1O le luafulu ma le tolu o tausaga o Ioasa le atalii o Aasaia le tupu o Iuta na fai ai ma tupu Ioasasa le atalii o Ieu ia Isaraelu i Samaria i tausaga e sefulu ma le fitu.
2Na ia faia le amio leaga i luma o Ieova, ua mulimuli foi i agasala a Ierepoamo le atalii o Nepata, o le na faatupu le agasala ia Isaraelu, ua ia le te‘a ese ai lava.
3Ona tupu ai lea o le toasa o Ieova ia Isaraelu, ua na tuuina atu i latou i le lima o Asaeli le tupu o Suria, ma le lima o Peniata le atalii o Asaeli i aso uma.
4Ua aioi atu Ioasasa ia Ieova, ua faafofoga mai foi Ieova ia te ia; auā ua na silafia le sauaina o Isaraelu ina ua saua mai le tupu o Suria ia te i latou.
5(Ona foai mai ai lea e Ieova o le faaolataga ia Isaraelu, na latou sao ai i lima o Suria; ona nonofo ai lea o le fanauga a Isaraelu i o latou fale ie, faapei o anamua.
6A e peitai ua latou le te‘a ese i agasala a le aiga o Ierepoamo, o le na faatupu le agasala ia Isaraelu, ua latou savavali pea i ai; na tumau pea foi le tupua o Asaira i Samaria.)
7Ua na le faatotoe foi nisi o le nuu mo Ioasasa, ua na o e tietie i solofanua e toalimagafulu, ma kariota e sefulu, ma ‘au e savavali e sefulu afe; auā na faauma e le tupu o Suria ia te i latou, na ia fai foi i latou ia faapei o le efuefu ina ua solia.
8O toe o mea na faia e Ioasasa, ma mea uma na faia e ia, atoa ma lona fitafita, e lei tusia ea i le tusi o tala i nofoaiga a tupu o Isaraelu?
9Ua taoto foi Ioasasa faatasi ma ona tamā, ua latou tanu ia te ia i Samaria; ona soloai ane ai lea o Ioasa lona atalii e fai ma tupu.
10O le tolugafulu ma le fitu o tausaga o Ioasa le tupu o Iuta na fai ai ma tupu Ioasa le atalii o Ioasasa ia Isaraelu i Samaria i tausaga e sefulu ma le ono.
11Na faia foi e ia le amio leaga i luma o Ieova, ua le te‘a ese o ia i agasala uma a Ierepoamo le atalii o Nepata, o le na faatupu le agasala ia Isaraelu, a ua savali i ai o ia.
12O toe o mea na faia e Ioasa, atoa ma mea uma na faia e ia, ma lona fitafita na ia tau ai ma Amasia le tupu o Iuta, e lei tusia ea i le tusi o tala i nofoaiga a tupu o Isaraelu?
13Ua taoto foi Ioasa faatasi ma ona tamā, ona nofo ai lea o Ierepoamo i lona nofoālii. Ua tanumia foi Ioasa i Samaria faatasi ma tupu o Isaraelu.
14Ua maua Elisaia e le ma‘i na oti ai o ia. Ona alu ifo ai lea o Ioasa le tupu o Isaraelu ia te ia, ma tagi i luga o ona mata, ua faapea mai, Lo‘u tamā e, lo‘u tamā e, le kariota o Isaraelu ma ana ‘au e tietie i solofanua.
15Ona fai atu ai lea o Elisaia ia te ia, Tago ia i le aufana ma u. Ona tago ai lea o ia i le aufana ma u.
16Ona fai atu ai lea o ia i le tupu o Isaraelu, Ia ‘u‘u lou lima i le aufana, ona ‘u‘u ai lea i lona lima; ona faaee ai lea e Elisaia o ona lima i lima o le tupu.
17Ona fai atu ai lea o ia, Tatala ia le faamalama i sasae. Ona tatala ai lea e ia. Ona fai atu ai lea o Elisaia, Fana atu ia. Ona fana atu ai lea o ia. Ona fai atu ai lea o ia, O le u o le olataga mai ia Ieova, ma le u o le faaolaina mai Suria, auā e te fasia Suria i Afeka seia e faaumatia.
18Ona fai atu ai lea o ia, Tago ia i u. Ona tago ai lea o ia. Ona fai atu ai lea o ia i le tupu o Isaraelu, Sasa ia i le eleele. Ona sasa ai lea e ia faatolu, ona tuua ai lea.
19Ona ita ai lea ia te ia o le tagata o le Atua, ua faapea atu ai. Ana e sasa faalima pe faaono po o pe na e te fasia Suria seia e faaumatia ai; a o lenei, na o le faatolu e te fasia Suria.
20Ua oti Elisaia, ua latou tanu foi ia te ia. Na sau foi ‘au a Moapi i le nuu i le amataga o le tausaga.
21Sa latou tanu le tagata, faauta foi, ua latou iloa le ‘au; ona latou lafo ai lea o le tagata i le tuugamau o Elisaia; ua oo ifo le tagata, ua papai i ivi o Elisaia, ona toe ola ai lea o ia, ua tu i luga ona vae.
22A ua faasaua Asaeli le tupu o Suria ia Isaraelu i aso uma o Ioasasa.
23A ua alofa Ieova ia te i latou, ua alofa mutimuti vale mai foi ia te i latou, ua na silasila mai foi ia te i latou ona o lana feagaiga ma Aperaamo, ma Isaako, ma Iakopo; e lei finagalo foi e faauma ia te i latou, e lei lafoai foi ia te i latou ai ona luma i ia ona po.
24Ua oti Asaeli le tupu o Suria, ona soloai ane ai lea o Peniata lona atalii e fai ma tupu.
25Ua toe fao mai foi e Ioasa le atalii o Ioasasa ai le lima o Peniata le atalii o Asaeli, o aai na ia fao atu nai le lima o Ioasasa lona tamā i le taua. Na tulia faatolu o ia e Ioasa, ua toe maua mai ai e ia aai o Isaraelu.
Who We AreWhat We EelieveWhat We Do
2025 by iamachristian.org,Inc All rights reserved.
