1Ua matuā leaga lava lenei mea ia Iona, ua ita lava o ia.
2Ona tatalo ai lea o ia ia Ieova, ua faapea atu, O lenei, Ieova e, e le o la‘u upu ea lenei ina ou i ai i lo‘u nuu? O le mea foi lea na ou muai sola ai i Tasesa; auā ua ou iloa oe o le Atua alofa fua, ma le alofa mutimutivale, e tele gese lou toasa, ua tele foi lou alofa, ua e salamo foi ma ua le faaoo le malaia.
3O lenei foi, Ieova e, ou te aioi atu ia te oe, ia e ave ese lo‘u ola; auā e lelei ona ou oti, a e leaga ona ou ola.
4Ona fetalai mai ai lea o Ieova, Ua lelei ea lou ita?
5Ona alu atu lea o Iona ai le aai, ua nofo foi i le itu i sasae o le aai, ua na faia foi mo ia i lea mea le fale apitaga, ua nofo i ona lalo i le paolo, seia iloa e ia pe se a se mea e oo i le aai.
6Na saunia foi e Ieova le Atua le kikaiona, ua na faasosolo i ai i luga o Iona, e fai ma faapaologa i luga o lona ulu, e laveai ia te ia ai lona tiga. Ona matuā fiafia ai lea o Iona ona o le kikaiona.
7Ua oo ina malama ae o le taeao, ona saunia lea o le Atua o le anufe; ua atia foi e le anufe o le kikaiona, ona mago ai lea.
8Ua alu ae le la, ona saunia lea e le Atua o le matagi vevela mai sasae; ona ogotia ai lea o le ulu o Iona i le la, ona vaivai ai lea o ia, ma ia faatoga atu ia oti o ia, ua ia faapea atu, E lelei ona ou oti, a e leaga ona ou ola.
9Ona fetalai mai lea o le Atua ia Iona, E lelei ea lou ita ona o le kikaiona? Ona fai atu lea o ia, Ou te ita tele lava, e oo lava i le oti.
10Ona fetalai mai lea o Ieova, Ua e alofa i le kikaiona, o le mea na e le galue ai, pe faatupuina; o le mea na tupu i le po e tasi, na mamae foi i le po e tasi.
11O a‘u foi ou te le alofa ea i Nineva le aai tele, o loo i ai tagata e sili ona toatele i le selau afe ma afe e lua fulu, o e le iloa o latou lima taumatau po o latou lima tauagavale; ma manu vaefa foi e tele.
Who We AreWhat We EelieveWhat We Do
2025 by iamachristian.org,Inc All rights reserved.
