1Ua fetalai mai foi Ieova ia Mose i le eleele laugatasi o Moapi, e latalata ane i Ioritana, e fesagai ma Ieriko, ua faapea mai,
2Ia e fai atu i le fanauga a Isaraelu latou te tuuina atu i sa Levī, ma le tofi latou te maua, o aai latou te nonofo ai; e tuuina atu foi e outou i sa Levī o tuafanua o aai e siosio ai.
3Ia fai foi o ia aai mo latou, latou te nonofo ai; o latou tuafanua e fai mo a latou povi, ma a latou mea, atoa ma a latou manu uma.
4O tuafanau foi e siosio ai ia aai tou te tuuina atu i sa Levī, e amata atu i le pa o le aai, e oo i le mea e gata mai ai le afe o kupita.
5Tou te fuafua e amata atu i tua o le aai i le itu i sasae e lua afe o kupita, ma le itu i toga e lua afe o kupita, o le itu foi i sisifo e lua afe o kupita, ma le itu i matu e lua afe o kupita; a e tuloto le aai; o tuafanua ia o aai mo i latou.
6O aai foi tou te tuuina atu i sa Levī ia i ai aai e ono e fai ma sulufaiga, tou te tuuina atu ai e sola i ai le na te fasioti se tasi; tou te faaopoopoina foi i ai o aai e fagafulu ma le lua.
7O aai uma tou te tuuina atu i sa Levī e fagafulu ma le valu ia; o i latou ma o latou tuafanua.
8O aai foi tou te tuuina atu mai aai o le fanauga a Isaraelu; o e ua i ai aai e tele tou te vaea mai ia tele, a o e ua itiiti o latou aai tou te vaea mai ia itiiti; e taitoatasi ma avatu ni ona aai i sa Levī, ia faatatau ma lona tofi ua maua.
9Ua fetalai mai foi Ieova ia Mose, ua faapea mai,
10Ia e fai atu i le fanauga a Isaraelu, ia faapea atu ia te i latou, Pe a outou sopoia atu Ioritana, i le nuu o Kanana,
11ona tofia lea e outou o aai e fai ma aai o sulufaiga ia te outou; ina ia sola i ai o le fasioti tagata o le ua paivalea ai se tasi ia te ia.
12E fai foi ia aai ma sulufaiga ia te outou ai le na te taui ma sui, ina ne‘i oti le fasioti tagata; seia tu mai o ia i luma o le faapotopotoga e faamasioina ai.
13O aai foi ia tou te tuuina atu, e ono aai e fai ma sulufaiga mo outou.
14Tou te tuuina atu aai e tolu i lenei itu o Ioritana, tou te tuuina atu foi o aai e tolu i le nuu o Kanana, e fai lava ma aai o sulufaiga.
15O ia aai e ono e fai ma sulufaiga mo le fanauga a Isaraelu, ma le tagata ese, atoa ma le ua āumau ia te i latou, ina ia taitasi ma sola atu i ai o le ua paivalea se tasi ia te ia.
16A e afai e fasia se tasi e le tasi i se uamea e oti ai lava o ia, o le fasioti tagata lava lea; ia matuā fasiotia lava le fasioti tagata.
17Afai foi ua lavea se tasi e le tasi i le maa ua togi e mafai ona oti ai o ia, e oti ai foi o ia, o le fasioti tagata lava lea; ia matuā fasiotia lava le fasioti tagata.
18Po ua lavea se tasi e le tasi i se laau i lona lima e mafai ona oti ai o ia, e oti ai foi o ia, o le fasioti tagata lava lea; e matuā fasiotia lava le fasioti tagata.
19O le na te tauia ma sui le toto, o ia lava na te fasioti i le fasioti tagata; pe a la fetaiai ma ia na te fasioti ia te ia.
20Afai e tulei atu se tasi i le tasi i lona ‘ino‘ino i ai; pe lamalama i ai, ma togi atu ai se mea, e oti ai foi o ia;
21pe tu‘i atu ia te ia i lona lima i lona ita, ua oti ai foi o ia, e matuā fasiotia lava o le na tu‘i ia te ia, o le fasioti tagata lava o ia; e fasiotia le fasioti tagata e le na te tauia ma sui le toto, pe a la fetaiai ma ia.
22A e afai ua faafuasei ona ia tulei atu ia te ia, a e le ita pe na togi atu se mea ia te ia,
23a e lei lamalama; po o se maa e mafai ona oti ai se tasi, a ua na le iloa o ia; ua na togi atu ia te ia e oti ai foi o ia, a e le sona fili ia, e lei loto foi ona ia tigaina o ia;
24ona faamasino ai lea o le faapotopotoga i le na fasi tagata, ma le na te tauia ma sui le toto, e tusa ma ia faamasinoga.
25E laveaiina foi e le faapotopotoga o le fasioti tagata, ai le lima o le na te tauia ma sui le toto; e faafoisia foi o ia e le faapotopotoga i le aai o lona sulufaiga na ia sola atu i ai; e nofo ai lava o ia seia oti le ositaulaga sili, o le na faauuina i le suāuu paia.
26A e afai e toe alu atu le fasioti tagata i tua o le tuaoi o le aai o lona sulufaiga na ia sola atu i ai;
27a maua foi o la e le na te tauia ma sui le toto i tua o le tuaoi o le aai o lona sulufaiga, a fasiotia foi o le fasioti tagata e le na te tauia ma sui le toto, e le sasaa le toto ona o ia.
28A ua le se‘i nofo pea o ia i le aai o lona sulufaiga, seia oti le ositaulaga sili; a e a oti le ositaulaga sili, ona toe foi atu ai lea o le fasioti tagata i lona lava fanua.
29E fai ia mea ma tulafono e faamasino a‘i ia te outou i o outou augātupulaga, i mea uma tou te nonofo ai.
30Ai se fasiotia se tasi, e oti lava le fasioti tagata i le mau a e molimau; a e le oti se tagata i le mau a le molimau e toatasi.
31Tou te le talia lava se togiola e ola ai le fasioti tagata, o le ua faasalaina ia oti; a e fasiotia lava o ia.
32Tou te le talia foi se togiola mo le ua sola i le aai o lona sulufaiga, ia toe foi mai ai o ia e nofo i le nuu, a o lei oti le ositaulaga sili.
33Aua ne‘i leaga ia te outou le laueleele tou te i ai; auā o le toto o le mea lava lea e leaga ai le laueleele; e le mafai foi ona togiolaina le laueleele ai le toto na faamaligiina i ai, na o le toto lava o le na na faamaligiina.
34Aua ne‘i leaga ia te outou le laueleele tou te nonofo ai, ou te mau ai a‘u; auā o a‘u o Ieova, matou te mafuta ma le fanauga a Isaraelu.
Who We AreWhat We EelieveWhat We Do
2025 by iamachristian.org,Inc All rights reserved.
