i le mea e fetalai mai ai, ma ua tuu ai i luga o pou; ua ia faia foi o rimoni e selau, ma ua tuu ai i mea faafilifili.

17Ua faatuina e ia o pou i luma o le malumalu, o le tasi i le itu taumatau, ma le tasi i le itu tauagavale; ua ia faaigoa le igoa o le na i le itu taumatau o Iakina, ma le igoa o le na i le itu tauagavale o Poasa.